1 Latalialalai 2 - Ngudradreadrekadhane Ka Sisiu 魯凱語聖經

Taalriwlriane ki Davidi ki Sulumungu

¹ Sa lripadalrunga si pacai ku Davidi, wacunu ki lalakeini ka Sulumungu iya kai,

² “Kudra akatwasaneli kikai kawmasane wadarurunga, la kakecenga, pasawvaladhane.

³ Kusu paluluda ku drekase ki Tamatama ka Twaumasesu, pasalaladha patuelre sanaka hulrice ka padradrekaseini, ka amani kwidra nipacasane ka drekase pikai ki hungu ki hulrice ki Musi. Lumia kikai, adravane lu papiasu inukidruanga, sanaka tatumananesu singibila lri tara pangiesaisu.

⁴ Alaiyasi la pasalaladhasu ki Tamatama, lri tara pasusu kudra takiketeketane ku vagaini, iya kai ku mwabaibalrithi nakwane sana pasalaladha ku drekaseini, savaeva ku kidremedreme papia iniane, lri kawlai rathudu ki swa Iseraylri.

⁵ “Yakai ku taingeane. Wathingalesu ku Yuabe papacai ki tadrusa ka tamatama ki kwapingi ki swa Iseraylri ka Abinere ka lalake ki Nere si Amasa ka lalake ki Yethere. Kusu tarapulringava, kwini lasu papacai liniane ikai saka kadrwa ku makaruruburane, pangimia ki kiakaruburuburu pwapapacai. Kwini lasu papacai ki kadrwa ku capilane ka umawmase, la kamaniaku ka kiacapili kwini tapianeini, si kwalri ku tangimiane kikai tapianeini.

⁶ Wathingalesu ku apangimiane, madha pakasulivalivate iniane ku talikaiyaneini kawmasane pacai.

⁷ “Kusu tara pudriadringaadha sirapale ki lalake ki Barezilai ka swa Gileade, sirapala liniane; asi lwiyane sa mubeberaku ki taka ka Abesalrume, kwini lalasu saniange ku kilibakane nakwane.

⁸ “Yakaaiyana, ku Bahurime ka swakai ki Biniyamingi, Simi ka lalake ki Gira; sa papiapia kavai Mahanaime, kwini lasu magirimucu kaelaela pusu nakwane. Ai, sakabilrilinga sa kela kadravane Yuredange kidredresenge nakwane, papiaku ki nagane ki Tamatama kiketekete kainaku lri papacai iniane iya.

⁹ Ai kusu madha pangilralrailraingi iniane ki tinukakudhanane. Malrigilisu, wathingalesu ku apangimiane; tara kidremedrema ku apangimiane papacai iniane.”

Tapacadhane ki Davidi

¹⁰ Ku Davidi la pacai, la kidralreke pikai ki cekele ki Davidi.

¹¹ Kwini lasu ku takatalialaladhaneini ki swa Iseraylri taramasupatele ka caili: Tarapitu ka caili ikai Hiburungu, tara 33 ikai Yerusalrime.

¹² Ku Sulumungu mwacungulu ki tamaini ka Davidi atalialalai; ku puku ki kunini mapapedrenge turamuru.

Tapacadhane ki Adunia

¹³ Sakabilrilinga, ku Aduniya ka lalake ki Hagithe la mwa kikawriva ki Batheseba ka tina ki Sulumungu. Ku Batheseba la kivaga iniane, “Kikai kelasu ngwakaisu ki mathaithariri kela ngulatatadre?” Kwini lasu la tubalre, “Unu” la iya.

¹⁴ Ala iya kai, “Yakai kai taingeane kai akitubianeli muswane.” Ku Batheseba la kawriva, “Ani kawriva.”

¹⁵ Ku Adunia la kawriva, “Wathingalesu naika atalialaladhaku; kai swa Iseraylri makanaelre la sidrama anikamani ku atalialalai iya nakwane. Ai kudra tangimianenga kai ngimianga kikai; kai agili amaninga ka atalialalai, asi lwiyane kikai twalai ki kidremedreme ki Tamatama.

¹⁶ Kikai yakai kai vaeva kai akitubianeli, madha pasiwlriwlri.” Ku Batheseba la kivaga, “Laka manemane?”

