1 Latalialalai 10 - Ngudradreadrekadhane Ka Sisiu 魯凱語聖經

Takelane lidrau ki ababai ka talialalai ka Seba

¹ Sakilalra ku ababai ka talialalai ki swa Seba ku takimatikaiyane ngwalai ku tasubulrubulrwane ki Tamatama ki talialalai ka Sulumungu, la kela Yerusalrime, nau arakai ku makucingalre kilrialringau iya ki Sulumungu.

² Kwini alisu la ililuku ku mapaangale ku papalraini, la ikai ku taingea ka sakaredele ku lrakeda siamece ku sapasangulrelremane, lasilu, si thathatha ku kingi. Kwini alisu sa kidrele ki Sulumungu, la malra kwini maka pakelaini kidremedreme ku akivagane nguvavaeva kivaga ki Sulumungu.

³ Ku Sulumungu la singibila tubalre kudra kivagaini, kadrwa ka navaevanga ku pakakucingalre ki Sulumungu.

⁴ Ku ababai ka talialalai ki swa Seba sa kilalranga ku lrigilane ku vaga ki Sulumungu, drelenga kudra tudaaneini ku daane ki talialalai,

⁵ la drele kwini yacukudhane ku talimememe ku akaneane, ladaane ki kiacapicapilini, tarathudane si sangiragelanane ki tarapalakebe iniane, kudra taramarasikai paungulu, si kwini sapatarumarane ikai ki daane ki Twaumase, asasamalianenga kai maka avavaganga.

⁶ Kwini alisu la kawriva ki Sulumungu ka talialalai iya kai, “Kudra takilalraneli sa ikaiyaku ki kunili kudra pangukai muswane ku lrigilanesu patengatengane patuelre.

⁷ Ai sa kelangaku kikai si ngikakamani drele kikai patuelrenga masalrwaku ka patengatengane. Kudra takilalraneli kaiyana ka pararamauana! Ku lrigilanesu si tacekecekelanesu madradrauana kudra tapelaelane nakwane ki palrapalra.

⁸ Ku labaibai si taelrelresu ala mwaesai turamuru! Ku lasasiakawlusu mwaesailringa turamuru! Kwini lalasu lri dulru ka taicucubungane muswane si kilalalalra ku lrigilane ku vagasu.

⁹ Ku Tamatama ka Twaumasesu anikidrengedrengere! Ku tatutalialaladhane muswane tengatengane ka madalame muswane. Asi lwiyane lrika palralrawthuini kilibake ki swa Iseraylri, lakamani kwidra cegecege muswane tutalialalai, la maka dulrusu pangimia arakai ku hulrice, si arakai ku aparamaramavane ku dringelresane.”

¹⁰ Ku ababai ka talialalai ki swa Seba la malra kwini ilukuini ku saceacebe baai ki talialalai ka Sulumungu: Yakai ku lrika 4,000 kukingi ku kingi ku telregane, thathatha ku sapasangulrelremane si lasilu. Ku Sulumungu ka talialalai kadrwana ku tatarumaraneini ku paramia kai ku kalrane ku sapasangulrelremane.

¹¹ Ku lavarukuru ki Hirame la twalai Upire salri ku kingi, la mialri salri ku makalra ku yunipere ka angatu si silu.

¹² Ku Sulumungu ka talialalai la arakai kikai yunipere ka angatu tusaravadrane ki daane ki Twaumase si daane ki talialalai, la mialri pasikai ki latarapatungutungu taraseasenai darepe ku patungutungu si pituane ka patungutungu. Kai swa Iseraylri kadrwana ku tapucekelane lini ku tha kikai ku tathaithariri ka sangwalreme ka baali, sakabilrilinga laka kadruanga ku tadrelane lini pela.

¹³ Ku Sulumungu ka talialalai la pakaelre ku kidremedremeini bilri baai ki talialalai ki swa Seba ku makaelaela ku saaceacebe, kaika kathane kudra kakwakudhane lu maceacebane, sanaka murikai ki talialalai ki swa Seba, kwini lasu wabaai ki alisu. Kwini ababai ka talialalai si latarapalakebe iniane la siwlri mwa kavai Seba.

