1 Lacaili 19 - Ngudradreadrekadhane Ka Sisiu 魯凱語聖經

Pamalebe ku Davidi ki swa Amune si swa Siria

¹ Sangilribatenga, ku talialalai ki swa Amune ka Nahase la pacainga; ku lalakeini ka Hanungu la mucungulu atalialalai.

² Ku Davidi la kawriva, “Lri makakathariraku ki Hanungu, mia ku tapangimiane ki tamaini ka Nahase makakathariri nakwane”. Lakamani ku Davidi siakawlu ku sasiakawluini mwa mapabebere. Ku lalasu samwa Amune mapabebere saasa ki talialalai ka Hanungu,

³ ku tarasangililuku ki swa Amune amia kai ki Hanungu, “Lu kidremedremesu ku sikawlu ki Davidi kela yai mwasakene ki natalialalai, si kela muswane saasa? Kai ka miyaiya kwini! Kwini lasu ku sikawluini kikai ki laumawmase kela kai pakai ku alrilrivane ku tangimiamianeta, ku lrika akelane malra kai ki kuni!”

⁴ Ku Hanungu la malra ruthuku kwini ki sikawlu ki Davidi ka tabebelenge, la kiriti kwini ngisingisi lini, la retege kwini laimai lini pangukai ki mapudukuduku, ala pakatwase liniane.

⁵ Kikai laumawmase ku takitusinalrelremeane, mainu turamuru, kai thuru siwlri. Ku Davidi sa kilalra kikai tangimiane, la sikawlu ki umawmase pelaela liniane ikaiyana Yeriku, lu kaelrengenga ku ngisingisi siwlria iya.

⁶ Ku swa Amune wathingalenga ka makakalisilisinga ki Davidi, la arakai ku 34,000 ka kunkingi ku gingi papia ki swa Upere Mesuputamia si swa Siria ka Maka si Zuba langai ku sakikaruburuburane ku palridingi si tarangurigi ku kwapingi.

⁷ Kwini lalasu la pawlrawlrau ku ta 32,000 ku sakikaruburane ka palridingi si lakwapingi ki talialalai ka Maka; kikai lakwapingi twatakwapingane ikai kwini adeethe Midiba. Ku swa Amune ku laumawmase makanaelre mialri twalai ki lacekele lini kainganai, padulru ku akikaruburane.

⁸ Ku Davidi la thingale ku tangimiane ala drekase ki Yuabe mailuku ki kwapingi makanaelre mwa kidresenge.

⁹ Ku swa Amune la katwase, si sakai kwini ki salralriwgu ka cekele Raba; kwini ngiaelre ka lakuni ka latalialalai la ikai thili ki cekele tilibi.

¹⁰ Ku Yuabe la drele kwini ki badha ka lri singilrilrikudru si singicucubungu madradresenge, la pilri kwidra tagagagarangenga ku kwapingi ki swa Iseraylri, si pakidresenge ki kwapingi ki swa Siria,

¹¹ ku drumane ka kwapingi la baai ki agini ka Abisai sangiluku. Ku Abisai la marasikai kikai ki lakwapingi kidresenge kikaruburu ki swa Amune.

¹² Ku Yuabe la kawriva ki Abisai, “Alaiyasi drelesu la pamakimaki nakwane ku swa Siria, wakela madu paralubu; alaiyasi ku Amune la pamakimaki muswane, lri keelaku paralubu muswane.

¹³ Kagaranga si kecengane; pasikai ki sakacekeleta si lacekele ki Twaumase kecengane kikaruburu! Ku Tamatama ani pangimia ku takidremedremaneini!”

¹⁴ Ku Yuabe la sangiluku ki lakwapingi mwa kikaruburu; ku swa Siria la amaki si katwase mawbebere.

¹⁵ Ku swa Amune sa drele ki swa Siria mawbeberenga, la mialri ubere ki Abisai, la siwlri mwa cekele. Ku Yuabe la katwase mwa ka Yerusalrime.

¹⁶ Ku swa Siria sa drele kipamalebenga ki swa Iseraylri, la dawlu ku lakwapingi ki lacekele ki swa Siria twalai tali talrawane kadravane Yuparati kainganai, la ka Subake ka abebeelengenga ki kwapingi ki talialalai ka Hadadizere ka swa Zuba ku wasangiluku.

¹⁷ Sa kilalra ku Davidi kikai vaga la velevele ki kwapingi ki swa Iseraylri, talubalre kadravane Yuredange, si cubungu ki kwapingi ki swa Siria tilibi. Sapathagili makakaruburu,

¹⁸ ku swa Iseraylri la pamalebe ki kwapingi ki swa Siria. Ku Davidi si kwapingini la papacai ku ta 7,000 ku tarangurigirigi ka kwapingi si ta 40,000 ku taradadadavace ka kwapingi, la papacai ki Subake ka abebeelengenga ki kwapingi ki swa Siria.

¹⁹ Ku talikaikai ki Hadadizere ka latalialalai sa drele la kipamalebenga ki swa Iseraylri, la kirimu makakadalru ki Davidi, si amalebe tupapalra. Twalainga kwini ku swa Siria la kai paraluralubunga ki swa Amune.