1 Lacaili 9 - Ngudradreadrekadhane Ka Sisiu 魯凱語聖經

Siaulringa ka lakiaravase

¹ Sanaka swa Iseraylri singiakaai ku tamasakaikaiyane ki cucungulane kipacase ikai ki lrikisi ki Latalialalai ki swa Iseraylri ka hungu. Ngwalai sa pasalriu la kipathavungu ku swa Yuda, la kiravase pwa kavai Babilunia.

² Ku aswalaalanga siwlri mwa ki cekele lini, si ikainga ki kadaengane lini yakai ku langumawmawmase, barakalai, swa Lrivi si taramarasikai ki daane ki Tamatama.

³ Lazuku ki swa Yuda, Biniyamingi, Iparaime si Manase la ikaikai Yerusalrime.

^4-6 Tai 690 ku wacekecekele ki zuku ki Yuda ku yakaikai Yerusalrime. Ku Uthai ka lamwabaibalrithi ki Pereze ka lalake ki Yuda amani ku tarasangililuku liniane. Ku Uthai lalake ki Amihude, agane ki Umeri, ku la cucungulaneini yakaiyana ku Imeri si Bani. Ku lalake ki Yuda ka Selu kudra lamwabaibalrithi iniane ka Asaia amani ku tarasangililuku liniane. Kai Asaia amani ku tamatama kai ki wacekecekele. Ku lalake ki Yuda ka Zera kudra lamwabaibalrithi iniane ka Yeuile tarasangililuku liniane.

^7-8 Ku nagane ki yakai Yerusalrime ka swa Biniyamingi: Salu: Lalake ki Misulame, agane ki Hudavia, kacui ki Hasenua, Ibenia: Lalake ki Yeruhame, Ila: Lalake ki Uzi, agane ki Mikeri, Misulame: Lalake ki Sepatia, agane ki Reuele, kacui ki Ibenia.

⁹ Tai 956 ku wacekecekele ki zuku ki Biniyamingi ku yakaikai Yerusalrime. Kikai la nipacasane yadrepele ka tamatama ki wacekecekele.

Swatelrainga Yerusalrime ka labarakalai

^10-12 Kikai lebe yai amani ku yakaikai Yerusalrime ka labarakalai: Yedaia, Yehuiaribe, Yakingi, Azaria ka lalake ki Hilekia (tamatama ki taradrangalru ki daane ki Twaumase, ku cucungulaneini: Misulame, Zaduke, Meraiuthe si Ahitube), Adaia (lalake ki Yeruhame, ku cucungulaneini: Pasehure, Malekia), Masai (lalake ki Adiele; ku cucungulaneini: Yahezira, Misulame, Misilemithe si Imere).

¹³ Ta 1,760 ku abarakalai ki tamatama ki wacekecekele, malrigili makanaelre marasikai ku awngane ki daane ki Twaumase.

Swatelrainga ikai Yerusalrime ka swa Lrivi

^14-16 Kikai lebe yai amani kai ku yakai Yerusalrime ka swa Lrivi: Semaia (lalake ki Hasube, ku cucungulaneini: Azerikame si Hasabia, zuku ki Mirari), Bakebakere, Herese si Galale, Matania (lalake ki Mika, ku cucungulaneini: Zikeri si Asape), Ubadaiya (lalake ki Simaia, ku cucungulaneini: Galale si Yedutune), Berekia (lalake ki Asa, agane ki Ilekana, kwini lalasu yakaikai talikai cekele Nitupa).

Swatelrainga ikai Yerusalrime ka tarakadrenge ki daane ki Twaumase

¹⁷ Ku yakai Yerusalrime ku tarakadrenge ki daane ki Twaumase: Salume, Akube, Talemune si Ahimane. Ku tarasangililuku liniane yai Salume.

¹⁸ Ikai kwini ki vai kikai lalasu taikaiyane ki tali talrawane ki Talialalai ka lrawlrawdru kadrekadrenge, kai lalasu naamani ku tarakadrekadrenge ki taelelebane ki taikaiyane ki swa Lrivi.

¹⁹ Ku agane ki Ibiasape, lalake ki Kure ka Salume, maelre ki laretesane lini ka zuku ki Kura, kicapili kadrenge kwini ki samamudaane ki Alrivilrivi ka balrawbau. Ku cucungulane lini yai amani ku marasiakai kadrenge ki taikaiyane sulai ka balrawbau ki Tamatama.

²⁰ Ku lalake ki Ilriazare ka Pinehase nakiacapili liniane, ku Tamatama tapalra iniane!

²¹ Ku lalake ki Miselemia ka Zakaria mialri ka tarakadrenge ki Alrivilrivi ka balrawbau ki Tamatama.

