Biblia Todo Logo
Bìoball air-loidhne

- Sanasan -

1 Latalialalai 12 - Ngudradreadrekadhane Ka Sisiu 魯凱語聖經


Takiecebane ki swa tali dradha ka lazuku
( 2 Lacaili 10.1-19 )

1 Ku Rihubuame wamwa kavai Sekeme; ku la swa Iseraylri yasarubu ikai kavai, lri cegecege tutalialalai iniane.

2 Ku lalake ki Nibate ka Yerubuame ngwalai ki talialalai ka Sulumungu la mubere mwa kavai Izipiti; sa kilalra ka atalialalainga ku Rihubuame la twalai Izipiti siracangane siwlri.

3 Kwini mapapangale ki lazuku ki swa tali dradha la sikawlu ki umawmase dawlu iniane, la tupapalra iniane kidrele ki talialalai ka Rihubuame, la kawriva iniane,

4 “Ku tamasu ka Sulumungu pakwalri naiane. Lwiyasi la kivalasu kai amece nai, la pakasulivate ku tacekecekelane nai, lri pasalaladha nai muswane.”

5 La tubalre ku Rihubuame, “Lu maka tulrulunga ku vai siwlrianga mwa kai, lri tara tubalreaku numiane.” Kwini lalasu la katwase.

6 Ku talialalai ka Rihubuame la kivavaga kudra ki tapiya ka lamarudrange ku kidremedreme lini; kwini lalasu namani ku atakivagane ki tamaini ka talialalai ka Sulumungu. Kwini lasu la kivaga liniane, “Kunumi ani pangitumane tubalre kai ki laumawmase amia numi?”

7 Kwini lalasu la iya kai, “Lwiyasi nau pakathariri marasikai ki mapapangale iyasu, pakatharira ku satubalreanesu liniane, kwini lalasu lri tara ka palralrawthu ka patengatengane pasikai muswane.”

8 Ai, ku Rihubuame kai twamanemane kai vaga ki lamarudrange, la katwaselringa silape ki lalangukathabarane; kwini lalasu lasilasilanganeini, kikai lakamani ku takivaganeini.

9 Ku Rihubuame la kivaga kwini ki lalasu, “Yakai ku anipia kwini iyaiya numi? Kavai laumawmase kiatubi nakwane ku akivalane kavai laamece lini, lri pangitumanaku tubalre liniane?”

10 Kwini lalasu la kawriva, “Iya kai pelaela liniane, ‘Kai sakikilili mabitutulrwana ki tasilakelaketane ki ama!

11 Kudra pasiamece numiane ki ama, lri aru pakatelregaku; arakai ku salrumalrumadhane lrumai numiane, lri arakaiyaku ku ceneke ka salrumalrumadhane lrumai numiane!’ ”

12 Samaka tulrulunga, ku Yerubuame si mapapangale makanaelre singiakai ku tapelaelane ki talialalai ka Rihubuame, keelanga mucucubungu iniane.

13-14 Ku talialalai kai kialalra ku takawrivane ki lamarudrange, singiakai ku takawrivane ki yacengecenge, si papia ki mapapangale akucaeme kawriva. Amia kai, “Pakatelrege pasiamece numiane ku ama, lri baadhaku numiane ku mateelrelrege ku amece, arakai ku salrumalrumadhane lrumai numiane, lri arakaiyaku ku ceneke ka salrumalrumai lrumai numiane”

15 Ku talialalai la kai kithathengete ku kitubi ki mapapangale; kai wathingale kikai ala ka kidremedreme ki Tamatama, pakai ku apangimiane ku vaga ki Tamatama pangukai ki yuginsia ka swa Selu ka Ahiya papia ki Yerubuame ka lalake ki Nibate.

16 Ku mapapangale ki swa Iseraylri sadrele ki talialalai lakai tarumara kudra kitubi lini la akwadrau kawriva, Manemane ku tamacacapilaneta ki Davidi? Kadrwa ku tapakaesadhane naiane kikai lalake ki Yesi! Swa Iseraylri, ila tamubalriu! Ani ngisasiraparapalenga kai tai Davidi! Ku swa Iseraylri la kirimunga balrebalre;

17 ku Rihubuame la atalialalai ki swa talikai Yuda sikakathane.

18 Ku talialalai ka Rihubuame la sikawlu ki tarakadrenge ki tarakaungu ka Adurame mwa kavai Iseraylri, ku swa Iseraylri la arakai ku lrenege papacai iniane. Kikai kwidra, ku Rihubuame la asasamaliane katwase mubelenge ki palridingi ki rigi, mubere siwlri mwa Yerusalrime.

