1 Latalialalai 8 - Ngudradreadrekadhane Ka Sisiu 魯凱語聖經

Kiadredresenge ki Langiane pudaane ki daane ki Twaumase

¹ Pakai ku apatwaladhane Ziyungu ka cekele ki Davidi malra ku Langiane ki Tamatama pudaane ki daane ki Twaumase, ku talialalai ka Sulumungu wasarubu ki lazuku ki swa Iseraylri si latarasangililuku ki lazuku mwa ka Yerusalrime.

² Kwini lalasu la ikai ki dramare ki Ithangeime, ka amani kwidra ki mwasakapitu ka dramare, saka kalalrisiane ki Talakangane ka lrisi la isarubu mwa ki talialalai ka Sulumungu.

³ Sa isarubu maikaikainga makanaelre ku latarasangililuku ki swa Iseraylri, ku labarakalai la angeale kwini Langiane,

⁴ ku swa Lrivi si barakalai la mialri malra ku Langiane ki Tamatama, Alrivilrivi ka balrawbau si la sarakaikaiyane ka lawbubulu pudaane ki daane ki Twaumase.

⁵ Ku Sulumungu ka talialalai si swa Iseraylri makanaelre la isarubu icucubungu ki Langiane ki Tamatama, patarwamara ku lwange si kiu tusapatarumarane, ku kalrane kaika asiasipane.

⁶ Ku labarakalai la malra ku Langiane ki Tamatama bulri pudaane ki daane ki Twaumase, si pikai ki Alrivilriviilrivinga ka taikaikaiyane ki tailebe ki drusa ka Kirubime.

⁷ Kwini Kirubime ku tangipaipadhane ku sapakepake la kabungu ki Langiane si babulriane ki Langiane.

⁸ Kwini babulriane malragi turamuru, kathane ku acegecege icucubungu ki Alrivilriviilrivinga ka taikaikaiyane ka maka wadrele kwini ki tarakaringavane, lu twaladhane talidrumane kaidu maka wadrele. (Kikai lababulriane yakaiyana kaikameane.)

⁹ Kathane ku drusa ka alibi ka lrenege ku nipikaiyane adringi ki Langiane, kadrwa ku drumane ku lamanemane; kikai drusa ka alibi ka lrenege amani kudra sa kainganai twalai Izipiti ku swa Iseraylri, ku Tamatama sa kiketekete liniane, ku Musi sa ikai lregelrege Hurebe wamalra pikai adringi ki Langiane ki Tamatama.

¹⁰ Ku labarakalai sa katwase ki daane ki Twaumase, ala kirimu ikai ku waledra ka ememe suete ikai ki daane ki Twaumase,

¹¹ draredraredrare ku ledra ki Tamatama, kwini lalasu lakamani ku kaika maka siwlringa mudaane kipuawngane.

¹² Sakamani kwidra, ku Sulumungu la inulri: Tamatama, napaswatelraisu ki vai ikai subelebelenge, ai malrithethesu ikai ki makucege kadradrimiti ka ememe.

¹³ Pasiakainga naku muswane tudaane ku vaeva ku matiasamali ku daane, ka amani ku apalralrawthanenga ka taikaiyanesu.

Sabulrwane ki Sulumungu ki mapapangale

¹⁴ Ku mapapangale ki swa Iseraylri la makitu acegecege ikai kwini. Ku talialalai ka Sulumungu la ngibangulu, cucubungu ki mapapangale, la pasikai liniane kitubi ki Twaumase.

¹⁵ Kwini lasu amia kikai, “Tadrengedrengere ki Tamatama ka Twaumase ki swa Iseraylri! Pasusu ku pukawnungaini ki ama ka Davidi; napeaelaela ki Davidi iya kai,

¹⁶ ‘Twalai kudra tamalraneli sangiluku ki kawkawluli katwase Izipiti, kadrwa ku tapilrianeli ikai Iseraylri ku nataingeanenga ku cekele si tudaane ku tasukusukubane nakwane; ai wapilriaku muswane ka Davidi kamani ku warathudu ki kawkawluli.’ ”

¹⁷ La pacungulu ku Sulumungu iya kai, “Ku ama ka Davidi wakikake ku twadaane ku daane ki Twaumase, tutasukusukubane ki Tamatama ka Twaumase ki swa Iseraylri.

