1 Latalialalai 7 - Ngudradreadrekadhane Ka Sisiu 魯凱語聖經

Daane ki talialalai ka Sulumungu

¹ Ku Sulumungu mialri ikai ku taluvale ka ngitatu daaneini, tara 13 ka caili ala makatulrepenge.

^2-3 Ku Lebanungu ka daane ki talialalai ku lragiane 44 ka mituru, ku ngulapane 22 ka mituru, ku abelengane 13.5 ka mituru; situlrulu ku cedare ka angatu ka ulrudru, ku sivaale 15, kwini belenge la pubulri ku cedare ka angatu. Ku tali baliali laka mialri arakai ku cedare ka angatu, pakela ki tadrawsulane; ki drawsulu yakai ku ulrudru ku saparuthukane.

⁴ Kwini maecebe ka balingibingi latara ikai ku tulru ku lribange.

⁵ Ku lrawlrawdru si ulrudru ki lrawlrawdru sikake patuelre, laka situlrulu ku tuluru si maececebe.

⁶ La piyanga ku lrimemeteke ka ulrudru ki zimisu, ku lragiane 22 ka mituru, ku ngulapane 13.5 ka mituru, la padrimana ku nitulrilrianane ara balrawbau ka ruka, arakai ku lrimemeteke ka ulrudru.

⁷ Kwini ki taetalane ki talialalai, mialri ka tasaibaibangane, amani ku taikaiyane ki Sulumungu saibange ki yakai ku lakakudhane. Kwini adringi ki daane laka niarakaiyane ku cedare ka angatu twalai ki draidralri si baliali.

⁸ Ikai ki lrilrikudru ki tasaibaibangane ka kalatadrane yakai ku tapeapecane ki Sulumungu; kikai daane ku tapangimiane darepe mararamau ki drumane ka daane. Ku Sulumungu mialri pasikai ki taelrelreini ka lalake ki talialalai ki swa Izipiti tudaane ku thadalrane ku daane.

⁹ Patuelrenga kilakikai tatudaanane, twalai ki karwalai pakela ki tebetebane, niarakaiyane ku la takuciacingalre ka lrenege darepe, kikai lalrenege nipatwaladhane ki tatulrenegane singikainga ku taleketane tulrenege, ka niarakaiyanenga ku saridraidrane tuthariri kwini taliadringane si talilatadrane.

¹⁰ Kwini karwalai niarakaiyane ku tadradrau ka nitulrenegane karwalai, yakai ku 3.5 ka mituru ku lragiane, yakai ku 4 ka mituru ku lragiane.

¹¹ Ikai kai ki belenge yakai kudra singiakai ki taleketane ka nitulrenegane ku lrenege si bulri ka cedare ka angatu.

¹² Adravane ka daane ki talialalai, kalatadrane ki talidaane ki daane ki Twaumase, si ruka ki lrawlrawdru ki daane ki Tamatama niarakaiyane ku situlrulu ku nitulrenegane si pakacipi ku sivale ku bulri ki balingibingi ka angatu ka cedare ka angatu.

Kipakaungu ki Hurame

¹³ Ku talialalai ka Sulumungu la sikawlu mwa kavai cekele Tayre dawlu ki tangea ka sia Hurame kela.

¹⁴ Kwini lasu amani ku taradarepe ki lalawbubulu ka lriwlu. Ku tamaini swakai Tayre, mialri ka taradarepe ki lriwlu, ai wapacainga; ku tinaini laka talikai ki zuku ki Napetali. Kai Hurame malrigili turamuru si ka taradaredarepenga; kwini lasu la pukawnu kwini tadawlane iniane ki talialalai ka Sulumungu, kamani ku warathungu ki awngane patuelre ki ngwakai ki lriwlu.

Drusa ka ulrudru ka lriwlu

¹⁵ Ku Hurame la darepe ku drusa ka ulrudru ka lriwlu, kwini vaeva ku abelengane valru ka mituru, ku bitulrwane lrima ka mituru si tulru ka kuncunge, pacegecege pikai ki samamudaane ki daane ki Twaumase.

¹⁶ Kwini lasu la mialri darepe ku drusa ku nituringaringavane ku lriwlu ka ulrudru, ku abelengane drusa ka mituru si drusa ka kuncunge, la pasutelrai pikai ki karingavane ki ulrudru ka lriwlu.

