1 Lacaili 26 - Ngudradreadrekadhane Ka Sisiu 魯凱語聖經

Tarakadrenge ki daane ki Tamatama

¹ Ku tarakadrenge ki daane ki Tamatama ka swa Lrivi ku tapavavalane ku awngane miyaiya kai: Ku zuku ki Kura yakai ku Miselemia ka lalake ki Kure, ka tai Asape.

² Tapitu ku sawvalalai ku lalalakeini, singikai ki takatakanga: Zakaria, Yediale, Zebadia, Yathenile,

³ Ilame, Yehuhanange si Ilihuinai.

⁴ Ku tangeanga sia Ubide Idume. Ku Twaumase swabulrubulru iniane, kwini lasu tavalru ku sawvalalai ku lalalakeini singikai ki takatakanga: Simaia, Yehuzabade, Yua, Sakare, Nathaniele,

⁵ Amiele, Isakare si Piulethai.

^6-7 Ku takatakanga ku lalake ki Ubide Idume ka Simaia taeneme ku sawvalalai ku lalalakeini: Utheni, Ripaile, Ubide, Ilezabade, Ilrihu si Semakia. Kwini lalasu ikai ki zuku lini yadrepele ka kiatukucingalre ka laumawmase, asi lwiyane kai lalasu talrilrigili makanaelre, inilringa kikai abilrili ka tadrusa mwakalrivili ku lrigilane.

⁸ Ku tai Ubide Idume ta 62 ku talrilrigili wadulru pangimia kikai awngane lini.

⁹ Ku tai Miselemia ta 18 ku wadulru kipuawngane.

¹⁰ Ku tai Mirari yakai ku Husa, tasupate ku sawvalalai ka lalalake ki Husa: Simeri (kaika takatakanga, ai ku tamaini pakamani iniane atarasangililuku),

¹¹ Hilekia, Tibalria si Zekaria. Ku tai Husa ta 13 ku tarakadrenge ki daane ki Tamatama.

¹² Singikai ki ladadaanane, ku tarakadrenge ki daane ki Tamatama twa taipiane ku kumiane. Kwini lalasu kiasikawlu ikai ki daane ki Tamatama marasikai ku laawngane, mararaamau ki drumane ka swa Lrivi.

¹³ Ku taingeea ku ladadaanane, kai wasusu ku takalra ku tabekele, tinwakuzibiki kelrete ku tasakaiyane ku lrawlrawdru ku akicapilane kadrenge.

¹⁴ Ku Selemia wamalra tali talrawane ka lrawlrawdru; ku lalakeini ka Zakaria amani kwidra malrilrigili kidremedreme ku apiane, wamalra tali dradha ka lrawlrawdru.

¹⁵ Ku Ubide Idume wamalra ka tali lrawdru lrawlrawdru, kudra tapiya ku lalalakeini wamalra ki taseketane.

¹⁶ Ku Supime si Husa wamalra ki tali sapakalriwgu si tali thilane ki kadalranane ki Salekethe ka lrawlrawdru. Ku takadrekadrengane singiakai ki zikange pavavala tukemiane, si mapatarumaramara.

¹⁷ Ku tali talrawane ka lrawlrawdru taeneme ki vaivai kadrenge, ku tali dradha tasupate, ku tali lrawdru tasupate, ku wakadrenge ki taseketane lukavaivai mialri tasupate; kwini vaeva ku taseketane tadrusadrusa.

¹⁸ Kwini ki adeethe ki tali sapakalriwgu ka ruka tasupate ku wakadrekadrenge ithili ki kadadalranane, tadrusa ku wakadrenge ki tali daane ki ruka.

¹⁹ Kikai amani ku kipavavala lini kipakadrenge ki zuku ki Kura si Mirari.