¹⁸ Ai ku Tamatama amia kai iniane, ‘Mathariri kikai kidremedremesu nau pasikai iya nakwane tudaane ku daaneli;

¹⁹ ai kaisu lri maka tudaane, kathane ku lalakesu ka kalalakanesu ka lri maka pasikai nakwane tudaane ku saniange ka daaneli.’

²⁰ “Kikainga ku Tamatama pangiamianga ku pukawnuini. Mwacungulunga naku ki ama ka Davidi atalialalai ki swa Iseraylri, si maka tudaanenga ku tasukusukubane ki Tamatama ka daane ki Twaumase ki swa Iseraylri.

²¹ Mialiaku ikai ki daane ki Twaumase padulru ku apikaiyane pasutelrai ki Langiane. Ikai adringi ki Langiane ki Tamatama piakai ku sakiketeketane ka alibi ka lrenege; kikai sakiketeketane amani kudra sa sangiluku ku Tamatama ki cucungulane nai katwase Izipiti yai kiaketekete liniane.”

Inulri ki Sulumungu

²² La pacungulu, ku Sulumungu yacucubungu ki mapapangale ka swa Iseraylri katwase mucucubungu ki tapatarumaramarane ki Tamatama si acegecege, la papia subelebelenge ciliki ku alrima.

²³ Kwi lasu wainulri iya kai, “Tamatama ka Twaumase ki swa Iseraylri, kai belenge kai kawmasane kadrwa ku drumane ku Twaumase ku lri maka kiramau muswane! Pangiamiasu ku takiketeketanesu ki kawkawlusu: Alaiyasi la salikavaeva ku kidremedreme kwi lalasu pasalaladha muswane, ala pathingalana ku thalradhanesu papia liniane.

²⁴ Pangiamiasu ku pukawnungasu ki ama ka Davidi, pakela kaikameane, ku pacase ku vaga patuelre pangiamiyangasu.

²⁵ Tamatama ka Twaumase ki swa Iseraylri, kikai kiatubiaku muswane mialria pangimia kudra drumane ku pukawnungasu ki ama: Napeaelaelangasu iniane, ku lamwabaibalrithi iniane la dradrele pasalaladha muswane, mia iniane, ku mwabaibalrithi iniane lri kapalralrawthu ikai ku atalialalai ki swa Iseraylri.

²⁶ Lakamani, Twaumase ki swa Iseraylri, kiatubiaku muswane ala pangimia kudra papiasu ki sasiakawlusu ka ama ka Davidi kudra ngwakai ki pukawnungasu.

²⁷ “Twaumase, patenganesu ka lri ikai kai ki kadaengane? Adravane ka kadrwa ku talikaiyane ka subelebelenge kai lri makakelrete lu ikaisu, sikamanianenga kikai tudaaneli kai daane ki Twaumase?

²⁸ Tamatama ka Twaumaseli, amaniaku ku sasiakawlusu; kiatubiaku kilalra kai inulrili, si palraingi kai takitubianeli icucubungu muswane kaikameane.

²⁹ Kiatubiaku drangalrungalrwa pivai pimaungu kai ki daane ki Twaumase; kikai yai amani ku pilrisu ka tasukusukubane muswane. Lu icubungaku ki daane ki Twaumase inulrinulri, kiatubiaku kilalraili.

³⁰ Ku sasiakawlusu si kawkawlusu ka swa Iseraylri lu cubungu kikai inulrinulri, kiatubiaku muswane twaladha ka subelebelenge ki taikaiyanesu si kilalra naiane, si pacepe naiane.

³¹ “Alaiyasi ikai ku umawmase ku kiakukusu ka pasalriu ki sakacekele, la kiluku mwakai ki daane ki Twaumase cucubungu ki tapatarumaramarane muswane, la kiketekete kiapasidralrilaku iya,

³² Tamatama, kiatubiaku muswane twaladha subelebelenge kilalra, si turingaringau ki sasiakawlusu, ku yakai ku pasalrivane, singikaiya ku akipathavungane si pathavungu iniane; ku kiadralrili, tukakadrwa ku pasalrivaneini, la singikai ku takadringelresaneini si pakalreva iniane.

³³ “Alaiyasi ku kawkawlusu ka swa Iseraylri la ngwalai ku tapasalrivane muswane si kipamalebe ki badha, ala ngibangulu papia muswane, si mwa kai ki daane ki Twaumase, la ngisasaangate kitubi ku apacepanesu,

³⁴ kiatubiaku muswane twaladha subelebelenge kilalra liniane, pacepe ku pasalrivane ki kawkawlusu, sangiluku liniane siwlri mwa kikai baaisu ki cucungulane lini kikai kadaengane.

