1 Latalialalai 1 - Ngudradreadrekadhane Ka Sisiu 魯凱語聖經

Saka tarudrawdrangenga ku Davidi

¹ Kikai kwidra, ku talialalai ka Davidi pasuludrunga; ku taramarasikaikai iniane adravane arakai ku latana cawbu ki kinawmasaneini, kwi lasu kai maka maculunga.

² Ku mabelenge iniane la iya kai iniane, “Talialalai, ala nai katwase silape ku tangea ku tawvailekete ani kela marasikai muswane, sirapale muswane, kwini alisu lani apece ikai thili muswane, lasu kaculu.”

³ Kwini lalasu la mwa ki lacekele ki swa Iseraylri silape ku mathaariri ku tawvailekete, la kidringai ikai kavai Suneme ku tangea ka ababai, ka sia Abisage, la iluku iniane mwa kidrele ki talialalai.

⁴ Kikai ababai mathariri turamuru; kwini alisu la ikai thili ki talialalai siraparapale ki talialalai, ai ku talialalai kai tadrusa iniane apece.

Ku Aduniya kiadredreme ku waribici ku taetalane ki talialalai

^5-6 Sakamani kwidra, ku Abesalrume wapacainga; ku tulalake ki Davidi si Hagithe ka Aduniya amani ku takataakanga ka lalake. Kwini lasu ngiaesadhane turamuru ku tacebeane. Ku Davidi kadrwana ku ngwalaini si kaelaela iniane, ai kwini lasu madrau ku nau pia kwini iyaiya ku kidremedreme, kiasanu atalialalalai. La ngipapasikai padulru ku lapalridingi si latarangurigi ku kwapingi la ikai ku sakaredele ku tamalrimale ku tarakadrenge.

⁷ Kwini lasu namadrekadrekasenga ki Yuabe (ku tinaini yai Ziruia) si Abiathare ka barakalai; kwini tadrusa tara palraingi kwini naupia kwini iyaiya ki lasu.

⁸ Ai ku barakalai ka Zaduke, Binaia ka lalake ki Yehuiada, yuginsia ka Nathange, Simi, Rei, si latarakadrenge ki Davidi kai pasalaladha iniane.

⁹ Yakai saka minakavalane, ku Aduniya yakai kavai Sulrau ka Alrisapesape ideethe Inrugele ka berai ki acilai patarumaramara ku lalwange, kiu, maricuru ka lwange, la dawlu ki drumane ka lalalake ki talialalai ka Davidi si latabebelenge twalai ka Yuda kainganai kipaelre ngiakaneane ku tapatarumarane tulrisi.

¹⁰ Ai kai wadawlu ki mararamau ku tama makakaela ku tina ka agini ka Sulumungu, la kai dawlu ki Nathange ka yuginsia, Binaia, ki tarakadrenge ki talialalai.

Ku Sulumungu kiapacegecege atalialalai

¹¹ Ngwalai kikai, ku Nathange la katwase mwa ki tina ki Sulumungu ka Batheseba, si kivaga iniane, “Kaisu kialalra ki lalake ki Hagithe ka Aduniya ngiacacegecegenga atalialalai? Ku talialalai ka Davidi kaiyana wathingale kikai.

¹² Alaiyasi lri ngipapalribulusu si niake ki lalakesu ka Sulumungu, nau papukidremedreme muswane.

¹³ Lu kisamula mwa ki talialalai ka Davidi, si kivaga iniane, ‘Talialalai, kaisu ka napwadriadriingainga palraingi nakwane, ku lalakeli ka Sulumungu kalri ucungulu ki taetalanesu ka talialalai? Kaiasasane ani ka Aduniya ka atalialalai?’ ”

¹⁴ Ku Nathange la iyanga kai, “Lu kikawrivarivanasu ki talialalai yai, lri mudaanaku, pelaela ka patengane kwini taiyanesu kwi vaga.”

¹⁵ Ngwalai kwini, ku Batheseba matwase mwa ki tapeapecane ki talialalai drele ki talialalai. Ku talialalai pasuludrunga turamuru; ku Abisage ka twalai Suneme ka ababai kaiyanganai siraparapale iniane.

¹⁶ Ku Batheseba la ikai cucubungu ki talialalai sukubu; ku talialalai la kivaga iniane, “Manemane ku urikaisu?”

¹⁷ Ku Batheseba la iya kai, “Talialalai, napapiasu ki nagane ki Tamatama ka Twaumasesu kiketekete, ku lrika amucungulane muswane atalialalai ki lalakeli ka Sulumungu.

¹⁸ Ai ku Aduniya ngiacacegecegenga atalialalai la kaisu thingaleana.

