1 Lacaili 15 - Ngudradreadrekadhane Ka Sisiu 魯凱語聖經

Padulru ku wamwa bulri ku Langiane

¹ Ku Davidi yakai ki cekele ki Davidi ngitatudaane ku daane ki talialalai, la mialri padulrunga ku taikaiyane ki Langiane ki Twaumase, cegecege ku vaeva ku balrawbau.

² Kikwini kwidra ku Davidi la kawriva iya kai, “Kathane ku swa Lrivi ku lri maka dulru bulri ki Langiane, asi lwiyane kwini lalasu amani ku pilri ki Tamatama ku lri bulri ki Langiane, lrika palralrawthu marasikaikai ki Twaumase.”

³ Ku Davidi la dawlu sarubu ki swa Iseraylri makanaelre mwa ka Yerusalrime, lri bulri kwini Langiane pwa ki tapadulrwane ki Davidi.

⁴ Ku Davidi la dawlunga sarubu ki lamwabaibalrithi ki Arungu si swa Lrivi:

⁵ Ku zuku ki Kuhathe ka Uriele wailuku ku ta 120 ku umawmase;

⁶ ku zuku ki Mirari ka Asaia mailuku ku ta 220 ku umawmase;

⁷ ku zuku ki Geresune ka Yuile wailuku ku ta 130 ku umawmase;

⁸ ku zuku ki Ilrizapane ka Simaia mailuku ku ta 200 ku umawmase;

⁹ ku zuku ki Hiburungu ka Ilrile wailuku ku ta 80 ku umawmase;

¹⁰ ku zuku ki Uzile ka Aminadabe wailuku ku ta 120 ku umawmase.

¹¹ Ku Davidi wadawlu ki Zaduke si barakalai ka Abiathare, si taeneme ka swa Lrivi: Uriele, Asaia, Yuile, Simaia, Ilrile si Aminadabe,

¹² kawriva liniane, “Amani numi ku tarasangililuku ki lazuku ki swa Lrivi, ngibabula si sakacekele numi ka swa Lrivi, lanu maka dulru bulri ku Langiane ki Tamatama ka Twaumase ki swa Iseraylri mwa ki tapadulrwanengali.

¹³ Ku paswalala kai numi twapalra naiane bulri ki Langiane, ku Tamatama ka Twaumaseta la pathavungu naiane, amani sakai nai singikai ku kakwakudhane sukubu iniane.”

¹⁴ Ku barakalai si swa Lrivi la ngibabula, pasikai ki Langiane ki Tamatama ka Twaumase ki swa Iseraylri.

¹⁵ Ku swa Lrivi la singikai ku tapangukaiyane ki Tamatama ki Musi drekase, arakai ku babulriane bulri ku Langiane.

¹⁶ Ku Davidi la drekase ki tarasangililuku ki swa Lrivi sikawlu ku tapangale ku swa Lrivi senasenai, arakai ku patungutungu si carecare pasenai ku kiarararagadhane ku senai.

^17-21 Kwini lalasu la patwalai ki talrilrigili seasenai ka zuku pilri ku taracarecare arakai ku lriwlu: Lalake ki Yuile ka Hemange, lalake ki lritudraneini ka Berekia ka Asape si lalake ki Kusaia ka zuku ki Mirari ka Itane. Kwini lalasu la piilringa kikai ki swa Lrivi ka tarapatungutungu ki makikilithi, pamamwa ki lriwlu ka carecare; kikai lalasu yai Zakaria, Aziele, Semiramuthe, Yehile, Uneni, Ilriabe, Masia si Binaia. Kwini lalasu la mialri pilri ki swa Lrivi ku tarapatungutungu ki magegelenge; amani kikai, Matatia, Ilripelehu, Mikenia, Azazia si taradrangalru ki daane ki Twaumase ka Ubide Idume si Yiele.

²² Ku Kinania malrigili turamuru ku thingalane ngukai ki seasenai, lakamani ku kipilrini ka tarasangililuku ki taraseaseasenai ki swa Lrivi.

^23-24 Ku Berekia si Ilekana, si Ubide Idume si Yehia kiapilri ka taradrangalru ki Langiane ki Twaumase. Ku Sebania, Yusapate, Nathaniele, Amasai, Zakaria, Binaia si Ilriezere ka labarakalai kiapilri ka tarasacucubungu ki Langiane pangirapapa.

Wabulri ku Langiane ki Twaumase pwa ka Yerusalrime

²⁵ Ku Davidi ka talialalai si laciwru ki swa Iseraylri, si latamatama ki kwapingi makitwa mwa kavai daane ki tai Ubide Idume bulri ku Langiane. Kwini lalasu twaadrau turamuru ku tatulrisisiane.

²⁶ Kwini lalasu patarwamara ku sapatarumarane ku pitu ku sawvalai ka lwange si pitu ku nikiubawbalane ka kiu, pakai ku sapathingalane ku Twaumase ka lri tara paralubu ki wabulri ki Langiane ku swa Lrivi.

²⁷ Ku Davidi sialaimai ku lalasare ka kaimadhane ka malrailragi ka sapakabelebelengane; ku taraseasenai si kiacapili lini ka Kinania si wabulri ki Langiane swa Lrivi mialri makitu silaimai ku lalasare ka kaimadhane ka malrailragi ka sapakabelebelengane. Ku Davidi la silaimai ku Ipude.

²⁸ Ku swa Iseraylri makanaelre tupapalra ki Langiane karededele mwa ka Yerusalrime. Kwini lalasu tarakadadalranane karaleale, yakai ku rapa, lawngane, carecare ka lalingau, la ikai ku lalingau ki patungutungu si pituane ka patungutungu.

²⁹ Sa bulribulri ku Langiane ki Tamatama mudadaane ki cekele ki Davidi, ku lalake ki Saule ka Mikale la pangukai ki lribange drele masiasirare, la drele ki talialalai ka Davidi kirararagai si ititituku dralradralrai, la pulrialrivale tudreadrekase iniane.