1 Latalialalai 16 - Ngudradreadrekadhane Ka Sisiu 魯凱語聖經1 Ku Tamatama kawariva ki yuginsia ka Yehu ka lalake ki Hanani, ani malra kikai lavaga pelaela ki Basa, 2 “Naamanisu kudra kaika apasiasipane, ai wacegecegaku muswane ka amani ku tarasangililuku ki kawkawluli ka swa Iseraylri. La kirimulringasu pasalriu, mararamau ki Yerubuame, la papasalriusu ki kawkawluli. Kwini pasalrivane lini wadawlu ku akaelaelaneli, 3 lakamani kwidra lri amudaku muswane si lawacekecekelesu, pangimia ku tapangimianeli ki Yerubuame. 4 Ku wacekecekelesu, adravane ka aneane, ku wapacai ikai cekele lri tara kikane ki tawpungu, ku wapacai iubulane lri kikane ki laadhadhame.” 5 Ku takaungane ki Basa si takagaranganeini ninguvavaevane pacase pikai ki aswalala ki lrikisi ki Latalialalai ki swa Iseraylri ka hungu. 6 Sa pacai ku Basa la kidralreke pikai Tireza. Ku lalakeini ka Ila la mucungulu iniane atalialalai. 7 Ku yuginsia ka Yehu kawariva putaluvaivai kudra sakaelaelane ki Tamatama ki Basa si wacekecekeleini; asi lwiyane pasalriu ku Basa, la pasalriu ki Tamatama. Kwini lasu pakagirimucu ki Tamatama, la kaika kathane ku tamararamavaneini ki talialalai ka Yerubuame ngilisiane ku kakwakudhane, mialri ngwalai ku taamudane papacai ki lawacekecekele ki Yerubuame makanaelre. Talialalai ki swa Iseraylri ka Ila 8 Satara 26 ka caili ku takatalialaladhane ki swa Yuda ki Asa, ku lalake ki Basa ka Ila atalialalai ki swa Iseraylri. Kwini lasu taradrusa ka caili rathudu ikai Tireza. 9 La ikai ku tangea ka tarasangililuku ki pararamau ki palridingi ikai ki daane ki talialalai ka kiacapili ki kwapingi ka Zimeri, kiadremedreme ku wabalre iniane. La ikai saka minakavalane, ku talialalai la ikai kavai Tireza ki tamatama ki tarakadrenge ki daane ki talialalai ka Areza si kabusuku; 10 ku Zimeri la katwase mudaane, la papacai ki Ila, ribici ku taetalane ki takatalialaladhaneini. Kikai amani saka tara 27 ka caili ku takatalialaladhane ki Asa ki swa Yuda. 11 Ku Zimeri sa atalialalai la malra papacai demedeme ki wacekecekele ki Basa, adravane ka laretesane latalrailragini, sanaka sawvalai, papacai demedeme. 12 Kikai ngiamianga ku takawrivane ki Tamatama pangukai ki yuginsia ka Yehu patharukai ki Basa, Ku Zimeri papacai demedeme ki wacekecekele ki Basa. 13 Ku Basa si lalakeini ka Ila wasukubu ki samiamiange, papasalriu ki swa Iseraylri, dawlu ku akalisiane ki Tamatama. 14 Ku takaungane ki Ila ninguvavaevane pacase pikai ki aswalala ki lrikisi ki Latalialalai ki swa Iseraylri ka hungu. Talialalai ki swa Iseraylri ka Zimeri 15 Saka tara 27 ka caili ku takatalialaladhane ki Asa ki swa Yuda, ku Zimeri atalialalai ikai Tireza makapitulu ka vai. Kikwini kwidra, ku kwapingi ki swa Iseraylri yacengecenge lringulu ki cekele ki Pelisitine kavai Gibethune ka cekele. 16 Kwini lalasu sa kilalra ka wabalre ki talialalai ku Zimeri, si papacai ki talialalai, kwini lalasu la ikai kwini cegecege ki tamatama ki kwapingi ka Umeri atalialalai ki swa Iseraylri. 17 Ku Umeri si kwapingini la katwase ka Gibethune si lringulu kavai Tireza. 