1 Lacaili 21 - Ngudradreadrekadhane Ka Sisiu 魯凱語聖經

Waasipi ku Davidi ku kusiki

¹ Ku Satange kiaecebe ki swa Iseraylri, ku Davidi la kalritheethe pangimia kudra asipane ki kusiki.

² Ku Davidi la drekase ki tamatama ki kwapingi ka Yuabe si drumane ka latabebelenge iya kai, “Lri mwa numi ki lacekele ki swa Iseraylri, twaladha kavai salrawlrawdrunga ka Bereseba kela kavai sadradradhanga ka Dange, asipi ki mapapangale; si thingale ku takathane ki mapapangale.”

³ Ku Yuabe la tubalre, “Ku Tamatama ani padrima ku umawmase ki swa Iseraylri ku takakalra lribate kai ki umawmase kaiasasane. Talialalai, ka lalasu sasiakawlusu makanaelre, asu kirimu pia kikai papasalriu ki mapapangale makanaelre?”

⁴ Ai ku talialalai makecenge ku apasalaladhane ki Yuabe kikai drekaseini. Ku Yuabe la katwase, mwa salraelre asipi ki swa Iseraylri, ala siwlri mwa Yerusalrime.

⁵ Ku Yuabe la papia ki Davidi ka talialalai peleala, ku lri dulru kikaruburu ku sawvalai ki swa Iseraylri ta 1,100,000; ku lri dulru kikaruburu ku sawvalai ki swa Yuda ta 470,000.

⁶ Ku Yuabe kai waasipi ku tatapiane ku umawmase ki swa Lrivi si zuku ki Biniyamingi. Asi lwiyane kwini lasu kai palrailraingi ku tadrekasane ki talialalai.

⁷ Ku Twaumase kai kiaragai kikai asipane ki umawmase ka awngane. Ngwalai kai la pathavungu ki swa Iseraylri.

⁸ Ku Davidi la iya kai ki Twaumase, “Paiyaku kikai maadrau turamuru ka pasalrivane; kiatubiaku muswane pacepaili! Makulrungu kai tapangimianeli”.

⁹ Ku Tamatama la kawriva ki Gade ka yuginsia ki Davidi,

¹⁰ “Lu mwa pelaela ki Davidi, lri papilriaku iniane ku taitulrwane, lu pilri ku manemane, lri pangitumanaku”.

¹¹ Ku Gade la mwa kikawriva ki Davidi, pelaela iniane ku taiyane ki Tamatama, si kivaga ki Davidi, “Lri pilrisu ki saininu?

¹² Atara tulrwane ka caili kasilrau? Atara tulrwane ka dramare ubere ki kwapingi ki badha? Lri ka Tamatama ka arakai ku dramuini lrumai, ikai ki kuni makatulrulu ku swalrubu, la sikawlu ki sasiakawlu belenge ikai kidruanga ki swa Iseraylri papacai? Kaiasasane ala kidremedreema, lri tumanaiyaku tubalre ki Tamatama”.

¹³ Ku Davidi la iya kai ki Gade, “Nau pakakucingalre. Kainaku palraingi kipathavungu ki umawmase; madadalamaku luka Tamatama ku pathavungu nakwane, asi lwiyane ku Tamatama swaete ku kalithane”.

¹⁴ Ku Tamatama la pulebe ku swalrubu mwa ki kinawmasane ki swa Iseraylri, la ta 70,000 ku wapacai.

¹⁵ Ku Twaumase la sikaawlunga ki sasiakawlu belenge mwa amudu Yerusalrime, ai salri pathagilinga ku sasiakawlu belenge, sa drele ku Twaumase, la ngiakusawlriane, la iya kai kwini ki sasiakawlu belenge, “Ala idrengera, makakelretenga!” Kikwini kwidra, ku sasiakawlu belenge yakai ki tavelavelatane ki mugi ki Arauna ka swa Yebuse.