²² Ta 212 ku kiapilri ka tarakadrenge ki samamudaane si lalrawlrawdru. Kwini lalasu singikai ki lacekele lini si kipacase pikai ki tamasakaikaiyane. Ku talialalai ka Davidi si yuginsia ka Samuile wamalra kikai tinukucingalrane ka awngane sudralru liniane.

²³ Kwini lalasu si mwabaibalrithi liniane pacungulu kadrenge ki lrawlrawdru ki daane ki Tamatama.

²⁴ Ikai ki lrawlrawdru tali talrawane, sapakalriwgu, tali lrawdru si tali dradha, yakai ku kiacapili ki tarakadrenge ki vavaeva ki lrawlrawdru.

²⁵ Kikai tarakadrenge lakamani kwini picekelane ka laretesane ku paraluralubu, mathulriwlrithi kadrenge, maka pitupitulu ki nisangu valane.

²⁶ Kwini tasupate ka kiacapili ki tarakadrekadrenge yadrepele ka swa Lrivi, amanilringa ku marasiakai. Kwini lalasu mialri drangalrungalru ku tapeapecane si drawsulu ki daane ki Twaumase.

²⁷ Kwini lalasu ngiathalringulu ki daane ki Twaumase ku taikaikaiyane lini, asi lwiyane kwi lalasu amani ku wakadrekadrenge ki daane ki Twaumase, ka amani ku mwaelebe ki lrawlrawdru ki daane ki Twaumase luka mialrealre ki vaivai.

Drumanenga ka swa Lrivi

²⁸ Ku drumane ku swa Lrivi marasiakai drangalru ki latakaiyane ka saarakaikaiyane drihai. Lu arakai kikai latakaiyane, pulatadre, pudringai, kwini lalasu lri tara asipi singibila.

²⁹ Ku drumane ku swa Lrivi tarapikaikai ku takaiyane si milrikinku, bava, lawlau ka ulrive, sangwalreme si sapasangulrelremane.

³⁰ Ai kudra tarapaibibu ku sapasangulrelremane awnganenga ki barakalai.

³¹ Swa Lrivi ka Matatia ka takatakanga ka lalake ki Salume ka zuku ki Kura, amani ku tarapadulrudulru ku akamane ku sapatarumarane.

³² Ku umawmase ki zuku ki Kuhathe marasiakai ki saarakaiyane ka pange ki daane ki Twaumase luka Taisadrasadrane ka vai.

³³ Yakai ku tai Lrivi ku marasiakai ki asenadhane ki daane ki Twaumase. Ku tamatama kai ki wacekecekele yakai ki taipiane ku tapeapecane ki daane ki Twaumase, kadrwa ku drumane ku kipuawngane lini, asi lwiyane kwini lalasu twarakete taleare mukalava ku amwane ki awngane lini.

³⁴ Kikai la nipacasane, singikai ki tamasakaikaiyane, yadrepele ka tamatama ki wacekecekele ki Lrivi, kwini lalasu makitwa ikaikai Yerusalrime.

Cucungulane si lamwabaibalrithi ki talialalai ka Saule

³⁵ Twacekele Gibiungu ku Yiele, swatelrainga ikaikai kavai. Ku labaibaini sia Maka.

³⁶ Ku takatakanga ku lalakeini sia Abedungu, ku drumane ku lalalakeini: Zure, Kise, Baale, Nere, Nadabe,

³⁷ Gedure, Ahiu, Zakaria si Mikeluthe.

³⁸ Ku Mikeluthe tama ki Simiame, ku lamwabaibalrithi liniane yakaikai Yerusalrime, kaika kuthainwane ku madadailane ki drumane ki wacekecekele lini.

³⁹ Twalalake ki Kise ku Nere, twalalake ki Saule ku Kise. Tasupate ku sawvalalai ka lalalake ki Saule: Yunathange, Malekisua, Abinadabe si Isebaale.

⁴⁰ Ku Yunathange twalalake ki Miribale; ku Miribale twalalake ki Mika.

⁴¹ Ku Mika tasupate ku sawvalalai ka lalalakeini: Pithungu, Mileke, Taria si Ahaze.

⁴² Twalalake ki Yara ku Ahaze. Tatulru ku sawvalalai ka lalalake ki Yara: Alemete, Azemavete si Zimeri. Twalalake ki Muza ku Zimeri,

⁴³ twalalake ki Binia ku Muza, twalalake ki Ripaia ku Binia, twalalake ki Ilriasa ku Ripaia, twalalake ki Azele ku Iliasa.

⁴⁴ Taeneme ku sawvalalai ku lalalake ki Azele: Azerikame, Bukeru, Isemaele, Siaria, Ubadaiya si Hanange.