1 Latalialalai 6 - Ngudradreadrekadhane Ka Sisiu 魯凱語聖經

Twadaane ku daane ki Twaumase ku Sulumungu

¹ Satara 480 ka caili ku takatwasane Izipiti ki swa Iseraylri, saka tarasupate ka caili si drusa ka dramare, ka amani kudra Zivu ka dramare, ku taatalialaladhane ki Sulumungu ki swa Iseraylri, ku Sulumungu pathagili tudaane ku daane ki Tamatama.

² Ku taliadringi ki daane ki Twaumase ku lragiane 27 ka mituru, ku ngulapane bangate ka mituru, ku abelengane 13.5 ka mituru.

³ Ku samamwa daane ku ruka ki lrawlrawdru ku mwadringane supate si apararamau ka mituru, ku ngulapane bangate ka mituru, mararamau ki Alrivilrivi ka taikaikaiyane ku ngulapane.

⁴ Ki daane ki Twaumase yakai ku lribange ki balingibingi; ku lribange ku talilatadre titikiane, ku taliadringane madradrau.

⁵ Kwini sakai ki balingibingi talilatadrane, ikai ki thili si lrilrikudru ki daane ki Twaumase, la tudaane tulrisu matataetaetale ku situlrulu, kwini sivaale ku abelengane drusa ka mituru si ikaai.

⁶ Kwini salelebenga ka tinulriswane taluvavale ku ngulapane drusa ka mituru si drusa ka kuncunge; kwini sakabicelrakane ka lrisu ku ngulapane drusa ka mituru si pitu ka kuncunge; ku sabebelengenga ku lrisu ku ngulapane tulru ka mituru si vaeva ka kuncunge. Kwini balingibingi ki daane ki Tamatama laka malubibiri ki salelebe; lu ngimia kikai, lri dulru maka pikai ku tapeapecane belenge ki balingibingi, kai kirimu arakaiyana ku bulri pikai ki balingibingi.

⁷ Ku saarakaiyane ku lalrenege yai nitulrenegane ikai ki tatulrenelrenegane, lakamani kudra satudadaane ku elrange ki pangulru, kumugu, si kudra tapangepangane ki laadreme kai akilalranenga.

⁸ Kwini ki lrisu ki salelebenga ku samamudaane yakai ki tali lrawdru ki daane ki Twaumase, la ikai ku tataetaetale ku samamwa belenge ki mwasakadrusa si mwasakatulru, mwa ki mwasakadrusa si mwasakatulru.

⁹ Ku talialalai ka Sulumungu la tulrepengenga ku tudaaneini ku daane ki Twaumase. Kwini lasu arakai ku cedare ka angatu tubulri si tubaliali.

¹⁰ Kwini situlrulu ka lrisu, kwini ki vaeva laka drusa ka mituru si drusa ka kuncunge ku abelengane, ka nipasutalwane ki balingibingi tali latadrane ki daane ki Twaumase, la arakai ku cedare ka angatu ka bulri pacacungulu pikai belenge ki balingibingi.

¹¹ Ku Tamatama la kawriva ki Sulumungu,

¹² “Lwiyasi la paluludusu kai hulrice si drekaseli, lri tara pangimiaku kudra pukawnungali ki tamasu ka Davidi.

¹³ Lri ikaiyaku ki tatudaananesu ka daaneli, ikai ki lakawkawluli, palralrawthu kai cilri liniane.”

¹⁴ La ngimia kikai, ku Sulumungu la tulrepenge ku tudaaneini ku daane ki Twaumase.

Pwadriadringai ki talidaane ki daane ki Twaumase

¹⁵ Talidaane ki daane ki Tamatama twalai ki daedae kela ki baliali, niarakaiyane ku cedare ka angatu kedrekedre patuelre; ku draidralri arakai ku alrenge sapa.

¹⁶ Yakai ku sadadaane ku kadaanane, amani kudra Alrivilriviilrivinga ka taikaikaiyane, nitudaanane pikai talilrilrikudru ki adringi daane ki daane ki Twaumase, ku lragiane bangate ka mituru; twalai ki draidralri kela ki baliali laka niarakaiyane ku cedare ka angatu tusagisane.

¹⁷ Kwini swadradrau ka kadaanane ku lragiane 18 ka mituru.

