1 Latalialalai 4 - Ngudradreadrekadhane Ka Sisiu 魯凱語聖經

Lakiacapicapili ki Sulumungu

¹ Ku Sulumungu talialalai ki swa Iseraylri patuelre;

² ku nagane ki lakiacapicapilini amani kikai lanipacasane ilebe: Abebeelengenga ki barakalai: Azaria ka lalake ki Zaduke

³ Tarapacase ikai ki daane ki talialalai: Ilehurepe si Ahiya ka lalake ki Sisa Taramarasikai ki lrikisi: Yehusapate ka lalake ki Ahilude.

⁴ Tararathudu ki kwapingi: Binaia ka lalake ki Yehuiada Barakalai, Zaduke si Abiathare

⁵ Tamatama ki kunkwane: Azaria ka lalake ki Nathange Takivagane ikai ki daane ki talialalai: Barakalai ka Zabude lalake ki Nathange.

⁶ Tarakadrenge ki lasasiakawlu: Ahisare Tarakadrenge ki la tarakawaungu: Adunirame ka lalake ki Abeda.

⁷ Ku Sulumungu siakawlu sudralru ku ta 12 ku umawmase ikai ki swa Iseraylri ki cacekele atamatama ki kunkwane. Kwini lalasu lri tara patwalai kwini ki lataikaiyane lini rathudu malra si baai ku lataleke ku sacekecekelane ki talialalai si lawacekecekele ki talialalai; kwini latamatama ki kunkwane ki lacacekele lukacaili lri tara dramare marasikai.

⁸ Kilakikai tai 12 ka latabebelenge si la tarathudane lini nipacasane pikai lebe: Bine Hure: Tali lregelrege Iparaime.

⁹ Binedekere: Cekele Makaze, Salebime, Bithe Simise, Ilune, Bithe Hanane.

¹⁰ Bine Hesede: Cekele Arubebuthe si Suku, si palraelre ka talikai Hepere

¹¹ Binabinadabe ka wamwa ki Tapathe ka lalake ki Sulumungu: Palraelre Dure.

¹² Baana ka lalake ki Ahilude: Cekele Tanake si Migidu, si palraelre talikai lrawdru ka adeethe Bithe Sane, Zarethane, si Yezerile, daruru ka cekele Abele Mehula si Yukemiame.

¹³ Bine Gebere: Cekele Ramuthe kavai Gileade, si lacekele ki zuku ki Yaire ka lagane ki Manase, si talikai Aregube kavai Basane, palraelrenga talumanemele ku tadradrau ka cekele, makitu yakai ku alradre ki cekele si lriwlu ka sadrukurane ki lrawlrawdru ki cekele.

¹⁴ Ahinadabe ka lalake ki Idu: Talikai Mahanaime.

¹⁵ Ahimaze, wamwa ki tangea ki ababai ka lalake ki Sulumungu ka Basemathe: Talikai Napetali.

¹⁶ Baana ka lalake ki Husai: Cekele Asere si Bialuthe.

¹⁷ Yehusapate ka lalake ki Parua: Talikai Isakare.

¹⁸ Simi ka lalake ki Ila: Talikai Biniyamingi.

¹⁹ Gibere ka lalake ki Uri: Talikai Gileade, ka amani kudra sakanadruma ku tarathudane ki Sihunge ka talialalai ka Amuri si Uge ka talialalai ka Basane. Lakai kakathane kikai talu 12, yakaiyana ku tamatama ki kunkwane ka warathudu elreelrenga.

Tangiradhekanane ki Sulumungu

²⁰ Ku pangalane ku umawmase ki swa Yuda si swa Iseraylri mia ki enai ku kalrane. Kwini lalasu yakai ku akaneane yakai ku awngulane, kiararagai turamuru.

²¹ Kudra swakai ki kuni ki Sulumungu paelre twalai ka kadravane ka Yuparati kela kavai Pelisitine si pagisane ki Izipiti sanaka kuni. Ku vai ku taikaiyane kawmasane ki Sulumungu, kwini lalasu wakela bulri tuswalupu, pasalaladha iniane.

²² Ku Sulumungu ki vaivai tara arakai ku 5,000 ka kunsenge ku lamenge ka milrikinku, kudrai ka kunsenge ku culrusu ka milrikinku,

²³ mangeale ku yatalwangane ku lwange ka taricucuru ku talapwane, mapusale ku yatalapulapwane latadrane ku taricucuru ku lwange, idai ku nikiubawbalane ku kiu; la ikaiyana ku salawngane, maelrelrenge ku lawngu ka kisisi, cance si nilapulapwane ka lakuka.

²⁴ Ku Sulumungu warathudu sanaka kadaengane ki tali sapakalriwgu kavai kadravane Yuparati, twalai Tipesa kavai Yuparati daruru cekele Gaza ki sakaikainga sapakalriwgu. Sanaka talialalai ki swa tali sapakalriwgu ka kadravane Yuparati makitwa pasalaladhanga iniane; la mialri makadawdalru ki la ngwadadethe ka lakuni.

²⁵ Ku taikaiyananeini kawmasane, palraelre ki swa Yuda si swa Iseraylri masulivaliivate ku vai lini, ku dadaanane twalai ki sadradradhanga ka Dange kela kavai salrawlrawdrunga ka Bereseba yakaai ku budu si icizike lini makanaelre.

²⁶ Ikai ki tarigiane ki Sulumungu yakai ku 40,000 ku rigi ka tarabilibili ki sakikaruburuburane ka palridingi si 12,000 ka kudrulu ku sakikaruburuburane ka rigi.

²⁷ Kudra talu 12 ku latamatama ki kunkwane singiakai ki dramare marasikai baai ku akaneane ki talialalai ka Sulumungu si yakai ki daane ki talialalai, kadrwa ku takauramane.

²⁸ Kwini talinunga ku latamatama ki kunkwane la mialri baai kudra naika abaadhane ku madradrau ka mugi si rudame ka ubulu baai kwidra ki sanaka mwarikaai, arakai pakane lapu ki sakikaruburuburane ka rigi si sapakauawngane ka lanilapulapwane.

²⁹ Ku Twaumase patarwamara ki Sulumungu ku palrealrebane ku lrigilane, thingalane, si kadrwa ku lri kiramau ku tathingalane.

³⁰ Ku lrigilane ki Sulumungu sialribate ki lrigilane ki la swa talikai talrawane si swa Izipiti.

³¹ Kwini lasu malrilrigilinga ki sanaka umawmase, walribate ki talrilrigili ki Itane ka swa Izera, ki Hemange, Kalekule, Dareda ka lalake ki Mahule. Ku naganeini kiamapelaelanga ki ngwadadethe ka lakuni.

³² Kai lasu la pacase ku niaku 3,000 ku kavagavagane si 1,005 ku senai.

³³ Kai lasu matiakai ki laangatu ki labengelrai ubulu, twalai Lebanungu ka cedare ka angatu pakela ki wacebe ikai ki raedre ka buraburu, la matikai ki laadhadhame, labulabulai, ki lawagulagulai, si lakange.

³⁴ Ku sanaka latalialalai ki lakuni makitwa kilalra ku lrigilaneini, la sikawlu ki umawmase mwa kilalalra ku lrigilaneini ku takawrivane.