19 Twalainga kikai, ku swa tali dradhane ka mapapangale ki swa Iseraylri laka takiecebanenga balrebalre ki ngwakai ki Davidi ku atalialalai.

20 Ku swa Iseraylri sa kilalra ku Yerubuame ala ka twalai Izipiti siwlriwlringa, la mwa dawlu iniane mwa kwidra ki taingeane ka tairubwane mapelaela ki mapapangale, la cegecege iniane tutalialalai ki swa Iseraylri. Laka kathanenga ku zuku ki Yuda ka taingeangeanga ka twakucingalre ki lamwabaibalrithi ki Davidi.


Tayugingane ki umawmase ki Twaumase ka Semaia
( 2 Lacaili 11.1-4 )

21 Ku Rihubuame sa kela Yerusalrime la sarubu ku tagagarange ku kwapingi ki zuku ki Yuda si Biniyamingi ku ta 180,000 ku umawmase, pasana kikaruburu, pasiwlri kudra tarathudaneini ki swa Iseraylri ka tali dradha ka zuku.

22 Ai ku Twaumase la kawriva ki umawmase ki Twaumase ka Simaia,

23 cucunu iniane mwa ki Rihubuame si mapapangale ki swa Yuda makanaelre, ki mapapangale ki zuku ki Biniyamingi kawriva,

24 “Madha mwamwa kikaruburu ki retesane numi ka swa Iseraylri. Kunumi makitu siwlria mubalriu! Kikai tangimiane kai yai twalai nakwane.” Kwini lalasu la kilalra ku drekase ki Tamatama, la makitu siwlri mubalriu.


Kiadaili cilri ki Twaumase ku Yerubuame

25 Ku Yerubuame ka talialalai ki swa Iseraylri la ikai talikai Iparaime kavai Sekeme tukepale si takadrengane, la ikaikai kwini kai tarathainu. Sakabilrilinga la katwase kwini ki cekele, la pikaainga kavai Penuile tukepale.

26-27 Kwini lasu ngiakakawriva iya kai, “Lu singikaiyane kai tangimiamiane kikai asasane, lwiyasi kai mapapangaleli la katwase mwa Yerusalrime, la ikai ki daane ki Twaumase patarumara ki Tamatama ku sapatarumarane, lri akabalrithi ku kidremedreme lini tukucingalre ki talialalai ki swa Yuda ka Rihubuame, si kela kai papacai nakwane, la lrika siwlriwlri ka kuninga ki mwabaibalrithi ki Davidi.”

28 Kwini lasu la kidremeedreme, la darepe ku drusa ku kingi ka lwange, ala kawriva ki mapapangale, “Lu katwase numi mwa Yerusalrime sukubu matiakidulru turamuru. Swa Iseraylri, kikai amani ku wasangiluku numiane mulatadre Izipiti ka twaumase!”

29 Ku Yerubuame la malra kwini vaeva ka kingi ka lwange cegecege pikai Bithele, ku vaeva la cegecege pikai Dange.

30 Kikai lakamaninga kudra tatwaladhanenga pasalriu ki mapapangale, asi lwiyane kwini lalasu wamwanga Bithele si Dange sukusukubu.

31 Ku Yerubuame la pikaainga ki lalrelrelrege tudaane ku tasukusukubane, si patwalai ki kaika swa Lrivi pilri ku umawmase paabarakalai.


Ku yakai Bithele sukubu kiatupasalrivane

32 Ku Yerubuame la cegecege pikai ki sakavalru ki dramare saka 15 ka vai tutatulrisisisiane ki takisuswane, mararaamau ku tatulrisisiane ki swa Yuda. Kwini lasu yakai ki tapatarumaramarane Bithele papia ki darepeini ka kingi ka lwange patarumara tulrisi, si ikai Bithelrihime cegecege ku labarakalai, si pasukubu liniane ikai ki tudaaneini ka daane ki Tamatama.

33 Ku Yerubuame la ikai kwini ki cegecegeini ki sakavalru ka dramare si saka 15 ka vai, kwini yai pasikaini ki swa Iseraylri cegecege ka tatulrisisisiane, la papia ka Bithele, si ikai kwini ki tapatarumaramarane padalai ku sangwalreme.

© The Bible Society in Taiwan, 2017

All rights reserved

© 臺灣聖經公會版權所有,2017

Bible Society in Taiwan
Lean sinn:



Sanasan