¹⁹ Kwini lasu patarwamaranga ku makaalra ku lalwange, kiu si maricuru ka lwange tusapatarumarane tulrisi, la dawlu ki lalalakesu, barakalai ka Abiathare, si abebeelengenga ki kwapingisu ka Yuabe kela kipaelre ngiakaneane, ai kai wadawlu ki lalakesu ka Sulumungu.

²⁰ Talialalai, kai swa Iseraylri makanaelre kai mapapangale mwakalavalava ku apelaelanesu liniane, aneane ku lri mucungulu ki taetalanesu ka talialalai.

²¹ Alaiyasi kaisu pelaela, lu pacaingasu, kai lalakeli ka Sulumungu si kwaku lri kitu amani kudra wabaebalrenga.”

²² Ku Batheseba sa makakawrivarivana ki talialalai yai, ku yuginsia ka Nathange mwadaane ki daane ki talialalai.

²³ Yakai ku umawmase ku peaelaela ki talialalai, iya kai, wakelanga ka yuginsia. Ku Nathange la mudaane, ikai cucubungu ki talialalai sukubu,

²⁴ ala iya kai, “Talialalai, peaelaelangasu putaluvaivai ka lri mucungulu muswane ku Aduniya atalialalai?

²⁵ Kaikameane ka lasu matwase patarumara ku makaalra ku lalwange, kiu, si maricuru ka lwange tusapatarumarane ka lrisi, la dawlu ki lalalakesu makanaelre, ki abebeelengenga ki kwapingisu ka Yuabe, si Abiathare ka barakalai kela ngiakaneane. Kaiasasane ka lalasu yacengecenge taelre ki Adunia kanekane ungungulu, la matatawtawtau, iya kai, ‘Aduniya ka talialalai banzai!’

²⁶ Ai ku Aduniya kai wadawlu nakwane, la kai dawlu ki Zaduke ka barakalai, Binaia ka lalake ki Yehuiada, si Sulumungu.

²⁷ Talialalai tengane ka palraingisu kikai miyaiya kai? Asalu pelaelane ki latabebelenge lulri ka aneane ku lri mucungulu ku taetalane ki talialalai?”

²⁸ Ngwalai kikai, ku Davidi ka talialalai wacunu ki maecebe ithili katwase silape dawlu ki Batheseba, ku Batheseba la kela, acegecege icucubungu ki talialalai.

²⁹ Ku talialalai amia kai iniane, “Lri papiaku ki Tamatama ka palralrawthu panianiake ka palribulu nakwane pakidaili ki makaelaela ka akwalriane pukawnu muswane,

³⁰ kaikameane lri pangimiaku ku tapapianeli kiketekete pangukai ku nagane ki Tamatama ka Twaumase ki swa Iseraylri: Ku lalakesu ka Sulumungu lri mucungulu nakwane atalialalai.”

³¹ Ku Batheseba la sukubu, si iya kai, “Tamatamali ka talialalai ka Davidi banzai!”

³² La pacungulu, ku Davidi ka talialalai wacunu ki umawmase katwase dawlu ki Zaduke ka barakalai, Nathange ka yuginsia, si Binaia ka lalake ki Yehuiada kainganai. Kwini lalasu sa kidawlu si kela yai,

³³ ku Davidi ka talialalai amia kai liniane, “Lri madredresenge numi ki latabebelenge ki daane ki talialalai, ku lalakeli ka Sulumungu la pangukaiya ki ngiririgili, la sateatedre iniane mwa ka Gihunge thili ki berai ka acilai.

³⁴ Ikai kwini, ku Zaduke si Nathange lri pulawlau si cegecege iniane atalialalai ki swa Iseraylri. Lri ngirapa numi tawtau iya kai, ‘Talialalai ka Sulumungu banzai!’

³⁵ Ala lri sateatedre numi iniane siwlri mwa kai; kwi lasu lri mubelenge nene ki taetalaneli, mucungulu nakwane atalialalai, asi lwiyane wapilringa naku iniane kalri rathudu ki swa Iseraylri si swa Yuda.”

³⁶ Ku Binaia la iya kai, “Ku takidremedremane ki talialalai aningimia! Ku Tamatama ka Twaumasesu anipangimia kikai.

³⁷ Ku tapangimiane ki Tamatama tapalra ki talialalai, ku Twaumase ani tuthadalrane tapalra ki Sulumungu, ku taatalialaladhaneini lani aru ngiradhekane!”

