1 Lacaili 16 - Ngudradreadrekadhane Ka Sisiu 魯凱語聖經

¹ Kwini lalasu la malra ki Langiane ki Twaumase pudaane ki tapadulrwane ki Davidi ka balrawbau, ala papia ki Twaumase patarumara ku Lama ka lrisi si Sulivatane ka lrisi.

² Ku Davidi samaka patarumaranga la pangukai ki nagane ki Tamatama subulrubulru ki mapapangale,

³ si padrudrulru ku akaneane liniane. Ku swa Iseraylri, kai wasusu ku sawvalai ababai, ku tangangea tarwamara ku vaeva ku pange, vaeva ku akame ka beate si rudame ka budu.

⁴ Ku Davidi la sikawlu ku tapiya ka swa Lrivi icucubungu ki Langiane sangiluku ki mapapangale senai, drengedrengere sukubu ki Tamatama ka Twaumase ki swa Iseraylri.

⁵ Ku Asape atamatama kicapili, ku Zakaria laka mwasakadrusa ki kiacapili. Ku Yiele, Semiramuthe, Yehile, Matatia, Ilriabe, Binaia, Ubide Idume si Yeile patungutungutungu. Ku Asape wacarecarecare.

⁶ Ku tadrusa ka barakalai ka Binaia si Yahazile la singikai ki zikange icucubungu ki Langiane ngirapa.

⁷ Kikai amani ku aswalalanga ku tasikawlane ki Davidi ki Asape si sakacekeleini ka swa Lrivi pakamani senasenai drengedrengere ki Tamatama.

Sadrengedrengerane ka senai

⁸ Kunumi kiaseasena ki Tamatama, pelaela pathingale ku takasaniangananeini; papia ki sanaka kuni kai kawmasane matikaikai ku takaunganeini.

⁹ Senadha drengedrengere iniane; pelaela ku palrealrebane ku takaunganeini.

¹⁰ Kunumi lrigwa ku saniange ka naganeini; sanaka mwarikaikai ki Tamatama ku umawmase ani makitu kiraragai.

¹¹ Papia ki Tamatama kitubi ku akiparalubane; katasukusukubaana iniane.

^12-13 Lamwabaibalrithi ki Yakubu ka sasiakawlu ki Twaumase, pilrini ka lamwabaibalrithi ki swa Iseraylri, kunumi pulringava ku palrealrebane ku takaunganeini, ngulringava ku tapangimianeini saibange.

¹⁴ Amanini ku Tamatama, ka Twaumaseta; ku lrekemeini salraelre kai kawmasane.

¹⁵ Kunumi kapalralrawthana kasalru palakebe ku takiketeketaneini; ku pukawnungaini lri pakela ki palralrawlrawthu.

¹⁶ Lri kasalru palakebe ku tamakaketeketaneini ki Aberahame, pasusu ku kiketeketeini ki Isake.

¹⁷ Ku Tamatama wacegecege ku apalralrawlrawthane ku samakaketeketaneini ki Yakubu, si pikai ku apalralrawthanenga ku kakwakudhaneini ki Iseraylri.

¹⁸ Amia kai, lri malraku ka kadaengane Kanange baai muswane, lrika cungulungasu.

¹⁹ Tabekele ku kawkawlu ki Twaumase, ku yakaikai ki kadaengane Kanange.

²⁰ Kwini lalasu acaicali mwa kidruanga apataluelaelaela, twalai ki taluvale ki kuni acaicali mwa ki taluvale ka kuni.

²¹ Ai ku Twaumase kai palraingi ki naaneanenga ku twasinalrelreme liniane; ngwalai liniane pakipapawlringau ki talialalai.

²² Amia kai, madha pakwalrialri ki pilrili ka sasiakawluli; madha pakaduladula ki yuginsiali.

²³ Sanaka yakai kai kawmasane drengedrengera ki Tamatama makanaelre! Luka vaivai pelaelaela ku matiakiragai ku sapalribulaneini.

²⁴ Papia ki sanaka kuni pelaelaela ku lriguini! Papia ki sanaka umawmase matikaikai ku saniange ku takaunganeini.

