1 Latalialalai 9 - Ngudradreadrekadhane Ka Sisiu 魯凱語聖經

Ku Twaumase adrelanenga ki Sulumungu

¹ Ku talialalai ka Sulumungu samaka tudaanenga ku daane ki Twaumase, daane ki talialalai, si kudra latudaaneini ku drumane ku ladaane,

² ku Tamatama la peelanga papia iniane adrelane, mia kudra natadrelane iniane ikai kavai Gibiungu.

³ Ku Tamatama la kawriva iniane, “Kialalranga naku ku inulrisu. La malraku kikai ki tudaanesu ka daane ki Tamatama pawkalrivili tusaniange, kamaninga ku akapalralrawthane ka taikaiyane sukubu nakwane; lrika tadrangalrwaneli iniane, palakebe iniane.

⁴ Lwiyasi kusu la miasu ki tamasu ka Davidi pasingikidremedreme kipuawngane nakwane, paluludu ku hulriceli, singikai kudra drekaseli si pangimia,

⁵ lri tara pasuswaku kudra puvagangali ki tamasu ka Davidi, amani kwidra lamwabaibalrithi iniane lrika palralrawthu rathudu ki swa Iseraylri.

⁶ Lwiyasi kusu si lamwabaibalrithi muswane la kai pasalaladha nakwane, kai paluludu kudra baaili numiane ku hulrice si padradrekase, la mwa sukubu ki drumane ka twaumase,

⁷ lri malraku ki kawkawluli ka swa Iseraylri patwalai ki baaili liniane ka kadaengane pakatwase liniane, si cilri kikai natusaniangeli, ka tasukusukubane nakwane ka daane ki Twaumase. Ku laumawmase lri makitu ulralrakai ki swa Iseraylri, si tudrekase liniane.

⁸ Kikai daane ki Twaumase lri ataububulane; ku lawalribate lri makitu kasamali, ulralrakai kivaga iya kai, ‘Ku Tamatama anipangimia kikai marasikai kai ki kuni si kikai ki daane ki Twaumase?’

⁹ Ku laumawmase lalri tubalre, ‘Amani lini sa cilri ki Tamatama ka Twaumase lini. Ku Tamatama nawasangiluku ki cucungulane lini twalai Izipiti, kai lalasu la katwaselringa sukubu ki drumane ka twaumase, lakamani ku Tamatama pwalebe ku amatikurwane patuelre baai liniane.’ ”

Tamakaketeketane ki Sulumungu ki Hirame

¹⁰ Ku Sulumungu taramapusale ka caili tudaane ku daane ki Twaumase si daane ki talialalai.

¹¹ Ku talialalai ki swa Tayre ka Hirame la patarumara ki Sulumungu ku la saarakaiyane ku cedare ka angatu, alrenge ka angatu, si satwatumane ka kingi. Sa tulrepenge ku awngane, ku Sulumungu la malra kwini talikai Galrilri ku taimapusale ku cekele baai ki Hirame.

¹² Ku Hirame la twalai Tayre lidrau kwini ki lacekele, la kai kiragai,

¹³ la kawriva ki Sulumungu, “Talragi, kikai yai amani ku baaisu nakwane ka cekele?” Lakamani kwini swa talikai kwini pakela kaikameane thadalraneana kipasi Kabule.

¹⁴ Ku baaini ki Hirame ki Sulumungu ku kingi ikai kau 4,000 kukingi ku kalrane.

Drumane ka takaungane ki Sulumungu

¹⁵ Ku talialalai ka Sulumungu wadawlu ku lri mulrawlrau tudaane ku daane ki Twaumase si daane ki talialalai, si la pudae kwini ki takalrukulane ki tali talrawane ku cekele, la tudaane ku alradre ki cekele ka Yerusalrime. Kwini lasu la mialri arakai kikai ki tarakauawngu tupudriadringai kwini lacekele ka Hazure, Megidu si Gizere.

¹⁶ (Ku talialalai ki swa Izipiti nakiakaruburu ki Gizere, la malra iniane, la papacai kwini laumawmase ka swa Kanange, si pwalawbu kwini ki cekele. Sakabilrilinga, samwa ku lalakeini karudrange ki Sulumungu, kwini lasu la malra kikai cekele tusapailukane baai ki lalakeini ka ababai.

¹⁷ Ku Sulumungu twapela tucekele ka Gizere.) Ku Sulumungu la arakai kwini ki tarakaungu tupela tucekele ka Bithe Hurunu,

¹⁸ Baala, swa Tamare kavai calragulragu ka Yuda,

¹⁹ tapikaikaiyane sekete ku lalawbubulu ka cekele, tapikaikaiyane ku palridingi si rigi ka cekele, si kavai Yerusalrime, Lebanungu si ikai kidruanga ki cekele kudra nau tudaane iyaini.

^20-21 Kwini dawluini pakaungu ki Sulumungu lamwabaibalrithi ki swa Kanange, amani kwidra sarathudunga Kanange ku swa Iseraylri ka lamwabaibalrithi ki kaika kiamudu. Kwini laumawmase yakai ku swa Amuri, Hite, Perizi, Hivi, si Yebuse. Kwini lamwabaibalrithi ki lalasu pakela kaikameane thadalraneana aduriduri.

²² Ku Sulumungu kai paaduri ki swa Iseraylri, kathane ku pakwapingi, kiacapili, tamatama ki kwapingi, tamatama ki takwapingane, tamatama ki palridingi ki rigi si tarangurigi.

²³ Ku Sulumungu yakai ku 550 ku tarakadrekadrenge, kadrenge ki tarakaungu ki makaelaela ku nipakauawngane.

²⁴ Ku labaibai ki Sulumungu ka lalake ki talialalai ki swa Izipiti, satwalai ki cekele ki Davidi taluela mwa kwini ki pasikai iniane tudaane ki Sulumungu ka bavane ka daane ki talialalai yai, ku Sulumungu la pudae selrepe kwini ki talikai talrawane cekele ka valrwalru.

²⁵ Ku Sulumungu sangwa tulrulu ki caicaili ikai kwini ki tutapatarumaramaraneini patarumara ku Lama ka lrisi si Sulivatane ka lrisi. La papia ki Tamatama padalai ku sangulreme. Laka miyaiya kikai, kwini lasu la tulrepengenga ku tatudaananeini ku daane ki Twaumase.

²⁶ Ku Sulumungu ka talialalai la ikaainga kwini talikai Idume ka babiabila ki laveke Suize ka adeethe ka Iluthe ka Iziungebere darepe ku varukuru, la cegecege ku taingea ka sakaredele ka varukuru.

²⁷ Ku Hirame ka talialalai la patwalai ki sakaredele ki varukuru sikawlu kudra la ngiathingale ka tarakawaungu ikai ki varukuru, karedele ki kwapingi ki Sulumungu nguvarukuru.

²⁸ Kwini lalasu la daruru kavai Upire, la patwalai kwini iluku ku ikaai kau 14,000 kukingi ku kingi si baai ki Sulumungu.