¹⁷ Ku Adunia la iya kai, “Ala pasikaiyaili kitubi ki Sulumungu ka talialalai lani malra kavai ki swa Suneme ka ababai ka Abisage baai nakwane tutaelrelreli; wathingalaku kai lri pakaicilri muswane.”

¹⁸ Ku Batheseba la iya kai, “Mathariri! Nau atalingikaiyane muswane mwa ki talialalai ki tubi.”

¹⁹ Ku Batheseba la mwa kikawriva ki talialalai, pasikai ki Aduniya mwa kitubi ki talialalai. Ku talialalai la acegecege sukubu ki tinaini, ala nene ikai ki taetalaneini, la papadulru ku vaeva ku taneneane ikai ki vanaleini, panene ki tinaini.

²⁰ La kawriva ku Batheseba, “Yakai kai vaeva kai tikiane kai akitubianeli muswane, la madha pasiwlriwlri tara tarumaraili.” Ku talialalai la kivaga, “Ina, laka manemane? Kainaku lri pasiwlri.”

²¹ Ku Batheseba la kawriva, “Malra kavai ki alisu ka Abisage baai pasitaelrelre ki taka ka Aduniya.”

²² Ku talialalai amia kai, “Asu kirimu malra iya nakwane ki Abisage si baai iniane? Naika maesaesai badhanga kwini taetalane ki talialalai iniane iya. Ka lasu yai kaka, yakai ku barakalai ka Abiathare si Yuabe ku palakelakebe iniane!”

²³ Ku Sulumungu la papia ki nagane ki Tamatama kiketekete, “Lwiyasi la kainaku malra ku niake ki Aduniya tusabalrithane kai takitubiane, ku Twaumase anipapacai nakwane!

²⁴ Ku Tamatama wapilringa nakwane, si pakapapedrenge sutelrainga naku nene ikai ki taetalane ki ama ka Davidi, la puvaganga baai nakwane si mwabaibalrithi nakwane kikai kuni. Lri papiaku ki palralrawthu panianiake ka Tamatama kiketekete, ku Aduniya kaikameane lutumane lri tara paacai!”

²⁵ Ku Sulumungu la drekase ki Binaia ka lalake ki Yehuiada; ku Binaia la mwa papacai ki Aduniya.

Tapacadhane ki Abiathare si Yuabe

²⁶ Ku Sulumungu ka talialalai la kawriva ki barakalai ka Abiathare, “Lu siwlria mubalriu ki cekelesu kavai Anatute! Naika kiapapacaisu, ai kikai kainaku lri papacai muswane; asi lwiyane yakaisu ki zidai ki ama ka Davidi ka natarabulribulri ku Langiane ki abebeelengenga ka Tamatama, la natwapapalrasu ki ama ngilribate ku akwalriane.”

²⁷ Ku Sulumungu la mwalra papisadra ku awngane ki Abiathare, kai palraingi iniane abarakalai ki Tamatama. Kikai ngiamianga kudra natakawrivane ki Tamatama ikai Selu pangukai ki barakalai ka Ilri si lamwabaibalrithi iniane.

²⁸ Sakilalra ku Yuabe kudra tangimiane la katwase mubere mwa kwini ki tapikaiyane ku Langiane ka Alrivilrivi ka balrawbau, la kirecenge ki piyu ki tapatarumaramarane. (Unu kai pwasakai ki Abesalrume, ai pwasakai ki Aduniya.)

²⁹ Sakilalra ku Sulumungu ka talialalai, mwabere ku Yuabe mwa kavai ki tapikaiyane ki Langiane ka Alrivilrivi ka balrawbau, kialepenge ikai ki thili ki tapatarumaramarane iya, ku Sulumungu la sikawlu ku umawmase mwa kivaga ki Yuabe, asu mubere mwa kavai ki tapatarumaramarane. Ku Yuabe la iya kai, ku ubereli mwa ki Tamatama kavai mwakuludraku ki Sulumungu. Lakamani, ku Sulumungu ka talialalai la sikawlu ki Binaia mwa papacai ki Yuabe.

