1 Latalialalai 3 - Ngudradreadrekadhane Ka Sisiu 魯凱語聖經

Kiatubi ku lrigilane ku Sulumungu

¹ Ku Sulumungu si talialalai ki swa Izipiti matwatalragi, si mwa karudrange ki lalake ki talialalai ki swa Izipiti. Sakaiyana tudaane ku daane ki talialalai, si daane ki Tamatama, si alradre ki cekele Yerusalrime, kwi lasu payakaikaaiyana kavai cekele ki Davidi kwini ki lalake ki talialalai ki swa Izipiti.

² Sakaiyana tudaane ku daane ki Tamatama, ku mapapangale yakaaiyana ki makaelaela ka tapatarumaramarane patarumaramara.

³ Ku Sulumungu mwasakene kilibake ki Tamatama, paluludu ku tabulrwane ki tamaini ka Davidi, ai kwini lasu thadalraneana ikai kidruanga ki tapatarumaramarane patarumara ku waudriwdripi si lama ku sangwalreme.

⁴ Yakai saka kiningivalane, ku talialalai ka Sulumungu la mwa ka Gibiungu patarumara, asi lwiyane yakai kavai kwidra nimatikaikaiyane ka tapatarumaramarane. Kwi lasu nayakainga kwini patarumara ku thathatha ku Lama ka lrisi.

⁵ Kwini sakamaungu, ku Tamatama la adrelane iniane ikai ki sipi, la kivaga iniane, “Ala pelaelaili, ani baai nakwane ku manemane amiasu nakwane?”

⁶ La tubalre ku Sulumungu, “Takathalradhanesu ki sasiakawlusu ki ama ka Davidi, ngwalai kudra tasavaevane ku kidremedreme papia muswane, twakapatengatengane la alrivilrivi ku kidremedremeini. La kaisu telrai ku abaadhane liniane ku madrau turamuru ku sakialibake, patarumarasu iniane ku vaeva ku lalake, kaikameane wanenenga ikai ki taetalaneini atalialalai.

⁷ Tamatama ka Twaumaseli, unu vavalakeanaku, kaithingale ku apangimiane rathudu ki kuni, la pawcungulwanasu nakwane ki ama atalialalai.

⁸ Kikai yakaiyaku ki pilrisu ngitatu kawkawlu ka umawmase atalialalai; ku kalrane lini kaika amaka asiasipane.

⁹ Lakamani kwidra, kiatubiaku muswane badhaili ku lrigilane, la nau dulru arakai ku dringelresane si aparamaramavane rathudu liniane. Lu kai ngimia kwini, lri tumanaku dulru rathudu ki tatha kai ki laumawmasesu?”

¹⁰ Ku Tamatama kiaragai ku kitubi ki Sulumungu,

¹¹ la iya kai iniane, “Asi lwiyane kaisu ngiapapasikai kitubi ku akalragiane ku niakesu, kitubi ku asatacekecekelanane, la kaisu kitubi ku papakamudane ki labadha, kiatubilringasu ku lrigilane, pakai ku aparamaramavane rathudu ki mapapangale,

¹² palraingaku singikai kwini kitubisu baai muswane. Lri badhaku muswane ku walribate sanaka aneanenga ku thingalane si lrigilane, kikai lrigilane yai, kadrwana ku miyaiya kai ki aswalalalala, lukabilrilanenga ku umawmase lai kai lri ikai.

¹³ Ku kaika kitubisu, lri mialriaku baai muswane; ku akisupilranesu ikai ki tapanianianiakanesu ku ngiesadhanane lrika silrialribate ki sanaka atalialalai ku kalrane.

¹⁴ Alaiyasi pasalaladhasu nakwane, paluludu kai hulrice si drekaseli, mia ki tamasu ka Davidi, lri pakalragiaku ku niakesu.”

¹⁵ Sapacunu ku Sulumungu, la thingale ku Twaumase adrelane ikai ki sipi kawriva iniane. Ala katwase siwlri mwa Yerusalrime, acegecege icucubungu ki Langiane ki Tamatama, si patarumara ku Lama ka lrisi si Sulivatane ka lrisi, ala pangitaleke ki lakiacapicapilini makanaelre.

Twarathudane ku lamakucingalre ku rivwane ku Sulumungu

¹⁶ Yakai saka minakavalane, la ikai ku tadrusa ku pairairange la kela drele ki talialalai ka Sulumungu, acegecege icucubungu iniane.

¹⁷ La kawriva ku tangea, “Talialalai, kikai ababai kikai taelre nai ikai ki vaeva ka daane; sa tulalalakaku ikai tavanane, kikai alisu la ikai kwini.

¹⁸ Twalalakaku ku vaeva ku sawvalai; samaka pusalenga ka alisu la mialri tulalake ku vaeva ku sawvalai. Kikai daane kathane nai ka tadrwadrusa, kadrwa ku palrapalra.

¹⁹ Yakai sakamaungu, kikai alisu la kai dradredrele la drepete ki lalakeini.

²⁰ Kai alisu la ngidrakale saka kabiceacelrakane, sa kasipelrengaku la malra kwini ki yathili nakwane ka lalakeli, si kebere, ala malra kwini ki wapacainga ka lalakeini pwa nakwane.

²¹ Sakakaiyane ki mialrealre, sa pacunaku si nau pathuthu iya ki lalakeli, la drelaku ala pacainga; la pudriadringadhaku drele, kwini lrulai ala kaika lalakeli.”

²² Kwini tangea ka ababai la kawriva, “Ini! Kwini panianianiake ka lalake nakwane, kwini wapacai muswane!” Kwini aswalala ka ababai la tubalre, “Ini! Kwini wapacai lalakesu, kwini panianianiake ala amani ku lalakeli!” Kwini lamali la icucubungu ki talialalai makakarivu.

²³ Ku talialalai ka Sulumungu la kidredreme, “Kikai tadrusa lalakeli kwini panianianiake tara amiamia, kwini wapacai lalakeini la iya.”

²⁴ La iya kai, “Ta baadhaili ku vaeva ku lrabu la iya!” Kwini sasiakawluini la malra ku lrabu mudaane,

²⁵ ku talialalai la drekase, “Malra kwini ki panianianiake ka lrulai cukare paudrusa, ku pararamau baadha kai ki ababai, ku pararamau la baadha kavai ki ababai.”

²⁶ Kwini tina ki panianianiake ka lrulai ngwalai ki thalradhane kakuru ki lalakeini, la kawriva ki talialalai, “Talialalai, madha papacapacai kai ki lrulai, lri kitubiaku muswane badhanga kavai ki alisu!” Ai kwini tangea ka ababai la kawariva, “Madha babaai nakwane, la madha babaai kavai ki alisu; pwa cukare kai ki lrulai!”

²⁷ Ku talialalai ka Sulumungu la kawriva, “Madha papacapacai kai ki lrulai! Malra si baai kavai ki aswalala ka ababai, asi lwiyane ka alisu amani ku tengatengane ka tina kai ki lrulai.”

²⁸ Ku swa Iseraylri sa kilalra ku tapangimiane turathudane ki talialalai ka Sulumungu la makitu drengedrengere iniane; asi lwiyane kwini lalasu wathingale ku Twaumase patarwamara iniane ku lrigilane, dulru arakai ku aparamaramavane turathudane ki larivwane.