¹⁷ Kwini vavaeva ka lriwlu ka ulrudru karingavane la pangiragelane ku makakalrivatha ku kicikici ka pacase

¹⁸ si sipusale ku lriwlu ka nginanavate.

¹⁹ Ku karingavane ki ulrudru ki ruka ki lrawlrawdru ku abelengane vaeva ka mituru si valru ka kuncunge, laka mia ki bariangalai,

²⁰ la pikai ki kicikici ka pacase belenge. La ikai ku 200 ku nginanavate ka nitusipusalane lripalripi ki vavaeva ki karingavane ka ulrudru.

²¹ Ku Hurame la malra kikai drusa ka lriwlu ka ulrudru cegecege pikai ki samamwa daane ki daane ki Twaumase; kwini yatali lrawdru sia Yakingi; ku yatali dradha sia Buaze.

²² Kwini ngiamia ki bariangalai ka karingavane ka ulrudru pikai ki karingavane ki lriwlu ka ulrudru. Ngimiyaiya kikai, ku tadarepane ku lriwlu ka ulrudru la tulrepenge ku awngane.

Lriwlu ka thalange

²³ Ku Hurame la darepe ku lrimemeteke ka lriwlu ka thalange, ku alrukulane drusa ka mituru si drusa ka kuncunge, ku ngwadravanane supate ka mituru si supate ka kuncunge, ku takalrimetekane 13 ka mituru si drusa ka kuncunge.

²⁴ Kikai lriwlu ka thalange kwini ki ngwababiabila tali latadrenga yai sipusale ku lriwlu ka taliwru, kikai bulavane ka taliwru si lriwlu ka thalange tara twalai ki vaeva ka lriwlu darepe.

²⁵ Kwini lriwlu ka thalange la pibelenge ki drelreke ki 12 ka lriwlu ka lwange; ku lringau ki lriwlu ka lwange la papulalatadre, ku tulru papia tali talrawane, ku tulru papia tali sapakalriwgu, ku tulru papia tali lrawdru si ku tulru papia tali dradha.

²⁶ Kwini lriwlu ka thalange ku kudremelrane pitu ka kunhunge si pararamau, kwini ngwababiabila mia ki babiabila ki kupu, nipacekane papacase ku gariti ki bariangalai. Kwini lriwlu ka thalange lri dulru mwa ku 40,000 ka kunsenge.

Tapaneneane ka lriwlu

²⁷ Ku Hurame la daarepenga ku mangeale ku tapaneneane ka lriwlu, ku vaeva ku lragiane vaeva ka mituru si valru ka kuncunge, ku ngulapane vaeva ka mituru si valru ka kuncunge. Ku ubelengane vaeva ka mituru si tulru ka kuncunge.

²⁸ Ku tapaneneane ngidraidralri ka sikake; kwini ki nidarepane tudralriane la ikai ku sapatalwane,

²⁹ ki belenge yakai ku nituraiyungane, sawvalai ka lwange, si Kirubime ka nipapacasane. Kwini ki tapatalwane belenge, amani ku tali awlru si tali drapale ki raiyungu si lwange, wauguthu ku tapapacasane ku pacase.

³⁰ Kwini vavaeva la paka supate ku lriwlu ka palridingi, kwini barate ki palridingi la mialri ka lriwlu. Kwini vaeva ki tali lebeane, laka supate ku lriwlu ka drapale paruthuku, kwini ki drapale la paceke pacase pawguthu ku tapapacasane ku pacase.

³¹ Ikai kwini ki vintange belenge yakai ku lrimemeteke ka tapatalwane, twalai ki ringaringau ki tapatalwane papubebelenge uguthu 45 ka kunhunge, papulelebe mwadringi 18 ka kunhunge, ku ngithalringulu yakaai ku nipapacasane ka paceke.

³² Ku taetale ki palridingi ku abelengane 66 ka kunhunge, ki tailebeane ki dralri. Kwini barate ki palridingi si tapaneneane ki kinawmasane tara twalai ki vaeva ka lriwlu alra darepe.

³³ Ku tangimiane ki palridingi mia ki palridingi ki rigi; kwini barate ki palridingi, babiabila ki palridingi, paruthuku ki palridingi si kabicelrakane ki palridingi nidarepane arakai ku lriwlu.

³⁴ Kwini lebe ki tapaneneneane ki vavaeeva suupate ku drapale pawlrudru; kikai ladrapale si tapaneneneane yai niarakaiyane ku lriwlu darepe patuelre.

