1 Lacaili 5 - Ngudradreadrekadhane Ka Sisiu 魯凱語聖經

Lamwabaibalrithi ki Riwbingi

¹ Kikai amani ku lamwabaibalrithi ki takatakanga ka lalake ki Yakubu ka Riwbingi. (Ku Riwbingi pasalriu ki labaibai ki tamaini, lakamani ku kitwamudu ku takatinutakananeini ku nagane. Kikai nagane la baai ki Yusepe.

² Ku zuku ki Yuda sapupukuanenga, twalai iniane ngibwale ku tangea ku tarasangililuku, rathudu pakanaelrenga ki lazuku.)

³ Ku takatakanga ku lalake ki Yakubu ka Riwbingi tasupate ku sawvalai ka lalake: Hanuke, Palu, Hezerunge si Karemi.

^4-6 Kikai amani ku Yuile ka singiakai ki ngwakai ki tama mawcucungulu ka lamwabaibalrithi: Simaia, Guge, Simi, Mika, Reaia, Baale si Bera. Ku Bera tamatama ki zuku ki Riwbingi, la kiravase ki tinuhika ki Asiria ka Tigelathe Pilesere.

⁷ Ku nipacasane ku latamatama ki zuku ki Riwbingi: Yiele, Zakaria,

⁸ si Bila. Ku Bila lalake ki Azaze ka sawvalai, agane ki Sema, swakai ki zuku ki Yuile. Ku laumawmase kai ki zuku yakaikai Arure, yakai ku yakai tali dradha ki kabicelrakane ki Nibu si Baale Miune.

⁹ Kwini lalasu yakai ku thathatha ku lanilapulapwane ikai Gileade, lakamani kwi lalasu ku malranga lini drikisi kwini tali talrawane ka calragulragu, pakela kavai kadravane Yuparati.

¹⁰ Saka zidai ki Saule ka talialalai, ku zuku ki Riwbingi kiakaruburu ki swa Hagare, si papacai liniane, malranga drikisi patuelre kwini kadaengane ki tali talrawane ka Gileade.

Lamwabaibalrithi ki Gade

¹¹ Ku zuku ki Gade yakai ki tali dradha ki zuku ki Riwbingi kavai talikai Basane, si papia tali talrawane kela kavai Saleka.

¹² Ku amanilringa ku twapathagili kwini ki zuku amani ku Yuile; ku mwasakadrusa ku twapathagili yai amani ku Sapame. Ku yakai ki tali Basane ku drumane ka zuku ku twapathagili amani ku Yanai si Sapate.

¹³ Ku drumane ku umawmase ki zuku ki Gade amani kikai taipitwane ka lazuku: Mikaele, Misulame, Seba, Yurai, Yakange, Zia si Ibere.

¹⁴ Kai lalasu yadrepele ka sawvalai ka lalake ki Huri ka mwabaibalrithi ki Abihaile. Ku cucungulane lini lu dungudungane papucucubungu amani ku: Abihaile, Huri, Yarua, Gileade, Mikaele, Yesisai, Yahedu, Buze.

¹⁵ Sawvalai ka lalake ki Abediele, ka agane ki Guni ka Ahi amani ku tamatama kai ki zuku.

¹⁶ Kai lalasu yakaikai talikai Basane si Gileade, si sanaka ubulane dratane kavai Sarungu.

¹⁷ Kikai tapacasane kai amani saka zidai ki talialalai ki swa Yuda ka Yuthame si talialalai ki swa Iseraylri ka Yerubuame.

Kwapingi ki lazuku ki tali talrawane

¹⁸ Ku Riwbingi si Gade ka taidrusa ka zuku si zuku ki tali talrawane ki Manase yakai ku nipakundringane ka tagagarange ku kwapingi ku ta 44,760 ku umawmase, kwini lalasu malrigili arakai ku alathare, lrabu si dramu si lraili.

¹⁹ Kwini lalasu kiakaruburu ki Yeture, Napise si Nudabe ki swa Hagare.

²⁰ Kwini lalasu swadralru ki Twaumase, papia iniane kitubi ku akiparalubane, ku Twaumase la kilalra ku inulri lini, la malra kwini ki swa Hagare si langiaelre liniane ka lakuni baai pwa ki alrima lini.

²¹ Kwini lalasu patwalai ki badha ribici ku 50,000 ku lrakeda, 250,000 ku kiu, 2,000 ku ruba, la ravase ku ta 100,000 ku umawmase.

²² Kwini lalasu la papacai ku tapangale ku badha, asi lwiyane kikai tamakakaruburane yai twalai ki takidremedremane ki Twaumase. Kwini lalasu yakaikai kavai, pakeela ku takipacaicaliane lini.

Zuku ki swa tali talrawane ki Manase

²³ Ku zuku ka swa tali talrawane ki Manase yakaikainga talikai Basane, papia tali dradha kela kavai Baale Heremungu, Sinire si lregelrege Heremunge. Kwini lalasu ku umawmase lini padaalru edhale.

²⁴ Ku nagane ki tamatama ki lazuku: Ipare, Isi, Ilrile, Azeriele, Yerimia, Hudavia si Yahediele. Kikai lalasu yadrepele ka lamwakalrivili ka kwapingi, kimatikaikai ka tarasangililuku ikai ki zuku lini.

Kiaravase ku zuku ki swa talikai talrawane

²⁵ Ku mapapangale ki taidrusa ka swa tali talrawane ka zuku si pararamau ka zuku kai savaeva ku kidremedreme lini ki Twaumase ki cucungulane lini, la cilri kidaili iniane, la mwa sukubu ki twaumase ki nayakai kwini ki kadaengane ka umawmase; ku Twaumase napatwalai kikai ki kadaengane pakatwase kwini ki sakwaikai kwini ka laumawmase.

²⁶ Lakamani ku Twaumase pakela ki tinuhika ki swa Asiria ka Pule (mialri ka sia Tigelathe Pilesere) mucekele liniane. Ku tinuhika ka Pule la ravase ki umawmase ki zuku ki swa Riwbingi, swa Gade si swa talrawane ki zuku ki swa Manase, la malra liniane ka tapikaiyanenga Hala, Habure si Hara si babiabila kadravane Guzange.