Drumane ku akipuawngane ikai ki daane ki Twaumase

²⁰ Ku drumanenga ku swa Lrivi wadrangalru ki tapikaikaiyane ku takuciacingalre ka lawbubulu si tapikaikaiyane ku lanipatarumarane ki daane ki Twaumase.

²¹ Ku lalake ki Geresune ka Ladange amani ku cucungulane ki takaalra ka ladadaanane, paelre ki wacekecekele ki lalakeini ka Yehile.

²² Ku drumane ku tadrusa ku lalake ki Ladange ka Zethame si Yuile tarakadrenge ki daane ki Twaumase ka tapikaiyane ku takuciacingalre ka lawbubulu si taseketane.

²³ Ku lamwabaibalrithi ki Amerame, Izehare, Hiburungu si Uzile mialri kisikawlu ku awngane lini.

²⁴ Ku Sebuile ka zuku ki Geresume ka lalake ki Musi tamatama ki tarakadrenge ki tapikaiyane ki takuciacingalre ka lawbubulu ki daane ki Twaumase.

²⁵ Kwini lasu yakai ku tamaretetesane ki Silumithe, asi lwiyane ku cucungulaneini ka Ilriezere agi ki Geresungu. Ku Ilrizere twalalake ki Rihabia; ku Rihabia twalalake ki Yesaia; ku Yesia twalalake ki Yurame, ku Yurame twalalake ki Zikeri, ku Zikeri twalalake ki Silumithe.

²⁶ Ku Silumithe si lawacekecekeleini marasiakaikai patuelre ku nipatarumarane ki Twaumase ku saceacebe, paelre ku patarumara ki talialalai ka Davidi, ku patarumara ki latamatama ki ladadaanane, la ikaiyana ku la patarumara ki tarasangililuku ki lazuku si tabebelenge ki kwapingi.

²⁷ Kwini lalasu wamalra kwini lamalra lini patwalai ki takikaruburane ku lamanemanenga patarumara, tusarakaiyane pudriadringai ki daane ki Twaumase.

²⁸ Kwini nipatarumarane pasikai ku sarakaikaiyane ki daane ki Twaumase wabaai ki Silumithe si wacekecekeleini pamarasikai, paelre ku patarumara ki yuginsia ka Samuile ku acebeini, patarumara ki Saule ku acebeini, ku patarumara ki lalake ki Nere ka Abinere si lalake ki Ziruia ka Yuabe ku acebe lini.

Awngane ki drumane ki swa Lrivi

²⁹ Ikai ki lamwabaibalrithi ki Izehare, ku Kinania si lalakeini kiasikawlu kicapili ki ngwakai ki lapacase ka awngane: Marasikai ki apudriadringadhane ku nipacasane, marasikai ku aturathudanane ki la makaririvu ki swa Iseraylri.

³⁰ Ikai ki lamwabaibalrithi ki Hiburungu, ku Hasabia si ta 1,700 ku talrilrigili ku laretetesaneini kiasikawlu marasikai patuelre ku ngwakai ki takisuswane si ngwakai ki mapapangale ka awngane ki swa Iseraylri ki swa tali sapakalriwgu kadravane Yuredange.

³¹ Ku Yeria amani ku tarasangililuku ki lamwabaibalrithi ki Hiburungu. Saka taramasupatele ka caili ku takatalialaladhane ki Davidi, la asipi singibila kai ki wacekecekele ka lamwabaibalrithi ki Hiburungu, la thingale kikai wacekecekele kudra tamagarange ka kwapingi yadrepele ka yakaikai ki Yazere kavai talikai Gileade.

³² Ku talialalai ka Davidi patwalai ki laretesane ki Yeria pilri ku ta 2,700 ku malrigili ka latamatama ki ladadaanane, sikawlu liniane marasikai talikai talrawane kadravane Yuredange, amani kavai Riwbingi, Gade si talikai talrawane Manase ka ngwakai ki takisuswane si ngwakai ki awngane ki mapapangale ki swa Iseraylri.