Tacekecekelane ki Sulumungu

¹⁴ Ku Sulumungu ki caicaili tarwamara ku 23,000 kukingi papubebelenge ku kingi,

¹⁵ la ikaiyana ku drumane ku kazilu ki tarasiwbawbai, kipaisu lini ki tarathathakai, kela ki latalialalai ki swa Arabia bulri tuswalupu, si la acebe ki lasutu ki swa talinunga ki tapakadrengane ki lacekele ki swa Iseraylri.

¹⁶ Ku talialalai ka Sulumungu la darepe ku 200 ku tadradrau ku alathare, ku vaeva ku telregane ikaai kau pitu kukingi ka niarakaiyane ku kingi darepe.

¹⁷ Kwini lasu la daarepenga ku 300 ku tatitiki ka alathare, kwini vaeva arakai ku lri ikaai kau drusa kukingi ku kingi. Kwini lasu la malra kikai laalathare pikai ki daane ki talialalai kavai angatungatu ka Lebanungu.

¹⁸ Ku Sulumungu la arakaainga ku valisi ki zu darepe ku vaeva ku taetalane, arakai ku kakingiane cabu.

¹⁹ Kwini cucubungu ki taetalane la ikai ku sinemele ku tatabelebelengane, ikai lrilrikudru la ikai ku lrimemeteke ka cavalri. Ki taneneane la ikai ku takirecengane maecebe, si maecebe ka raiyungu.

²⁰ Ki sivaale maecebe yakai ku raiyungu, patuelre 12 ku raiyungu. Kwini ki lrilrikudru ki taetalane la papacase tuawlru ki lwange, kwini maecebe ki takirairaisane tara yakaai ku vaeva raiyungu. Ki sanaka kuni kadrwana ku miyaiya kai ku taetalane.

²¹ Ku kupu ki Sulumungu ka talialalai yadrepele ka niara kingiane; kwini sakanekaneane ku la takaiyane ikai daane ki talialalai kavai angatungatu Lebanungu niara kingiane darepe, kai arakaikai ku gingi; asi lwiyane ikai ki zidai ki Sulumungu, kaika tinukucingalrane kai gingi.

²² Ku Sulumungu la ikai ku taingeane ka sakaredele ku taramwadaidaili ka varukuru, maredele ki sakaredele ki Hirame ka talialalai; kwini lu taratulru ka caili ngwasivaale kela, mailuku ku kingi, gingi, valisi ki zu, madradrau ka babila kela.

²³ Ku Sulumungu ka talialalai maesaesainga ki sanaka talialalai kidruanga ka kuni, ka malrilrigilinga.

²⁴ Sanaka umawmase kawmasane apia keela drele ki Sulumungu makanaelre, lri kilalalra ku patarumara ki Twaumase ku lrigilane ka vagaini.

²⁵ Kwini lalasu tara wailuku ku taingeane ku saceacebe baai iniane, ku kingi ka takaiyane, gingi ka takaiyane, laimai, sakikaruburuburane, sapasangulrelremane, larigi, ngiririgi. Kikai miyaiya kai pacungulu kawlai ku caili.

²⁶ Ku Sulumungu la cegecege ku taingeane ku palridingi ka rigi ku 1,400 si 12,000 ku sakikaruburuburane ka rigi ka kwapingi. Kwini lasu wamalra ku drumane pikai Yerusalrime, ku drumanenga la apavavala pikai ki drumane ka lacekele.

²⁷ Ikai ki tarathudaneini, ku gingi Yerusalrime mia ki lrenege ku kalrane, ku cedare ka angatu ku kalrane mia ki lataliwdru.

²⁸ Ku tarasiwbaibai ki talialalai amani ku wakelrekelrete ku twalai Museri si Cilikia ku alangadhane ku rigi,

²⁹ si twalai Izipiti kilangai ku palridingi ki rigi. Kwini lalasu wamalra kwini larigi si palridingi pakatwasenga kilangai ki latalialalai ki swa Hite si swa Siria: Ku vaeva ku palridingi ki rigi twa 600 ku gingi; ku vaeva ku rigi twa 150 ka gingi.