1 Lacaili 13 - Ngudradreadrekadhane Ka Sisiu 魯凱語聖經Patalwaela ku Langiane twalai Kiriathe Yerime ( 2 Samuile 6.1-11 ) 1 Ku Davidi si lakiacapicapili ki kwapingi ka wasangiluku ku takudrulu si talrima ka idai makanaelre madrekadrekase, 2 ala pelaela papia ki mapapangale ki swa Iseraylri iya kai, “Lu palraingi numi, si kikai ala ka twalai ku takidremedremane ki Tamatama ka Twaumaseta, la palraingi naiane pakatwase ku kiasikawlu mwa pelaela ki drumane ka sakacekele si yakai ki druanga ka barakalai si swa Lrivi, dawlu liniane kela kai mitane madredresenge irubu. 3 La ta malra pwa kikai kwini Langiane ki Twaumase, asi lwiyane saka talialalai ku Saule kadrwa ku takirimwaneta tukucingalre iniane.” 4 Ku mapapangale lu kidremedreme kai taiyane mathariri la iya, si palraingi makanaelre. 5 Ku Davidi la sarubu palraelre ki sanaka swa Iseraylri, twalai tali lrawdru pagiagisane ka Izipiti kela tali dradha ka salralriwgu Hamathe makitu kela twalai ki druanga, pakai ku apataluelane ku Langiane twalai Kiriathe Yerime pwa ka Yerusalrime. 6 Ku Davidi si mapapangale la mwa kavai tali Yuda ka Baala ka cekele (amani Kiriathe Yerime) dawlu ki Langiane ki Twaumase; kikai Langiane arakai kwini ki wanene ibelenge ka Kirubime ka nagane ki Tamatama sunagane. 7 Kwini lalasu wabulri kwini Langiane pubelenge ki bavane ka palridingi, la patwalai ki daane ki tai Abinadabe pulatadre, laka amani ku Uza si Ahiu ka sacucubungu iluiluku. 8 Ku Davidi si mapapangale ngwalwalwalwadhane dralradralrai, drengedrengere ki Twaumase. Kwini lalasu la seaseasenai, arakai ku makaelaela ku sapasenasenadhane, yakai ku patungutungu, pituane ka patungutungu, kalringikingi, carecare si lawngu ka rapa. 9 Kwini lalasu la kela ki tavelavelatane ki mugi ki tai Kidungu, ku wabilibilibili ka lwange la kisanu ukadrulu, ku Uza la ruthuku ki Langiane. 10 Ku Tamatama la ngwalai ku tatalabingane ki Langiane si kalisi, la papacai iniane. Ku Uza la makakaai pacai icucubungu ki Twaumase, 11 lakamani kavai kipasi Pereze Uza. Ku Davidi la ngwalai ku takalisiane ki Tamatama pathavungu ki Uza, ku kidremedremeini la kai kiragai turamuru. 12 Kwini vai kwini, ku Davidi mwakuludru ki Twaumase, la iya kai, “Kikai anaku makathuru salri pwa kikai kwini Langiane ki Twaumase?” 13 Lakamani, ku kaika malranga ki Davidi kwini ki Langiane bulri pudaane Yerusalrime, la pangukai talidrumane ka kadalranane satedre pwa ki daane ki tai Ubide Idume ka swakai cekele Gathe. 14 Ku Langiane la ikai kwini taratulru ka dramare; ku Tamatama la subulrubulru ki tai Ubide Idume, si sanaka manemaneini. |