²⁵ Madradrawnga ku Tamatama, naika madradraunga ku takidrengedrengerane; naika makimusaesakenenga ki latwaumase.

²⁶ Kai latwaumase ki lakuni samiamiange sikakathane, ai ku Tamatama wabekace kai la subelebelenge.

²⁷ Ku draredrare si matisalrwane ngiathalringulu iniane; ku maadrau ku puku, sakiaragai swaeteane ki daaneini.

²⁸ Kai yakai ki kadaengane sanaka umawmase naika wadrengedrengere lrigu ki Tamatama! Drengedrengera ku lrigu si maadrau ka pukuini.

²⁹ Drengedrengera ku lrigu ka nagane ki Tamatama; mailuka ku sapatarumarane, kela mucucubungu iniane. Lu adrelane ku Tamatama yai guruthungana sukubu;

³⁰ sanaka kadaengane lri icucubungu iniane manugeregere! Kai kadaengane mapapedrenge acegecege, kai lri lrudralrudrai.

³¹ Kiraragadha itituku, ka kadaengane si subelebelenge! Papia ki sanaka kuni pelaela, wagemegemenga ku puku ku Tamatama!

³² Putaririra, ka laveke si sanaka yakai panianianiake; kapeaperava, ka laangangade si lataleke.

³³ Lukamaninga kwidra lri putariri ku laangatu ka yakai ki angatungatu, asi lwiyane wakela ku Tamatama rathudu ki kiacaebe ki belenge.

³⁴ Kiaseasena ki Tamatama, asi lwiyane mathaithariringa; ku thalradhaneini lrika palralrawthu ikai!

³⁵ Papia inane iya kai, Twaumase ka Takipalribulribulane nai, kiatubi nai muswane palribula naiane! Kiatubi nai muswane patwaladha ki lakuni malra sangiluku pasiwlriwlri naiane, La nai maka kiaseasene muswane, nai drengedrengere ku saniange ka naganesu.

³⁶ Drengedrengera ki Tamatama ka Twaumase ki swa Iseraylri! Kapalralrawthana drengedrengere iniane! La tarumara ku mapapangale si masiasilange karededele tubalre iya kai, “Amingi!” Kwi lalasu wadrengedrengere makanaelre ki Tamatama.

Wasukubu ikai Yerusalrime si Gibiungu

³⁷ Ku talialalai ka Davidi siakawlu ki Asape si sakacekeleini ka swa Lrivi ikai kwini ki tapikaiyane ki Langiane kamani ku tara pasukusukubu. Kwini lalasu luka vaivai lri ikai kwini kipuawawngane.

³⁸ Ku lalake ki Yedutune ka Ubide Idume si ta 68 ka zukuini la kisikawlu paralubu liniane. Ku Husa si Ubide Idume amani ku kiacapili ki tarakadrenge ki lrawlrawdru.

³⁹ Ai, ku barakalai ka Zaduke si la drumane ka barakalai la ikai Gibiungu ki tasukusukubane kamani ku marasiakaikai ki asukubane ki Tamatama.

⁴⁰ Luka mialrealre si luka miauawbu, kwini lalasu lri singikai ku baai ki Tamatama ki swa Iseraylri ku hulrice ka hungu, ikai ki tapatarumaramarane patarumara ku Lama ka lrisi.

⁴¹ Ku redelane lini yakai ku Hemange, Yedutune si la drumane ka umawmase; kwini lalasu kiapawkalrivili kipilri, papia ki Tamatama senai, drengedrengere ki Tamatama ku palralrawthane ku thalradhane.

⁴² Ku Hemange si Yedutune mialri marasikai ki rapa ka lawngu, carecare si drumane ka sapasenasenadhane, kikai lasapasenasenadhane sarakaikaiyane senai ku sanbika drengedrengere. Ku mwabaibalrithi ki Yedutune kiacapili ku akadrengane ki lrawlrawdru.

⁴³ Kwini laumawmase makanaelre ala katwase mutavanane makanaelre, ku Davidi la mialri katwase mutavanane taelrelre ki wacekecekeleini ku edreekane ku vai.