1 Lacaili 14 - Ngudradreadrekadhane Ka Sisiu 魯凱語聖經

Tangivelevelane ki Davidi ikai Yerusalrime

¹ Ku talialalai ki swa Tayre ka Hirame siakawlu ku taingea ku tarathathakai mwa ki Davidi, baai ki Davidi ku cedare ka angatu, la iluku ku daikusange ki angatu si lrenege paralubu iniane tudaane ku daane ki talialalai.

² Ku Davidi wathingale ku Tamatama ka makecenge cegecege iniane tutalialalai ki swa Iseraylri, si ngwalai ki kawkawluini la pangiradhekane ki kunini.

³ Ku Davidi la ikai Yerusalrime piilringa ku lataelrelreini, la tulalake ku takalra ku lalalakeini;

⁴ Ku tulalakeini ikai Yerusalrime yakai ku Samwa, Subabe, Nathange, Sulumungu,

⁵ Ibehare, Ilrisua, Ilepilite,

⁶ Nuga, Nipege, Yapia,

⁷ Ilrisama, Bilriada, si Ilripelete.

Pamalebe ki swa Pelisitine

⁸ Ku swa Pelisitine sa kilalra ku Davidi ka kia pacegecegenga atalialalai palraelre ki swa Iseraylri, la sarubu ki kwapingi si katwase, lri silape ki Davidi. Ku Davidi mialri mwa kidresenge kikaruburu.

⁹ Ku swa Pelisitine la kela valrwalru Ripaime, pathagili ravase ku lamanemane.

¹⁰ Ku Davidi la kivaga ki Twaumase, “Lri mwaku kikaruburu ki swa Pelisitine? Lri paakacisu nakwane?” Ku Tamatama la tubalre, “Lu mwa, lri tara paakaciaku muswane!”

¹¹ Ku Davidi la katwase mwa Baale Perazime, la ikai kwini pamalebe liniane. Kwini lasu la kawriva, “Ku Twaumase arakai nakwane pasarau ki badhali, mia ki lriau pakaburuku ki satelengane.” Lakamani kwini kipasi Baale Perezime.

¹² Ku swa Pelisitine sa mawbebebere la ciilringa ku samiamiange pikai kwini, ku Davidi la drekase malra kwini lasamiamiange si lama.

¹³ Lakai tarathainu, ku swa Pelisitine la siwlringa mwa ka valrwalru Ripaime si aruparamuru ravase.

¹⁴ Ku Davidi la peelanga kivaga ki Twaumase; ku Twaumase la iya kai, “Madha ngukakai kai mwa kikaruburu liniane; lragava si singilrilrikudru liniane, si ngudadeethe ki mawtaliwliwdru kikaruburu liniane.

¹⁵ Sana kilalrasu ku wabengebengethe ikai ringaringau ki angatu, makakaiya kikaruburu, asi lwiyane aswalanga naku muswane kikaruburu si pamaki ki kwapingi ki swa Pelisitine.”

¹⁶ Ku Davidi singiakai ku tadrekasane ki Twaumase pangimia. Kwini lasu la pasiwlri ki swa Pelisitine, twalai Gibiungu saladha pakela kavai Gizere.

¹⁷ Lakamani ku nagane ki Davidi kimapelaelanga; ku Tamatama la pamukuludru ki lakuni iniane.