¹⁸ Kwini cedare ka angatu ka bali laka nipapacasane tutaliwru si bengelrai. Palraelre kwini talidaane ki daane ki Twaumase niarakaiyane ku cedare ka angatu tusapaidringane, la kai adrelanenga ku taraedrane ku lrenege ki balingibingi ki daane ki Tamatama.

¹⁹ La pikai ki talilrilrikudru ki tali daane ki daane ki Twaumase tudaane ku taluvale ku sadadaane ka daane; ku Langiane ki Tamatama la pikai kwini.

²⁰ Kikai sadadaane ka kadanane ku lragiane bangate ka mituru, ku ngulapane bangate ka mituru, ku abelengane bangate ka mituru, niarakaiyane ku kakingiane padakipi patuelre. Ku tapatarumaramarane ki sangwalreme arakai ku cedare ka angatu ka bali cabu.

²¹ Ku taliadringi ki daane ki Twaumase niarakaiyane ku kingi padakipi, la kelrai ku silu ka kingi pikai ki samamudaane ki sadriadringi ka daane; kikai lrawlrawdru mialri arakai ku kingi padakipi.

²² Palraelrenga ki talidaane ki daane ki Twaumase niarakaiyane ku kingi padakipi patuelre, mararaamau ki Alrivilriviilrivinga ka taikaikaiyane ka tapatarumaramarane ki sangwalreme.

²³ Kwini lasu la malra ku niarakaiyane ku ulrive tu Kirubime pikai ki Alrivilriviilrivinga ka taikaikaiyane, kwini ki vaeva ku abelengane supate ka mituru si supate ka kuncunge.

^24-26 Kwini drusa ka Kirubime ku adravane si tangimiamiane mararaamau, tara drusa ku sapakepake, ku lragiane ki sapakepake drusa ka mituru si drusa ka kuncunge. Lakamani kwidra, twalai kwini ki ringaringau ki sapakepake kela ki ecebane ki ringaringau ki sapakepake supate ka mituru si supate ka kuncunge.

²⁷ Kwini lalasu la malra palalapiri pikai ki Alrivilriviilrivinga ka taikaikaiyane; laka ngimiyaiya kai, kwini tangipaipadhane ki sapakepake la madradresenge matatakela ikai kwini ki kabicelrakane ki kadaanane, ku drumane ku sapakepake la daruru ki maecebe ki balingibingi.

²⁸ Kikai drusa ka Kirubime niarakaiyane ku kingi cabu.

²⁹ Kwini swadradrau ka kadaanane si sadadaane ka kadanane ku balingibingi nipapacasane ku Kirubime, ku abare, si bengelrai.

³⁰ Ku dralri arakai ku kingi padakipi.

³¹ Ku samamudaane ki Alrivilriviilrivinga ka taikaikaiyane yakai ku drusa ku saelelebane ka ulrive. Kwini tali sulripi ki lrawlrawdru laka thithiwdu ka nibalrikakungane,

³² kwini lrawlrawdru nipapacasane ku Kirubime, abare, si bengelrai; kikai lrawlrawdru si Kirubime si abare niarakaiyane ku kingi cabu.

³³ Ki samamudaane ki swadradrau ka kadaanane laka niarakaiyane ku ulrive tusapatalwane ki lrawlrawdru.

³⁴ Kwini drusa ka nicikicikipane ka saelelebane niarakaiyane ku alrenge ka angatu darepe,

³⁵ kwini belenge laka nipapacasane tu Kirubime, abare si bengelrai; niarakaiyane ku kingi paramaraamau cabu.

³⁶ Kwi lasu la arakai ku situlrulu ku raedre ka lrenege, si cedare ka angatu ka bulri darepe ku sadadaane.

³⁷ Sacegecege ku karwalai ki daane ki Twaumase yai, amani saka tarasupate ka caili si drusa ka dramare ku taatalialaladhane ki Sulumungu ka amani kudra Zivu ka dramare.

³⁸ Ku taatalialaladhane ki Sulumungu saka tara 11 ka caili si valru ka dramare, amani kudra Bule ka dramare, kwini daane ki Twaumase pangialrau ku takikakane ka apangimiane tulrepenge tudaane. Ku Sulumungu arakai ku nitarapitwane ka caili ala patulrepenge kwini tatudaanane ku daane ki Twaumase.