1 Latalialalai 5 - Ngudradreadrekadhane Ka Sisiu 魯凱語聖經

Padulru ku atudaanane ku daane ki Twaumase ku Sulumungu

¹ Ku Hirame ka talialalai ki swa Tayre amani ku talragi ki Davidi; kwini lasu sa kilalra ala ka mwacungulu ki tamaini ka Davidi atalialalainga, la sikawlu ku wamwa kikawriva ki Sulumungu.

² La patubalre ku Sulumungu ki Hirame,

³ “Wathingalesu ku ama ka Davidi kai maka pasiakai ki Tamatama ka Twaumaseini tudaane ku daane ki Tamatama, asi lwiyane kai watelrai ku amakakaruburane ki ngiathalringulu ka labadha. Lu maka pamalebenga nguelre ki labadha lri maka dulru tudaane ku daane ki Twaumase.

⁴ Kikainga, ku Tamatama ka Twaumaseli pakasulivatenga kai ki ngiathalringulu; kadrwa ku badhali, la kainaku mukuludru ki umawmase kela kikaruburu.

⁵ Ku Tamatama napwakawnunga ki ama ka Davidi iya kai, ‘Lri pakamaniaku kudra ki lri ucungulu muswane atalialalai ka lalakesu pasikai nakwane tudaane ku daane ki Twaumase’. Lakamani, malrithethenga naku ku twadaane ku daane ki Twaumase, si kela sukubu ki Tamatama ka Twaumaseli.

⁶ Ala sikawla ku umawmasesu animwa kavai Lebanungu pasikai nakwane pulebe ku cedare ka angatu. Kai talikaili ku umawmase lri mwa karedele ki sikawlusu ka laumawmase kaungu; lri mialriaku singikai ku takelretanesu ku sapawlrawlravane baai ki pakauawngusu. Wathingalesu, kunai kai nai ka paramia numiane ka swa Sidune kalrigili pulebe ku angatu.”

⁷ Ku Hirame sa kilalra ku pakainganai ki Sulumungu ku vaga, kiararagai turamuru; la iya kai, “Ku Tamatama anikidrengedrengere kaikameane! Patarumara ki Davidi ku miyaiya kai kalrigili ku lalake marasikai rathudu ki saniange ka minzuku!”

⁸ Ku Hirame la patubalre ki Sulumungu, “Tarwamaranga naku ku pakainganaisu ku vaga; lri padulrwaku singikai ku murikaisu baai ku cedare ka angatu si alrenge ka angatu.

⁹ Kai tarakaungu nakwane lri patwalai Lebanungu malra ku angatu salri pangukai ki laveke, apaererece sapiti, pakipelai mwa kwidra ki pakakaiya kwini ku taiyanesu. Ku tarakaungu nakwane lri ikai kwini muerece kwini nipakasapitane ka angatu, si patarumara ki tarakaungu muswane marasikainga. Ala ku talikaisu, anikamani ka wabaai ku akaneane ki tarakauawngu nakwane.”

¹⁰ Ku Hirame la singikai ku tamurikaiyane ki Sulumungu baai ku cedare ka angatu si alrenge ka angatu;

¹¹ ku Sulumungu lukacaili wabaai ki Hirame ku 2,000 kuntungu ku mugi si 400,000 ka kunsenge ku kalawlavane ki ulrive, tusakanekaneane ki tarakauawngu iniane.

¹² Ku Tamatama la pangimia ku pukawnungaini, patarumara ki Sulumungu ku lrigilane. Ku Hirame si Sulumungu la makakadalru, si pacase ku samakaketeketane.

¹³ Ku talialalai ka Sulumungu la patwalai ki swa Iseraylri dawlu ku ta 30,000 ku tarakaungu,

¹⁴ la sikawlu ki Adunirame marasikai liniane. Kwini lalasu la malra liniane pautulru, ku taingeane ta 10,000 ku umawmase. Ku taingeane yakai Lebanungu taradramare, la ikai tavanane taradrusa ka dramare.

¹⁵ Ku Sulumungu la sikawlu ku ta 80,000 ku yakai lregelrege tulrenelrenege, ta 70,000 ku wasalrisalri,

¹⁶ la ikai ku ta 3,300 ku tarakadrekadrenge liniane.

¹⁷ Kwini lalasu singiakai ku drekase ki talialalai ka Sulumungu ka talialalai tulrenege ku tinukucingalrane ka maadrau ka lrenege, tusakarwaladhane ki daane ki Twaumase.

¹⁸ Ku taratudaane ki Sulumungu si Hirame si twalai cekele Gebale ku umawmase, la padulru ku lrenege si angatu, si tudaane ku daane ki Twaumase.