1 Latalialalai 11 - Ngudradreadrekadhane Ka Sisiu 魯凱語聖經

Ku Sulumungu kiadaili cilri ki Twaumase

¹ Ku Sulumungu takalra ku kadalameini ku badhanane ka labaibai. Kai ka kathane ku lalake ki talialalai ki swa Izipiti, marudrange mwa ki ababai ka swa Hite si swa Muabe, si swa Amune, swa Idume si ababai ki swa Sidune.

² Ku Tamatama nawadrekase ki swa Iseraylri madha mathaethaethareve ki maelane ka zuku iya, asi lwiyane kwini lalisu lri kirimu lrilrigili ki swa Iseraylri mwa tupalra ki maelane ka twaumase. Ai ku Sulumungu madalame turamuru kikai ki lalabaibai,

³ la karudrange mwa ki ta 700 ku lalake ki latalialalai, la kaika kathane kai, yakaiyana ku drumane ku ta 300 ku labaibaiini; kwini lalisu pakiadaili cilri ki Twaumase ki Sulumungu.

⁴ Saka tarudrawdrangenga ku Sulumungu, kwini lalisu la lrigili iniane mwa sukubu ki drumane ka twaumase; kwini lasu kai ngiamia ki tamaini ka Davidi ku tukucingalrane ki Tamatama ki Twaumaseini.

⁵ Kwini lasu wasukubu ki Asetarete ka ababai ka twaumase ki swa Sidune si kwidra matigiririmucunga ka twaumase ki swa Amune ka Muleke.

⁶ Kwini lasu pasalriu ki Tamatama, kadrwa ku tangimiane ki tamaini ka Davidi kitulrepenge ku pasalaladhane ki Tamatama.

⁷ Kwini lasu yakai Yerusalrime tali talrawane lrelrelrege darepe ku taluvale ku tapatarumaramarane sukubu ki matigiririmucunga ka twaumase ka Kemuse ka twaumase ki swa Muabe, la daarepenga ku taluvale ku tapatarumaramarane ki matigiririmucunga ka twaumase ka Muleke ka twaumase ki swa Amune.

⁸ Kwini lasu la pasikai kwini ki sanaka singibadhane ka labaibai si taelrelreini cegecege ku talukalrale ku taikaikaiyane sukubu ki thathatha ka samiamiange, la ikai kwini lalisu papia ki twaumase lini padalai ku sangwalreme patarumaramara.

^9-10 Adravane ku Tamatama ka Twaumase ki swa Iseraylri nakingi pusale adrelane ki Sulumungu, drekase iniane madha sukusukubu ki drumane ka twaumase, ai ku Sulumungu kadrwa ku takirimwane kilalra ki Tamatama, ngiabalrelringa katwase cilri iniane. Ku Tamatama la kaelaela ki Sulumungu,

¹¹ kawriva iniane, “Ngwalai kikai waranausu ngibalre cilri ku tamakaketeketaneli muswane, kai paluludu ku drekaseli, lri tara malraku kwini kunisu, baai ki tangea ki kiacapilisu.

¹² Ai, ngwalai ki tamasu ka Davidi, kainaku lri pangimia kikai ikai ki taikaiyanesu kawmasane, lu daarurunga ku atalialaladhane ki lalakesu lri pangimiaku kikai.

¹³ Ai kainaku lri malra nguelre kwini kuni patwalai ki alrimaini, ngwalai ki sasiakawluli ka Davidi, ngwalai ki Yerusalrime ka ngipapilrili ngitatucekele ka cekele, lri pasuraku ku vaeva ku zuku baai iniane.”

Labadha ki Sulumungu

¹⁴ Sa mianga kwini ku Tamatama la pakiecebe ki Sulumungu kwini ki wacekecekele ki talialalai ki swa Idume ka Hadade.

^15-16 Ku siaswalane, ku Davidi sa rathudu ki swa Idume, ku tamatama ki kwapingi ki Davidi ka Yuabe nawamwa kavai dralreke ki kiapapacai ki tamakakaruburane. Ku Yuabe si kwapingini la asuru ikaiyana kavai Idume taraeneme ka dramare. Ikai kwini, kwini lalasu papacai demedeme ki sawvalai ki swa Idume,

¹⁷ lakakathane ku Hadade si kwini umawmase ki tamaini ka swa Idume ka mwabere mwa ka Izipiti, kai kiapapacai. (Kikwini ku Hadade vavalakeana.)

¹⁸ Kwini lalasu matwase ka Midiange mwa ka Parange, la maelre kwini swakai kwini, ala katwase satalu ki swa Izipiti. Ku talialalai ki swa Izipiti la baai ki Hadade ku kadaengane si daane, la patarumara iniane ku akaneane.

¹⁹ Ku Hadade la kikadalame ki talialalai; ku talialalai la malra ki agi ki taelrelreini, kwini agi ki taelrelre ki talialalai ka Tapenise, alabaibai ki Hadade.

²⁰ Kwini alisu la tulalake ku vaeva ku sawvalai. Sia Ginubathe. Ku labaibai ki talialalai la lapu iniane, la taelre ki lalake ki talialalai ikai daane ki talialalai.

²¹ Wapacai ku Davidi si tamatama ki kwapingi ka Yuabe ku sapelaelane la daruru ki yakai Izipiti ka Hadade, ku Hadade la kawriva ki talialalai, “Ala nau siwlringa mwa ki kunili!”

²² Ku talialalai la kawriva, “Asi? Alau yakai ku kawrawramesu, lakamani ku nau mubalriu iyasu?” Ku Hadade la tubalre, “Ala pakatwasangaili!” Kwini lasu la katwase mwa ki kunini. Ku Hadade atalialalai ki swa Idume, si kamaninga ku tarakiececebe ki swa Iseraylri.

