1 Pitiru 2 - Ngudradreadrekadhane Ka Sisiu 魯凱語聖經

Panianianiake ka lrenege si alrivilrivi ka kuni

¹ Lakamani, kunumi cilria kai ngialisiane patuelre, madha kadraedrangelrenga, ngiakathaithaithariri, pathalra, kawriva ku tangilisianane ki palrapalra,

² ka ngimiyaiya ki tawkitulalake ka daini, taakuliane kwidra ki alrivilrivi ka mireke ka abake, satalu iniane kaadrau, kipalribulu.

³ Mararaamau ku taiyane ki Sisiu, “Kialringaunga numi ku thalradhane ki Tamatama.”

⁴ Kidethe ki Tamatama, ka panianianiake ka lrenege, unu kiacilringa ki umawmase, ai ku Twaumase wapilri iniane, taulra iniane.

⁵ Kunumi la ngimia ki panianianiake ka lrenege, arakai tudaane ku ngwakai ki daane ki abake, ikai kwini kamania kwidra mabula ka barakalai, ngukai ki Yesu Kirisitu patarumara ku kiragai tarumara ki Twaumase ka ngukai ki abake ka sapatarumarane.

⁶ Asi lwiyane kai Sisiu amia kai: Wapilriaku ku vaeva ka tinukucingalrane ka lrenege, si arakai karwalai Ziyungu, sanaka masalru iniane, kai lri kasamadre.

⁷ Pangukai numiane ka masalrunga, kikai lrenege yai tinukucingalrane, ai, pangukai ki kai masalru: Kwidra cilringa ki taratudaane ka lrenege, amaninga ku makuciaciingalrenga ka karwalai ka lrenege!

⁸ Ikai ki talidrumane ki Sisiu amia kai: Kikai vaeva ka lri pawcucusu ka lrenege, patwabakebake ki umawmase ka lrenege. Kwi lalasu twabakebake, asi lwiyane kai masalru ki patengane ka vaga, kikai mialri ka kidremedreme ki Twaumase.

⁹ Ai, kunumi yai pinilriane numi ka vaeva ka zuku, ka barakalai ki talialalai, mabula ka kuni, laumawmase ki Twaumase. Ku Twaumase wapilri numiane pakatwase ki kadradridrimitane, si mwa ki ledraini, la pelaelaela ku matiasamaymali ku takaunganeini.

¹⁰ Kunadruma kai numi ka laumawmase ki Twaumase, kikainga laka umawmasenga numi ki Twaumase, kunadruma kai numi kia kakalithi ki Twaumase, kikainga la kikakalithinga numi iniane.

Sasiakawlu ki Twaumase

¹¹ Kinilibakane ka laretesane, ikai kai kawmasane yai badhabadha numi, ka mwababadhane ka umawmase. Lri pasapukwana ku numiane, madha pangilralrailraingi ki urikai ki beate numi, kikai miyaiya kai ka urikai ki beate takikaruburuburane ki abake.

¹² Ikai ki sakamaelanane ka umawmase, ani kapapedrenga ku tangivelevelane numi, kudra twalililisi numiane, si paiya ku ngialisiane iya numiane ku umawmase, ngwalai ku tadreelane ku tharirane ku tangivelevelane numi, ikai kwidra ki akelane ngusela ki Yesu ka vai, lani lrigu papia ki Twaumase.

¹³ Ngwalai ki Tamatama, pasalaladha ki amani ku warathudu ki ngwa kawmasane: Amani kikai abelenge ka talialalai

¹⁴ si kwidra sudralruini ka latabebelenge pakaungu pakalreva ku mathariri pathavungu ku manganga.

¹⁵ Asi lwiyane ku kidremedreme ki Twaumase paakai ku arakaiyane ku tharirane ku tangivelevelane numi tamenge ki ngudui ki la kadrwa ku thingale ka umawmase.

¹⁶ Kunumi yai ngialralrainginga numi ka umawmase, ai madha arakaikai ku tangilralraingane numi si kabungu sanaka ngialisiane, asasiakawla ki Twaumase.

¹⁷ Kunumi tukucingalra sanaka umawmase, kilibaka ki kiasusu ki Twaumase ka laretesane, usakena ukuludru ki Twaumase, la usakene ki Talialalai.

Takitwalravane ku takiadilane ki akwalriane ku Kirisitu

¹⁸ Ku asasiakawlu, usakena pasalaladha ki tawki numi, adravane ka masulraapele ka tawki, ka maelathe ka tawki tungimiyaiya kwini.

¹⁹ Alaiyasi ngwalai ku tathingalane numi ka kidremedreme ki Twaumase, la palraingi kiadili kwalri ku nakai ka akwalriane, ku Twaumase lri subulrubulru numiane.

²⁰ Alaiyasi ngwalai ku tapasalrivane numi la kiadili kilrumai, yakai ku manemane ku lrigu? Kathaane ku ngwalai ku tapiane ku mathariri si la maka kiadili ku akwalriane ku umawmase ka lri dulru ki subulrubulru ki Twaumase.

²¹ Ku pilri numiane ki Twaumase ku pacugane yakai kikai, asi lwiyane ku Kirisitu pasiakai numiane kwalri, si suru baai numiane ku atwalralravane, pakai ku adulrwane numi tupapalra iniane.

²² Kadrwana ku tapasalrivaneini, kadrwana ku kialalra iniane lu kadraedrangelre.

²³ Lu kitusinalreme kai twabalre, lu kipakiangeange kai kawariva kukuludru ku vaga, mwakalava sikakathane ki madringelrese ka lri saibange.

²⁴ Ku Kirisitu ngiakakamani mailuku ku pasalrivaneta mwa ki ziwzika, ala dulruta kai panianiakenga ikai ki pasalrivane, la pasikaikainga ki dringelresane panianiake sikakathane. Ngwalai ku takipakadulane ini, la ki pawdringainga numi.

²⁵ Kunadruma mia numi ki amuli ka kiu makanaelre, kikainga laka siaulringa numi, si tupapalra ki taraagu si tarakadrenge ki abake numi.