18 Ku Zimeri sa drele ki cekele kimalranga, la mudaane ki kepale ki daane ki talialalai, la pwa lama kwini ki daane ki talialalai, ngilalama pacai. 19 Kikai amani sa pasalriu ku Ziliri, cugane ku tapasalrivaneini ki Tamatama. Kwini lasu kaika kathane ku tamararamavaneini ki Yerubuame pasalriu, mialri papasalriu ki swa Iseraylri, dawlu ku girimucane ki Tamatama. 20 Ku takaungane ki Zimeri, paelre kudra tapangimianeini balre ki talialalai, ninguvavaevane pacase pikai ki aswalala ka lrikisi ki Latalialalai ki swa Iseraylri ka hungu. Talialalai ki swa Iseraylri ka Umeri 21 Ku swa Iseraylri mawadrusanga, ku pararamau twatalialalai ki lalake ki Ginathe ka Tibeni, ku pararamau la kadalame ki Umeri. 22 Sakabilrilanenga, kwini nai kamani ku Umeri ka atalialalai amia la akaci. Ku Tibeni sa pacainga, la atalialalai ku Umeri. 23 Saka tara 31 ku takatalialaladhane ki Asa ki swa Yuda, ku Umeri atalialalai ki swa Iseraylri. Kwini lasu ku takatalialaladhaneini tara 12 ka caili, ku aswalala ku nimakaenemane ka caili yakai Tireza. 24 Sakabilrilanenga, kwini lasu la arakai ku 6,000 ku gingi patwalai ki sia Semere langai ka lregelrege Samaria, ku Umeri la ikai kai ki lregelrege tucekele, la singikai kai ki lregelrege ku sakwa ka nagane ka Semere si sunagane iniane pasi Samaria. 25 Ku Umeri laka makadrwadrwa ki aswala ka latalialalai ka madradrau ku pasalrivane, pasalriu ki Tamatama. 26 Kwini lasu mararamau ki Yerubuame, kaika amanini ku pasalriu sikakathane, mialri papasalriu ki swa Iseraylri, sukubu ki samiamiange, la pakagirimucu ki Tamatama ka Twaumase ki swa Iseraylri. 27 Ku tangimiamiane si takaungane ki Umeri ninguvavaevane pacase pikai ki aswalala ki lrikisi ki Latalialalai ki swa Iseraylri ka hungu. 28 Sapacainga ku Umeri la kidralreke pikai Samaria. Ku lalakeini ka Ahabe la mucungulu atalialalai. Atalialalai ki swa Iseraylri ku Ahabe 29 Saka tara 38 ku takatalialaladhane ki Asa ki swa Yuda, ku lalake ki Umeri ka Ahabe atalialalai ki swa Iseraylri. Kwini lasu yakai Samaria rathudu tara 22 ka caili. 30 Ku Ahabe la pasalriu, pasalriu ki Tamatama, ka maparawramuru ki aswalala iniane ka naaneanenga ka talialalai. 31 Kwini lasu pasalriu mia ki Yerubuame ka talialalai la kaika twakelreteana, wamwana karudrange ki Yezebile ka lalake ki Ithebaale ka talialalai ki swa Sidune, si mwa sukubu ki Baale. 32 Kwini lasu yakai Samaria pasikai ki Baale tudaane ku biu, la pikai ku taluvale ku tapatarumaramarane ikai daane ki biu. 33 Kwini lasu la cegeecegenga ku vaeva ku ulrudru ki ababai ka twaumase ka Asera si sukubu. Kwini lasu parawramuru ku tapasalrivaneini si lriibate ki aswalala iniane ki latalialalai ki swa Iseraylri, la pakagirimucu ki Tamatama ka Twaumase ki swa Iseraylri. 34 Sa icengecenge ka talialalai, ku Hiele ka swa Bithele la tupela tucekele ka Yeriku. Singiakai ki Tamatama kudra takawrivane pangukai ki lalake ki Nunge ka Yesua ku tasakaladhaneini ku vaga, Ku Hiele sa cegecege ku karwalai ki cekele Yeriku, ku takataka ku lalake ka Abirame la pacai; kwini lasu sa paraisinga ku lrawlrawdru ki cekele, ku agiagi ka lalake ka Segube la pacai. |