³⁵ “Alaiyasi ku kawkawlusu la pasalriu muswane, la kaisu pawdale, ala kirimu ngitatupela, kasalru muswane, la cubungu ki daane ki Twaumase ngisasaangate papia muswane inulri,

³⁶ kiatubiaku muswane twaladha subelebelenge kilalra. Kiatubiaku muswane pacepa kai pasalrivane ki sasiakawlusu si mapapangale ki swa Iseraylri, bulrwa liniane ngukakai ki madringelrese ka kadalranane. Lukamaninga, kwidra, Tamatama, kiatubiaku paudala kai ki kadaenganesu, kikai ki amani ku baaisu ki kawkawlusu ka palralrawthunga ka cungulu lini.

³⁷ “Alaiyasi la ikai ki kuni ku silravane, swalrubu, culwane ka valrigi, ubilringane, acaculiki, apapawku, lu kipamaki ki badha ku kipadradresenge ki matikurwane ki caemane kai kawkawlusu,

³⁸ kiatubiaku muswane kilalra ku inulri lini. Alaiyasi ikai ki kawkawlusu ka swa Iseraylri la ikai ku pasingiakidremedreme tubi, la ciliki ku alrima papia ki daane ki Twaumase inulri,

³⁹ kiatubiaku muswane kilalra ku kitubi lini, twalai subelebelenge ki taikaiyanesu kilalra liniane, pacepe liniane, si paralubu liniane. Kathanesu ka maka wathingale ki takidremedremane ki umawmase. Kiatubiaku muswane ku asingikaiyanesu kunai ka alrane lini si marasikai liniane,

⁴⁰ kikai kawkawlusu lani ka palralrawthunga ikai ki baaisu ki cucungulane nai ka kadaengane usakene ukuludru muswane.

^41-42 “Alaiyasi ikai ku swa adaili ka sakamaelanane ka umawmase la kilalra ku naganesu si tapianesu ikai ki kawkawlusu ku awngane, la kela sukubu muswane, la mwa kai ki daane ki Twaumase inulri,

⁴³ kiatubiaku muswane kilalra ka kitubini. Twaladha subelebelenge ki taikaiyanesu kilalra iniane, singikai ku kitubini palraingi iniane, kai yakawmasane sanaka umawmase lani makanaelre mia ki kawkawlusu ka swa Iseraylri thingale muswane, musakene mukuludru muswane, lani thingale kikai tudaaneli kai daane ki Twaumase ka taikaikaiyane sukubu muswane.

⁴⁴ “Alaiyasi kai kawkawlusu la pangukai ku drekasesu si mwa kikaruburu ki badha, kwini lalasu adravane ikai inukidruanga, la cubungu kai ki pilrisu kai ki cekele si kikai ki pasikaili muswane tudaane kai ki daanesu inulri,

⁴⁵ kiatubiaku muswane kilalra liniane. Kiatubiaku twaladha subelebelenge kilalra ku inulri lini, la paakaci liniane.

⁴⁶ “Alaiyasi ku kawkawlusu la pasalriu muswane, (kadrwa ku kailri pasalriu ku umawmase), la ikaisu ki lisiane palraingi ki badha pamalebe liniane, la malra liniane ravase putali drumane, adravane ka ngitwatwatumane ku adailane,

⁴⁷ mialriaku kitubi muswane kilalra ku inulri ki kawkawlusu. Luiyasi kwini lalasu la ikai kwini ngitatupela, la papia muswane si kitubi, ngipapelaela ka pasalriu, ka ngialisiane turamuru, Tamatama, kiatubiaku kilalra ku inulri lini.

⁴⁸ Lwiyasi la ikai kwini si ka patengatengane pasingikidremedreme ngitatupela, la cubungu papia kikai ki kadaengane ka baaisu ki cucungulane nai papia muswane si inulri, cucubungu kai ki pilrisu kai cekele si pasikaili muswane tudaane ka daanesu inulri,

⁴⁹ kiatubiaku kilalra liniane. Kiatubiaku twaladha ka subelebelenge ki taikaiyanesu kilalra liniane, kakalithi liniane.

⁵⁰ Kiatubiaku pacepa ku tapasalrivane lini patuelre, ku badha lini lani mialri kasulrapele liniane.