³⁸ La pacungulu, ku Zaduke ka barakalai, Nathange ka yuginsia, Binaia ka lalake ki Yehuiada, si tarapalakelakebe ki daane ki talialalai la pangukai ki Sulumungu ku ngiririgi ki Davidi ka talialalai, si sateatedre iniane mwa ka Gihunge thili ki berai ki acilai.

³⁹ Ku Zaduke patwalai ki tapikaiyane ki Langiane ka Alrivilrivi ka balrawbau iluku ku vaeva ku lawngu pasuete ku alrivilrivi ka lawlau si pulawlau ki Sulumungu. La pacungulu kwi lalasu ngirapa, ku laumawmase la makakawkau kiraragai iya kai, “Sulumungu ka talialalai banzai!”

⁴⁰ Ala tupapalra ki Sulumungu kainganai siwlri, tara kadalranane makakawkawkau kiraragai, si ngibulalrilalri, ku lingau ku akwadravane watedretedrese ku kadaengane.

⁴¹ Ku Aduniya si labadhabadhaini tau tulrepelrepenge ku ngiakaneane lini, la kilalra kikai lingau. Ku Yuabe sa kilalra kwini lingau ki rapa, la kivaga, “Watumane kwi cekele? Aningithanga akwadrau kwi lingau manemane kwi pacugane?”

⁴² Kwi lalasu la kaiyana akulrepenge ku vaga lini, la kela ku Yunathange ka lalake ki barakalai ka Abiathare. Ku Aduniya la iya kai, “Bwala udaana! Matharirisu ka umawmase, lri tara ilukusu ku mathariri ku vaga.”

⁴³ Ku Yunathange la iya kai, “Malisi! Ku Davidi ka talialalai wacegecegenga ki Sulumungu patalialalai.

⁴⁴ Kwi lasu pakamani ki Zaduke ka barakalai, Nathange ka yuginsia, Binaia ka lalake ki Yehuiada, si sakaredele ki tarapalakelakebe ki daane ki talialalai sateatedre ki Sulumungu, la pangurigi iniane ku ngiririgi ki talialalai.

⁴⁵ Ku Zaduke si Nathange yakai kavai Gihunge thili ki berai ka acilai pulawlau iniane patalialalai. Kwi lalasu wasateatedre iniane mucekele, la tarakadalranane makakawkawkau kiraragai; ku laumawmase la makakawkawkau. Amani kwini tau kilalralalrasu kwi lingau.

⁴⁶ Ku Sulumungu mwataetalanenga.

⁴⁷ La kaika paiya kai sikakathane, adravane ka tabebelenge ki daane ki talialalai makanaelre mialri katwase kidrele ki Davidi ka talialalai, si iya kai iniane, ‘Ku Twaumasesu ani ka paparawramuru ku takimatikaiyane ku nagane ki Sulumungu muswane, ka ngiraeradhekane muswane!’ Ku Davidi ka talialalai yakai ki tapeapecane guruthungane sukubu,

⁴⁸ la inulri iya kai, ‘Tadrengedrengere ki Tamatama ka Twaumase ki swa Iseraylri! Kaikameane pakamani ki tangea ka mwabaibalrithi nakwane pawcungulu kai ki taetalane ki takatalialaladhaneli. Sapanianianiakanaku la padreleana naku kikai!’ ”

⁴⁹ Ku labadhabadha ki Aduniya la ngituluku si ukuludru turamuru makanaelre, kwini lalasu la makakaai ngidrakale acegecege, si mawvagavagai makanaelre, katwase ku liniane.

⁵⁰ Ku Aduniya la ngwalai ki ukuludrane ki Sulumungu la katwase lailai mudaane ki tapikaiyane ki Langiane ka Alrivilrivi ka balrawbau, si kiraisi ki piyu ki tapatarumaramarane.

⁵¹ Yakai ku peaelaela ki Sulumungu ka talialalai iya kai, ku Aduniya ngwalai ki sawkukuludru iniane la katwase kiraisi ki piu ki tapatarumaramarane, la iya kai, “Lri pakiketeketaku ki Sulumungu ka talialalai, ku kaika apapacadhane nakwane.”

⁵² Ku Sulumungu la iya kai, “Kwi lasu alaiyasi savaeva ku kidremedreme papia nakwane, adravane ka vaeva ka isiuini kai lri mururu; kwi lasu alaiyasi pakalrithavulu, lri tara paacai.”

⁵³ Ku Sulumungu ka talialalai la sikawlu ki umawmase katwase alra ki Aduniya patwalai ki tapatarumaramarane iluku kainganai mulebe. Ku Aduniya la katwase kidrele ki Sulumungu ka talialalai, si ikai cucubungu ki talialalai sukubu. Ku talialalai la iya kai iniane, “Lu katwasa mutavanane.”