1 Lacaili 23 - Ngudradreadrekadhane Ka Sisiu 魯凱語聖經

¹ Saka tarudrawdrangenga ku Davidi, la cegecege ki lalakeini ka Sulumungu atalialalai ki swa Iseraylri.

Takipuawnganane ki swa Lrivi

² Ku Davidi ka talialalai wadawlu sarubu makanaelre ki tarasangililuku ki swa Iseraylri, barakalai si la swa Lrivi.

³ Kwini lasu waasipi ku taramatulrulunga ku caili papubebelenge ku swa Lrivi ka sawvalai, elreelre ta 38,000.

⁴ Ku talialalai la sikawlu ku ta 24,000 ku tarakipuawngane ikai ki daane ki Tamatama, ta 6,000 ku taramarasikai ki lapacase si taraturathurathudane ki la makarivurivu,

⁵ ta 4,000 ku tarakadrekadrenge, ta 4,000 ku taramarasikai ki sapasenasenadhane ku padulru ki talialalai, kamani ku taradrengedrengere ki Tamatama.

⁶ Ku Davidi pasingiakai ki taka tai aneanane ka zuku ki swa Lrivi malra turedelane ki Geresune, Kuhathe si Mirari ka nipautulrwane.

⁷ Tadrusa ku lalalake ki Geresune: Ladange si Simi.

⁸ Tatulru ku lalalake ki Ladange: Yehile, Zethame si Yuile,

⁹ amani ku la tamatama ki lamwabaibalrithi ki lazuku ki Ladange. (Tatulru ku lalalake ki Simi: Silumithe, Hazile si Harange.)

^10-11 Tasupate ku lalalake ki Simi: Singikai ki marwarudrangenga: Yahathe, Zina, Yese si Beria. Ku lamwabaibalrithi ki Yeuse si Biria kai tathainu, lakamani ku paelrenga liniane asipi ka vaeva ka zuku.

¹² Tasupate ku lalalake ki Kuhathe: Amerame, Izehare, Hiburungu si Uzile.

¹³ Ku takatakanga ku lalakeini ka Amerame amani ku tama ki Arungu si Musi. (Ku Arungu si lamwabaibalrithi kiapilri ka tarakadrekadrenge ki lawbubulu ki daane ki Twaumase kapalralrawthunga, kicapili ki padalai ku sangwalreme sukubu ki Tamatama, marasikai iniane, si pangukai ki naganeini subulrubulru ki mapapangale.

¹⁴ Ai ku lalalake ki Umawmase ki Twaumase ka Musi swakainga ki zuku ki swa Lrivi.)

¹⁵ Tadrusa ku lalake ki Musi: Geresume si Ilriezere.

¹⁶ Ikai ki lamwabaibalrithi ki Geresume ku tarasangililuku amani ku Sebuile.

¹⁷ Ku Ilriezere tangeangea ku lalake ka sia Rihabia; mapangale ku lamwabaibalrithi ki Rihabia.

¹⁸ Ku mwasakadrusa ku lalake ki Kuhathe ka Izehare tangeangea ku lalake, sia Silumithe, amani ku tamatama kai ki zuku.

¹⁹ Ku mwasakatulru ku lalake ka Hiburungu tasupate ku lalalake: Yeria, Amaria, Yahazile si Yekamiame.

²⁰ Ku mwasakasupate ku lalake ki Kuhathe ka Uzile tadrusa ku lalake: Mika si Iseya.

²¹ Tadrusa ku lalake ki Mirari: Maheli si Muse. Tadrusa ku lalake ki Maheli: Ilriazare si Kise.

²² Kai twalalake ku sawvalai si pacai ku Ilriazare, kathane ku laababai ku lalakeini. Kwini lalalakeini wamwa ki lakadradralra lini, ki lalalake ki Kise.

²³ Ku mwasakadrusa ku lalake ki Murari ka Muse tatulru ku lalalake: Maheli, Idere si Yeremuthe.

²⁴ Kilakikai ala amani ku lamwabaibalrithi ki Lrivi, singikai ki maretetese si dadaanane, singibila pacase nguvavaeva. Sanaka taramapusalenga ka caili papubebelenge makanaelre makitu kipaelre ki awngane ki daane ki Tamatama.

²⁵ Ku Davidi la kawriva, “Ku Tamatama ka Twaumase ki swa Iseraylri patarwamara ku sulivatane ki kawkawluini; lri ngikakamani ikaikai Yerusalrime palralrawthu.

²⁶ Lakamani kwidra, ku swa Lrivi kai lri bububulringa ku Alrivilrivi ka balrawbau ki Tamatama si drumane ka sarakaikaiyane sukubu ka lawbubulu.”

²⁷ Singikai ku tacunane ki Davidi sa lri pacainga, sanaka taramapusalenga ku caili ka swa Lrivi lri kipacase makanaelre,

²⁸ ku kiasikawlu marasikai ki awngane: Lri paralubu ki abarakalai ka mwabaibalrithi ki Arungu marasikai ku awngane ikai ki daane ki Tamatama, la lri marasikai ki kalatadrane ki daane ki Tamatama si tapeapecane, lai marasikai bula ku tinumabulane ka lawbubulu;

²⁹ lri marasikai padulru ku apatarumarane ki Twaumase ku pange, sapatarumarane ka milrikinku, kaika nipawsemakane ka pange, niakamane ka sapatarumarane, si nipaibwane ku lawlau ka ulrive ka lrevege ka milrikinku. Kwini lalasu lri tintingi, kelrete ku sapatarumarane ki daane ki Twaumase.

³⁰ Kwini lalasu lukamialrealre lukamiauawbu lri tara drengedrengere lrigu ki Tamatama;

³¹ sanaka Taisadrasadrane ka vai, ki aswalalanga ka vai ki dramare, ki drumane ka tatulrisisisiane ka vai, lu patarumaramara ku Lama ka lrisi ki Tamatama, lri singikai ku takelretane ku umawmase si kakwakudhane marasikai ku asukubane ki Tamatama.

³² Kwini lalasu kiacapili marasikai drangalru ku Alrivilrivi ka balrawbau si daane ki Tamatama, si paralubu ki laretesane lini ka lamwabaibalrithi ki Arungu marasikai ki laasukubane ikai ki daane ki Tamatama.