1 Pitiru 1 - Ngudradreadrekadhane Ka Sisiu 魯凱語聖經

¹ Kwaku ka Pitiru ka nisikawlane ki Yesu Kirisitu. Watigamiaku baai ki pilri ki Twaumase ka laumawmase, kudra ki ngwalai ku takipakwalriane si mubere sarau ikai Puntu, Galatia, Kapadukia, Asia, si Bithinia ka laretesaneli.

² Kudra kipilri numi yai singiakai ki kidremedreme ki Tama ka Twaumase ka nikelretaneenga, ka ngwakai ki Siri ala kabula, pakai ku apasalaladhane ki Yesu Kirisitu, si kabula arakai ku eraini. Ku swaete ka migemi ki Twaumase, si sulivatane ani baai numiane!

Panianianiake ka sasiadradrama

³ Maelanenga ki Twaumase ka Tama ki Tamatamata ka Yesu Kirisitu! Ngwalai ku kadrwa ku leketane ku thalradhane, si ngukai ku tasielane twalai ki wapacai ka Yesu Kirisitu, la malra ku bavane ku niake si baai mitane, ala ikai ku panianiake ku sasiadradramata,

⁴ si tarumara mucungulu kudra pasikai ki Twaumase ki kawkawluini suru ka swaete ka akaesadhane. Ku pasikaini numiane suru pikai belenge ku akaesadhane kai lri kalisi, kai lri kakudrulru, lai kai aru pasuludru,

⁵ lri baai numiane ka la ngwalai ki salrwane ki Twaumase si kipalribulu ki pukuini, pakai ku amalrane numi kudra nipadulrwanenga, lri ikai ki satwalrepenge ki lrikisi utaluvaivai ka sapalribulane.

⁶ Lakamani, kunumi yai kiraragadha, unu kaiasasane lrika makaalra ku sakituthiathingalane si padaalru kipakwalri;

⁷ ku akipadradresengane ku miyaiya kai sapelaelane ala ka patengane ka makecenge ku salrwane numi. Adravane kudra lri kalisi ku kingi wathalethale madu; kwini salrwane numi walribate ki kingi ku kucingalrane, laka makadrwadrwa ku lrika akilrialringavane, pakai ku lrika aikaiyane numi lu mutaluvaivainga ku Yesu Kirisitu kudra vai si kidrengedrengere tarumara, kilrigu, si kitukucingalre.

⁸ Unu kai numi wadrele iniane, ai madalame numi iniane; unu kai numi maka wadrele iniane kaiasasane, ai masalru numi iniane. Yakai kwini kaika maka puvaga numi putaluvaivai kwi kadrwa ku apalikaiyane ka sakiaragai;

⁹ asi lwiyane yacengecenge numi tarumaramara kwi madru ki salrwane, amani kwini akipalribulane ki abake numi.

¹⁰ Pangukai kikai akipalribulane, ku layuginsia yakainga ku kirarakete lini si ngutatiki kisilape drele, si la yugingi patharukai ki Twaumase ku abaadhane numiane kikai migemi.

¹¹ Kwi lalasu kiasamula silape, ku lrika athingalane ki Ri ki Kirisitu ikai adringi liniane ku sapelaelane, ka tayugingane ku Kirisitu lri tara kipakwalri, lukabilrilinga lai tara maalra ku lrigu, kikai miyaiya kai lai lri ikai lwigane, lu tumatumane lai ngimia.

¹² Ku Twaumase pathingale ki layuginsia, kudra awngane lini kaika ngiapapasikai, pasiakai numiane. Kudra iya lini kilakikai, kaiasasane ngwakainga ki lasasiakawlu ki hukuingi, si satalu ki twalai belenge ka Siri, baainga numiane, kilakikai adravane ku sasiakawlu belenge apia thingale!

Mabula ka sikace

¹³ Lakamani, kwi kidremedreme numi padulrua, si kipapawlringalringau, kudra sasiadradrama numi pikaiya belenge ki tamutaluvaivadhane ki Yesu Kirisitu ku lrika abaadhane numiane ku migemi.

¹⁴ Pasalaladha ki Twaumase, madha pangisasingikaikai ki ngipapakaesadhane ki kidremedreme si marasikai numiane, mia saka siaswalane saka kulrunguana numi ka kadrwa ku thingale.

¹⁵ Kudra amani ku wadawlu numiane ka Twaumase yai mabula; kunumi la mialria ikai ki tatwatumanane numi patuelre kabula.

¹⁶ Amia kikai kai Sisiu, “Kunumi kabula, asi lwiyane mabulaku.”

¹⁷ Lu inulri numi, tu Tama kudra singiakai ku kakwakudhane ki umawmase si ka thadaalrane ku patwaladhane saibange ki umawmase ka Twaumase, la kunumi ku taikawmasanane numi kudra vai usakena ukuludru iniane.

¹⁸ Wathingale numi, kudra dulru numi twalai ki kipawcungulu numi ki siaswalane kudra tangilisianane si kimukerenge, manemane ku tusabalrithane numi? Kai kamani kwidra mia ki kingi si gingi ka lri kawlrau ku kucingalraneini ka lawbubulu,

¹⁹ sakai ku tatueraeradhane ki Kirisitu, mia kudra ki kadrwa ku tangilisianane ku kudrulru ka erai ki Lrulai ka kiu.

²⁰ Ku Kirisitu yai pilri ki Twaumase sa kaina bekace kawmasane, laka ngwalai numiane mutaluvaivai ikai kai ki bilrilanenga ki lrikisi.

²¹ Ngwakai iniane, masalru numi kwidra pasiaela iniane twalai ki wapacai, si baai iniane ku lrigu ka Twaumase, lakamani, ku salrwane numi si sasiadradrama yaelreelre patuelre ikai ki Twaumase.

²² Kikai asasane, ngwalai ku tapasalaladhane numi ki tengane ka sabulrwane, ngiababulanga numi, si ka tengatengane numi kilibake ki drumane ki retesane, patwalai ki kidremedreme makilibalibake.

²³ Kunumi peaeelanga numi kitulalake, kaika twalai kwidra lri kalisi ka sapaivai kitulalake, twalai kwidra ki kai lri kalisi ka sapaivai, ka amani kwidra palralrawthu ka vaga ki Twaumase ka twalalake.

²⁴ Mararaamau ku taiyane ki Sisiu: Kai umawmase makanaelre, mia ki ubulu, ku tangiesadhanane lini mia ki bengelrai ubulane, kai ubulu lri karudame, kai bengelrai lri kalraici,

²⁵ ai kai vaga ki Tamatama lrika palralrawthu ikai! Kikai vaga amani kikai padaruru numiane baai ka hukuingi.