¹⁶ Ku Davidi la drele kwini ki sasiakawlu belenge acegecege ikai belenge, ku alrimaini waecenge ku dramu, ka lri amudunga Yerusalrime. Ku Davidi si laciwru la makitu silaimai ku sakalremelremeane, ku lringau lini gwaruthungane ikai daedae sukusukubu.

¹⁷ Ku Davidi la inulri iya kai, “Twaumase, amanilringa naku ka pasalriu, amaniaku ka wadrekase paasipi ku kusiki. Kikai la matiakukuru ka laumawmase kai pasalriu. Tamatama ka Twaumaseli, kiatubiaku muswane pathavungaili si wacekecekeleli, si pacepe ki kawkawlusu”.

¹⁸ La pacungulu, ku sasiakawlu ki Tamatama peaelaela ki Gade, ku lrika adrekasaneini ki Davidi mwa kavai tavelavelatane ki mugi ki Arauna, ikai kwini pasikai ki Tamatama cegecege ku vaeva ku tapatarumaramarane.

¹⁹ Ku Davidi la singikai ku vaga ki Gade, pasalaladha ku drekase ki Tamatama katwase mwa.

²⁰ Ku Arauna si tasupate ka lalalakeini ka sawvalai yacengecenge ikai tavelavelatane velavelate ku mugi; kwini lalasu sa drele ki sasiakawlu belenge, kwini tasupate ka lalalakeini ka sawvalai la makitu mubere kilepenge.

²¹ Ku Arauna la drele ki Davidi ka talialalai kelakela papia iniane, la katwase ki tavelavelatane, arwa cucubungu guruthungane ikai daedae sukubu.

²² Ku Davidi la iya kai iniane, “Ala kilangadhaili kikai tavelavelatane ki mugi, la nau pasikai ki Tamatama cegecege ku vaeva ku tapatarumaramarane, lani idrengere ku swalrubu, lri singikaaiyaku ku takathane baai muswane”.

²³ Ku Arauna amia kai, “Talialalai, malra, la ngisasingikaai ku nau pia iyasu. Kavai lwange kaikatumane arakai tu Lama ka lrisi, la ikai kai savelavelatane ka angatu kai lri katumane arakai pwangatu, kai mugi kai lri katumane tu Taleke ka lrisi. Kilakikai patuelre lri baadhaku muswane”.

²⁴ Ai ku talialalai ka Davidi amia kai, “Ini! Lri tara pangimiaku ku takathaininwane langai muswane; kainaku lri papia ki Tamatama patarumara ku lamanemane, ku nivuthane malra ku sapatarumarane”.

²⁵ Ku Davidi ala arakai ku 600 ka kingi ka paisu papia ki Arauna langai kwini tavelavelatane ki mugi.

²⁶ Kwini lasu ala ikai kwini pasikai ki Tamatama cegecege ku taluvale ku tapatarumaramarane, la patarumara ku Lama ka lrisi si Sulivatane ka lrisi. Ku Davidi la inulri papia ki Tamatama, ku Tamatama la kilalra ku kitubini, la twalai belenge ku apwi mulebe, la lama kwini ki yakai ki tapatarumaramarane.

²⁷ Ku Tamatama la cunu ki sasiakawlu belenge sawlri kwini dramu, ku sasiakawlu belenge la pasalaladha.

²⁸ Ku Davidi la thingale, ku Tamatama ka kialalranga ku inulrini, la ikai kwini ki tavelavelatane ki mugi ki Arauna patarumara.

²⁹ Ku darepe ki Musi ikai calragulragu ku Alrivilrivi ka balrawbau ki Tamatama si tapatarumaramarane ki waudriwdripi kikai kwidra laka yakaaiana kavai Gibiungu ka tasukusukubane;

³⁰ ku Davidi kai lri dulru mwa kavai sukubu ki Twaumase, asi lwiyane kwini lasu mwakuludru ki dramu ki sasiakawlu ki Tamatama.