³⁰ Ku Binaia la katwase mwa ki tapikaiyane ki Langiane ka Alrivilrivi ka balrawbau, la kawriva ki Yuabe, “Ku talialalai bwala ulatadra amia muswane!” Ku Yuabe la iya kai, “Ini! Lri pacadhaku ikai kai.” Ku Binaia la siwlri mwa ki talialalai, pelaela ki talialalai kudra taiyane ki Yuabe.

³¹ Ku Sulumungu amia kai, “Singikaiya ku vaga ki Yuabe papacai iniane, la dralreke iniane. Kunaku si sanaka aneanenga ku lamwabaibalrithi ki ama ka Davidi, kai lri pasikainga kicapili ku pasalrivane ku tapapacadhane ki Yuabe ki kadrwa ku pasalrivane ka umawmase.

³² Ku Tamatama pangiakakamani ki Yuabe siamece kwini kiame ku tapapacadhanesu ki umawmase, asi lwiyane kwini lasu kiabubuli ki ama ka Davidi si mwa papacai ki umawmase. Ku Yuabe papacai kwini ki tadrusa ka mulelecege iniane ka umawmase, kwini lalasu amani kwini Abinere ka tamatama ki kwapingi ki swa Iseraylri si Amasa ka tamatama ki kwapingi ki swa Yuda.

³³ Ku kiame ku pasalrivane ku tapapacadhane ki umawmase ki Yuabe lri palralrawthunga papia iniane si mwabaibalrithi iniane; ai ku Tamatama lri malra ki lamwabaibalrithi ki Davidi pawcungulu ku taneneaneini, lai lri ngiradheradhekane apalralrawthu.”

³⁴ Ku Binaia ka lalake ki Yehuiada la mwa kavai ki tapikaiyane ki Langiane ka Alrivilrivi ka balrawbau, si papacai ki Yuabe, la malra iniane dralreke pwa ubulane calragulragu ki adethe ki cekeleini.

³⁵ Ku talialalai la sikawlu ki Binaia atamatama ki sanaka kwapingi, mubalrithinga ki Yuabe, la sikawlu ki barakalai ka Zaduke mubalrithi ku awngane ki Abiathare.

Tapacadhane ki Simi

³⁶ Ku talialalai la sikawlu dawlu ki Simi, la kawriva iniane, “Kusu mwakai, la ikai Yerusalrime ngitatudaane, la ikaikai kai, maadha katwatwase kai ki cekele.

³⁷ Lwiyasi la katwasesu, lribate drakerale Kiderunge, lri tara paacaisu, ngiadadawlusu ku apacadhanesu.”

³⁸ Ku Simi la kawriva, “Unu, talialalai. Lri tara singikaiyaku ku vagasu.” Ku Simi la kawlai ikaikai Yerusalrime.

³⁹ Ai sa taratulrunga ka caili, ku tadrusa ku duri ki Simi la mubere mwa kavai ki Akisi ka lalake ki Maka ka talialalai ki swakai Gathe. Ku Simi la kilalra kwini lalasu yakai Gathe,

⁴⁰ la padulru ku ruba, la mwa kavai ki talialalai ki swa Gathe ka Akisi silape ki tadrusa ka durini, sa kidringainga, la malra iluku liniane siwlri.

⁴¹ Ku talialalai ka Sulumungu kialalra ku takatwasane ki Simi ka Yerusalrime,

⁴² la sikawlu dawlu iniane, la kawriva iniane, “Papia ki nagane ki Tamatama kiketekete amiaku muswane, maadha katwatwase Yerusalrime iya, si pakipapawlringavaku muswane, kwini takatwasanesu kwini vai amani ku apacadhanesu ka vai iya; kaisu ka palraaingi ku apasalaladhane nakwane?

⁴³ Asu kabebetethe kikai takiketeketanesu, baebalre ku drekaseli?

⁴⁴ Pwalringalringausu, paiyasu kudra kaika mwasakene ki ama ka Davidi. Ku Tamatama lri ngwalai kikai si pathavungu muswane;

⁴⁵ ai lri subulrubulru nakwane, ku taetalane ki talialalai ka Davidi lai lrika palralrawthu kapapedrenge.”

⁴⁶ Ku talialalai la drekase ki Binaia ka lalake ki Yehuiada, kwini lasu la mwa papacai ki Simi. Laka ngimiyaiya kai, ku Sulumungu la pakitulrepengenga pakapapedrenge ki kunini.