1 Lacaili 22 - Ngudradreadrekadhane Ka Sisiu 魯凱語聖經

¹ Ku Davidi la kawriva, “Ku daane ki Tamatama ka Twaumase lri pikai kikai tudaane, kikai amani ku tapatarumaramarane ki mapapangalane ki swa Iseraylri ku Lama ka lrisi.”

Padulru ku atudaanane ku daane ki Twaumase

² Ku Davidi ka talialalai wadrekase pakanaelre ki singibabadhane ki yakaikai Iseraylri paisarubu, sikawlu liniane ka taratulrenelrenege. Yakai ku padulrudulru ku lrenege ka sarakaiyane tudaane ku daane ki Twaumase.

³ Ku Davidi la baai pakakaalra ku adreme, sarakaiyane kedrekedre ka sakedrekedre si kalravisi ki bali ki lrawlrawdru, la baainga pakakaalra ku lriwlu, ku kalrane kai maka watintinginga.

⁴ Ku mapapangale ki Tayre si Sidune la mialri salri ku cedare ka angatu pakathathatha baai ki Davidi.

⁵ Ku Davidi la kidremedreme, “Kai lalakeli ka Sulumungu ku atudaananeini ku daane ki Tamatama lri tara ka kikingiane theelare, kimapelaela ki yakawmasane. Ai vavalakeana, kadrwana ku takilringavaneini, lakamani kwidra lri tara padulrwaku patueelre”. Ku Davidi sakaiyana pacai padulrunga ku thathatha ku lasatudadaanane.

⁶ Ku Davidi la dawlu ki lalakeini ka Sulumungu, si cunu ku apasikaiyaneini ki Tamatama ki Twaumase ki swa Iseraylri tudaane ku daane ki Tamatama.

⁷ Ku Davidi la kawriva iniane, “Lalakeli, nau pasikai ki Tamatama ka Twaumaseli tudaane ku taluvale ku daane ki Twaumase naamia kai kidremedremeli,

⁸ ai ku Tamatama la iya kai nakwane, amani sa papacadhaku ku takalra ku umawmase, kakalra ku takikaruburane, patueraerai ki umawmase ku tathathatha, la kai palraingi ku pasiakaiyaku iniane tudaane ku daane ki Tamatama.

⁹ Ai pwakawnu nakwane ku vaeva. Amia kai, ‘Lri ikai ku tangea ku lalakesu. Ikai ki tarathudaneini lri ngiradheradhekane ku kuni si kasulivalivate ku mapapangale, asi lwiyane lri badhaku iniane ku masulivalivate ku vai, kai kivangavange ki badha. Ku nagane lri si Sulumungu; ikai ki taatalialaladhaneini, lri patarumaraku ki swa Iseraylri ku makadawdawdalru akalakebane.

¹⁰ Kwini lasu la lri pasikai nakwane tudaane ku taluvale ku daane ki Tamatama. Lrika lalakeli iniane; la lrika amaniaku ku atama iniane. Lri pakapapedrengaku ku takatalialaladhananeini, ka palralrawthu rathudu ki swa Iseraylri.’ ”

¹¹ Ku Davidi la pacungulu kawriva, “Lalake, ku Tamatama ka Twaumasesu ani tapalrapalra muswane; ani pasusu ku puvagangaini, lasu kasasulivate pasikai iniane tudaane ku daane ki Tamatama.

¹² Ku Tamatama ka Twaumasesu ani patarumara muswane ku mwakalrivili ku lrigilane, dulru singikai ki hulriceini rathudu ki swa Iseraylri.

¹³ Lwiyasi la paluludusu ku pangukai ki Tamatama ki Musi pelaela si baai ki swa Iseraylri patuelre ku hulrice ka drekase, lri tara pangiesaisu. Kecengana, kagaranga; madha mukulukuludru, la madha kasulrisulri.

¹⁴ Ku ngwakai ki saarakaiyane tudaane ku daane ki Tamatama, pakaelrengaku ku pukuli sarubu lri ikaai ku 3,400 ka kuntungu ku kingi 34,000 ka kuntungu ku gingi ku saarakaiyane tudaane ku daane ki Tamatama, ku drumane yakaiyana ku kaika amakasiasipane ki lriwlu si adreme. La mialri padulrungaku ku lathinuradane si la nitulrenegane, ai kusu padrimaana padulru.

¹⁵ Takalra ku lri kaungu muswane, yakai ku yakai ki tatulrenegane kaungu, yakai ku tarasimintintu, si daikusange ki angatu, la ikaiyana kudra talrilrigili ku taratudaane.

¹⁶ Wadulru arakai ku kingi, gingi, lriwlu, adreme darepe ku lamaneemanenga. Kikai ala kirimwanga pathagili, ku Tamatama ani tapalra muswane”.

¹⁷ Ku Davidi la drekase pakanaelre ki tarasangililuku ki swa Iseraylri paralubu ki Sulumungu.

¹⁸ Kwi lasu amia kai, “Ku Tamatama ka Twaumase numi tatapalraane numiane, patarumara ku sulivatane palraelre numiane. Amanini ka parathudu nakwane ki naswakai kai, ka laminzuku makanaelre. Kikai laminzuku kaiasasanenga makitwa pasalaladhanga numiane si Tamatama.

¹⁹ Kunumi pakaelrea ku kidremedreme ku gathimi numi marasikaikai ki Tamatama ka Twaumase numi, la pathagili tudaane ku daane ki Tamatama. Lukamiyaiya kikai, ala lri dulrunga numi malra ku Langiane ki Tamatama si patuelrenga sanaka mabula ka sarakaiyane sukubu ka lamanemane pikainga daane.”