⁵¹ Kwini lalasu kawkawlusu, ka amanisu ku wasangiluku liniane twalai Izipiti, ka amani kudra kwadaladalai ka talabwane kainganai.

^52-53 “Abebeelengenga ka Tamatama, asu ka palralrawthu kilibake sirapale ki kawkawlusu ka swa Iseraylri si talialalai lini, sana papia muswane kitubi ku akiparalubane, kiatubiaku kilalra ku inulri lini. Mia kwidra sa sangilukusu ki cucungulane nai katwase ka Izipiti, pangwakai kudra pukawnungasu ki sasiakawlusu ka Musi, wapilrisu liniane patwalai ki sanaka umawmase ngitatu kawkawlu.”

Bibilrilinga ka inulri

⁵⁴ Ku Sulumungu tapidrurane icucubungu ki tapatarumaramarane, la ciliki ku alrima inulri; kwini samaka inulringa ki Tamatama, la ngidrakale acegecege.

⁵⁵ La kwadrau kitubi ki Tamatama ku asubulrubulrwane ki mapapangale ki swa Iseraylri; iya kai,

⁵⁶ “Tadrengedrengere ki Tamatama! Pangiamianga ku pukawnuini, baai ku sulivatane ki kawkawluini. Pasusu palakebe kudra pangukaini ki sasiakawluini ka Musi sanaka pukawnungaini patuelre.

⁵⁷ Ku Tamatama ka Twaumaseta ani tapalrapalra mitane, mia ku tatapalrane ki cucungulaneta. Anika palralrawthu kai kidailinga mitane, kai cilri mitane!

⁵⁸ Ani kamanini ka papasalaladha kai kidremedremeta iniane, la tadulru kai kaela singikai ku kidremedremeini panianiake, paluludu ku cunu mitane ki cucungulaneta ku hulrice si padradrekase.

⁵⁹ Ku Tamatama ka Twaumaseta anika palralrawthu ngulringau kikai inulri si kitubili iniane. Ani singikai ki mapapangale ki swa Iseraylri si talialalai lini ku murikaikai lini ki vaivai kathalralrai liniane.

⁶⁰ Lu mia kikai, kai kuni kawmasane lri makitu thingale, ka kathane ku Tamatama ka Twaumase, kadrwa ku drumane ka Twaumase.

⁶¹ Kunumi makanaelre, ka kawkawlu ki Twaumase, anika palralrawthu ka vaeva ku kidremedreme papia ki Tamatama ka Twaumaseta, paluludu sanaka hulrice si padradrekaseini, mia kaikameane.”

Tapatarumarane tulrisisi ki daane ki Twaumase

⁶² Ku talialalai ka Sulumungu si swa Iseraylri ka mapapangale papia ki Tamatama patarumara ku sapatarumarane.

⁶³ Kwini lasu patarwamara ku 22,000 ku lwange si 120,000 ku kiu tu Sulivatane ka lrisi. Laka miyaiya kai, ku talialalai si mapapangale makanaelre pasiakai ki daane ki Tamatama tulrisisi patarumara.

⁶⁴ Kwini sakavai, kwini lasu la mialri malra kwini kalatadrane, kamani kwidra cucubungu ki daane ki Twaumase ka kalatadrane, pakitukudha tumabulane, ikai kwini patarumara ku Lama ka lrisi, Taleke ka lrisi, si sima ki nilapulapwane ka sarakaiyane tulrisi ki Sulivatane ka lrisi. Ku pia kikai ki Sulumungu amani saka tikiane turamuru kwini lriwlu ka sapatarumaramarane, kai maka wamwa kwini thathatha ka lasapatarumarane.

⁶⁵ Ku Sulumungu si swa Iseraylri ka mapapangale makanaelre la ikai ki daane ki Twaumase makapitulu tulrisisi ki Talakangane ka lrisi. Ku singiadaili kela ku laumawmase twalai tali dradha kavai salralriwgu ka Hamathe si swa tali lrawdru pagiagisane ki Izipiti ka lacekele kela kipaelre.

⁶⁶ Saka samakavalrulu, ku Sulumungu la pasawvagavagai ki laumawmase mubalriu; kwini lalasu makanaelre la subulrubulru ki talialalai, makitu kiraragai siwlri mubalriu, asi lwiyane ku Tamatama swabulrubulru ki sasiakawluini ka Davidi si kawkawluini ka swa Iseraylri.