³⁵ Kwini ki vaeva ki karingavane yakai ku vaeva ka 22 ka kunhunge ku sathalringulane ki babiabila. Ku drapale ki tapaneneneane, sadralriane ka lriwlu, taneneane ki kinawmasane niarakaiyane ku vaeva ka lriwlu darepe patuelre.

³⁶ Ku drapale si dralriane ka lriwlu nipapacasane ku raiyungu, abare si Kirubime, kwini ki kabicelrakane la ikaiyana ku nipapacasane ku pacase pangithalringulu.

³⁷ Kwini tapaneneneane ka lriwlu miyaiya kai ku tadarepane. Kwini vavaeva yai maramaramau ku tangimiamiane, la maramaraamau ku takadravane si takatikianane.

³⁸ Ku Hurame la daarepenga ku mangeale ku thalange ka lriwlu kwini ki vavaeva ka thalange ka lriwlu; ku ngulapane vaeva ka mituru si valru ka kuncunge, ku amwane mwadringi 800 ka kunsenge.

³⁹ Wamalra kwini lrima ka tapaneneneane ka lriwlu piakai tali lrawdru ki daane ki Twaumase, ku druma ku lrimanga piakai tali dradha, kwini thalange ka lriwlu piakai tali talrawane ki tali vanale ki daane ki Twaumase.

Taasipane ku lawbubulu ki daane ki Twaumase

^40-45 Ku Hurame la mialri darepe ku palungu, kadrau si kisi. Kwini lasu pasiakai ki talialalai ka Sulumungu patulrepengenga kudra kisudralruini ku akaungane ki daane ki Twaumase. Ku darepeini ku lalawbubulu nipacasane pikai lebe: Drusa ku ulrudru ka lriwlu, Nipikaiyane belenge ki ulrudru ka lriwlu turingaringau ka mia ki kisi, Belenge ki karingavane, nipakakalrivathane ku drusa ka kicikici ka pacase, 400 ku nginanavate, kwini ki vaeva ki karingavane ki ulrudru ku pacase nithalringulane ku sipusale ka nginanavate, kwini sivavale idaidai. Mangeale ka tapaneneneane ka lriwlu, Mangeale ka tarai ka lriwlu, Thalange ka lriwlu, Saparuthukane ki thalange ka lriwlu ka 12 ka sawvalai ka lwange ka lriwlu, Palungu, kadrau, kisi. Ku Hurame pasiakai ki Sulumungu ka talialalai darepe kikai lalawbubulu ki daane ki Twaumase niurathane paelelethe ka lriwlu darepe patuelre.

⁴⁶ Kikai lalamanemane patuelre singiakai ku tadrekasane ki talialalai, twalai tali Yuredange valrwalru ka Sukuthe si Zarethane ki tadaredarepane darepe.

⁴⁷ Ku talialalai ka Sulumungu kai patintingi ki umawmase kikai ki lalawbubulu ka lriwlu; asi lwiyane ngwalai ki kalrane turamuru, lakamani kwidra latelregane kai maka asipi.

⁴⁸ Ku Sulumungu la mialri padarepeana ki umawmase ku kingi ka lawbubulu pasikai ki daane ki Tamatama: Yakai ku kingi ka tapatarumaramarane, tapikaikaiyane ku pange ka cukwi,

⁴⁹ ku nipacegecegane icucubungu ki Alrivilriviilrivinga ka taikaikaiyane ku mangeale ka tatinakiane (lrima ku yatali lrawdru, lrima ku yatali dradha), bengelrai, tinaki, kacipi ki apwi,

⁵⁰ tarai, kaciane ki rusuku, kisi, usara ka tapikaiyane ku sangwalreme, tapikaikaiyane ki lrangele ka vintange; kilakikai lawbubulu patuelre, niarakaiyane ku kingi darepe. La ikaiyane ku sadrukudrukurane ki lrawlrawdru ki Alrivilriviilrivinga ka taikaikaiyane, si tali latadre ki lrawlrawdru ki daane ki Twaumase, kikai lalawbubulu niarakaiyane ku kingi cabu patuelre.

⁵¹ Ku talialalai ka Sulumungu twalrepengenga patuelre ku atudaanane ku daane ki Twaumase, ala malra kwini patarumara ki tamaini ka Davidi ki Tamatama ku kingi gingi si drumane ka lawbubulu patuelre pwa ki drawsulu ki daane ki Twaumase.