²³ Ku Twaumase la malra ki lalake ki Ilriada ka Rizunge kiecebenga ki Sulumungu. Ku Rizunge twalai ki tawkini ka Hadadizere ka talialalai ki Zuba mubere,

²⁴ kwini lasu atamatama ki lasadre, kikai amani sa pamalebe ku Davidi ki Hadadizere, la papacai ki talragini ka swa Siria. Ku Rizunge si twapapapalra iniane wamwa ka Damasekuse, la ikaikai kwini, kwini twapapapalra iniane la paatalialalai iniane ki swa Siria.

²⁵ Sapanianianiakeana ku Sulumungu, ku Rizunge si Hadade yai badha ki swa Iseraylri, la rathudu ki swa Arame.

Tapukawnwane ki Twaumase ki Yerubuame

²⁶ Ku tangeanga ku kiaecebe ki Sulumungu, amani ku tabebelenge ki talialalai, Yerubuame ka lalake ki Nibate ka swa Zireda ka swakai ki zuku ki Iparaime. Ku tinaini sia Zerua ka walibakane.

²⁷ Kikai lebe amani ku tapangimianeini baebalre. Ku Sulumungu sa pudaedae selreselrepe ki tali talrawane Yerusalrime ki valrwalru si pudriadringai ki alradre ki cekele,

²⁸ ku Yerubuame amani kudra malrigili ka langukathabarane. Ku Sulumungu la drele iniane ka lu kipuawngane kiasamula, la sikawlu iniane kamani ku tarakadrekadrenge ki la kiapuawngane ikai kavai talikai ki zuku ki Manase si Iparaime.

²⁹ Yakai saka minakavalane, ku Yerubuame la twalai Yerusalrime mulatadre, ku yuginsia ka Ahiya ka swakai Selu la madradresenge ikai kadadalranane, ku Ahiya la silaimai ku bavane ku laimai. Ikai kwini calragulragu kathane lini ka tadrusa.

³⁰ Ku Ahiya la mwalra kwini silaimaini ku bavane, la thuriace pau 12,

³¹ la iya kai ki Yerubuame, “Malra kai mangeale, asi lwiyane ku Tamatama ka Twaumase ki swa Iseraylri amia kai muswane, ‘Lri malraku ku kuni patwalai ki Sulumungu, baai muswane ku taimangealane ka zuku.

³² Ai ngwalai ki sasiakawluli ka Davidi, ngwalai kikai pilrili patwalai ki swa Iseraylri ngiapapia ka Yerusalrime cekele, Ku Sulumungu lri dulrwana pikai ku taingeane ka zuku.

³³ Kudra pangimiali kikai amani sa kidaili cilri nakwane ku Sulumungu, la katwase mwa sukubu ki twaumase ki maelane ka kuni, twaumase ki Sidune ka ababai ka twaumase ka Asetarete, Kemuse ka twaumase ki Muabe, Muleke ka twaumase ki Amune. Ku Sulumungu wabaebalre nakwane; pasalriunga, kai ngimia ki tamaini ka Davidi paluludu ku hulrice si drekaseli.

³⁴ Ai kainaku lri malra twalai iniane patuelre ku kuni; lri parathurathudwana naku iniane ku taikaiyane kai kawmasane. Kai piali kikai ngwalai ki pilrili ka sasiakawluli ka Davidi, asi lwiyane paluludu ku hulrice si drekaseli.

³⁵ Lri malraku ku kuni patwalai ki lalake ki Sulumungu, baai muswane ku taimangealane ka zuku,

³⁶ ai ku lalake ki Sulumungu lri pikaiyana ku taingeane ka zuku. Lumia kikai, lrika palralrawthu ikai ku lamwabaibalrithi ki Davidi rathudu Yerusalrime; kikai cekele yai amani ku pilrili ka taikaiyane sukubu nakwane.

³⁷ Yerubuame, lri cegecegaku muswane atalialalai ki swa Iseraylri; lri tara rathudusu kudra sidramasu malra ka kadaengane.

³⁸ Lwiyasi kitulrepengesu kilalra pasalaladha nakwane, pia ku kiragaili, paluludu ku hulriceli, pangimia ku drekaseli, mia ki sasiakawluli ka Davidi, lri palralrawthaku tapalra muswane. Lri paatalialaladhaku muswane ki swa Iseraylri, si ku mwabaibalrithi muswane lri pacungulu rathudu, mia ku tapangimianeli ki Davidi.

³⁹ Lri ngwaladhaku ki pasalrivane ki Sulumungu pathavungu ki lamwabaibalrithi ki Davidi, ai kikai sapathavungane kai lrika palralrawthu.’ ”

⁴⁰ Ku Sulumungu la kidremedreme ku papacai ki Yerubuame; ai ku Yerubuame mwabere mwa ki Sisake ka talialalai ki swa Izipiti, si ikaikai Izipiti, pakela sapacainga ku Sulumungu ala siwlri kainganai.

Wapacai ku Sulumungu

⁴¹ Ku drumane ku takaungane ki Sulumungu, adravane ka takaunganeini si lrigilaneini, singiabila pacase pikai ki aswalala ka lrikisi ki Sulumungu ka hungu.

⁴² Kwini lasu atalialalai ikai Yerusalrime, si rathudu ki swa Iseraylri taramasupatele ka caili.

⁴³ Kwini lasu sapacainga la kidralreke pikai ki cekele ki Davidi; ku lalakeini ka Rihubuame la mucungulu iniane atalialalai.