1 Lacaili 12 - Ngudradreadrekadhane Ka Sisiu 魯凱語聖經

Aswalalanga ka twapapalra ki Davidi ka swa Biniyamingi

¹ Ku Davidi yakaikai Zikelage, sa kilepelepenge ki talialalai ka Saule, takalra ku tarakikaruburu ku kwapingi ku wakela tupapalra iniane.

² Kwini lalasu wadulru viviriane vavanalane lraili, verevere ku lrenege. Mathadalradalrane ki Saule ku zuku, ka swakai ki Biniyamingi.

^3-7 Ku swa Gibia ka Ahiezere ka lalake ki Sema si Yuase amani ku tarasangililuku liniane. Amani kikai ku nagane lini: Lalake ki Azemavete ka Yizele si Pilite; swa Anatute ka Biraka si Yehu; swa Gibiungu ka Isemaia (mwakalrivili ka kwapingi, tangea ka tarasangililuku ikai ki “Tamatulrulu ka tamagarange” niyane); swa Gidera ka Yerimia, Yahazile, Yuhanane si Yuzabade; swa Harupe ka Ilriuzai, Yeremuthe, Bilia, Semaria si Sepatia; swa Kura ka Ilekana, Iseya, Azarele, Yuizere si Yasubiame; lalake ki Yeruhame ka swa Gedure ka Yuila si Zebadia.

Twapapalra ki Davidi ka swa Gade ka zuku

⁸ Sa ikai calragulragu ki kepale ku Davidi, yakai ku twalai ki Gade ka zuku ku malrigili ka lakwapingi kipaelre ki kwapingi ki Davidi. Kikai lakwapingi yadrepele ka talrilrigili arakai ku alathare si idiri; kwini lalasu mia ki raiyungu ku garangane, mia ki salawngane ku papidikane.

^9-13 Kikai singikai ku taabelengane lini patilibi: Izere, Ubadaiya, Ilriabe, Misemana, Yerimia, Atai, Ilrile, Yuhanane, Ilezabade, Yerimia si Makebanai.

¹⁴ Ku lakiacapili ki kwapingi kai ki zuku ki Gade, yakai ku wasangililuku ku takudrulu ku kwapingi, yakai ku wasangiluku ku taidai ku kwapingi.

¹⁵ Yakai sakacaili ki aswalalanga ka dramare, ku kadravane Yuredange la lrenepe ki tarababiabila, kikai lalasu la talubalre, pathirakupu ki laumawmase ki yatali talrawane si yasapakalriwgu.

Twapapalra ki Davidi ka swa Biniyamingi si swa Yuda ka zuku

¹⁶ Yakai saka kingivalane, ikai ki zuku ki Biniyamingi si Yuda, yakai ku twaredelane ku wamwa ki kepale ka cekele ki Davidi si tupapalra iniane.

¹⁷ Ku Davidi la mulatadre kidredresenge liniane, kawriva liniane, “Lwiyasi lri tutalragi numi nakwane si ka paralubu nakwane, kiaragadhaku lu kipaelre numi naiane; kadrwa ku nau tulisi iyali numiane. Lwiyasi la kidredreme numi ku kialangai nakwane si baai ki badhali, lri thingale ku Twaumase ki cucungulane nai, lai lri pathavungu numiane.”

¹⁸ Ku Ri ki Twaumase la kandu kwini ki yakai liniane ka sia Amasai (sakabilrilinga kai lasu atamatama ki tamatulrulu ka tamagarange), kwini lasu la tawtau, Davidi, umawmase nai muswane! Lalake ki Yesi, swa talikai nai muswane! Kusu si latalragisu anu siku makanaelre! Ku Twaumasesu amani ku takiparalubanesu. Ku Davidi kiaragai kidredresenge liniane, la sikawlu liniane akiacapili ki kwapingi.

Twapapalra ki Davidi ka laumawmase ki zuku ki Manase

¹⁹ Ku Davidi si swa Pelisitine sa mwa kikaruburu ki talialalai ka Saule, yakai ku tapia ku kwapingi ki zuku ki Manase twapapalra iniane. Ku patengatengane, ku Davidi kai paralubu ki swa Pelisitine, asi lwiyane ku latalialalai ki swa Pelisitine mwakuludru ki Davidi ku wamalra liniane kilangai ki natamatamaini ka Saule. Lakamani kwidra kwini lalasu pakatwase ki Davidi siwlri mwa Zikelage.

²⁰ Sa papiapia Zikelage ikai kadalranane ku Davidi, ku wakela tupapalra iniane ku kwapingi ki swa Manase amani ku: Adena, Yuzabade, Yediale, Mikaele, Yuzabade, Ilrihu si Zilethai. Kikai lalasu ikai ki kwapingi ki Manase yadrepele ka wasangililuku ku takudrulu ku kwapingi.

²¹ Kai lalasu ikai ki kwapingi ki Davidi kiacapili, asi lwiyane yadrepele ka tagagarange ka tarakikaruburu. Sakabilrilanenga mialri akiacapili ki kwapingi ikai ki kwapingi ki swa Iseraylri.

²² Kadrwa ku takakadrwane ku wakela tupapalra ki Davidi ki vaivai, lakamani ku kwapingi ki Davidi la padalru si kamaninga kwidra sapupukwanenga ka lakwapingi.

Lakwapingi ki Davidi

^23-37 Sa ikai Hiburungu ku Davidi, tapangale ku maka kiabulrunga ka tarakikaruburu wakela kipaelre ki lakwapingini, paralubu iniane mubalrithi ki talialalai ka Saule rathudu, mararaamau ku tapuvagane ki Tamatama. Kai amani ku tatathane ku kwapingini: Yuda: 6,800 kiatulrepenge ku tangirarukudrane, ikai ku alathare si idiri. Simiune: 7,100 saniange ka tarakikaruburu. Lrivi: 4,600. Lamwabaibalrithi ki Arungu ka Yehuiada si papalraini: 3,700. Yacengecenge ka tamagarange ka lritudrane ki Zaduke: 22 ku tamatama. Biniyamingi (Zuku ki Saule): 3,000 (tapapangaleana ku twapapapalra ki Saule ku zuku ki Biniyamingi). Iparaime: 20,800 niyaiyane ka tarakikaruburu. Manase ka swa sapakalriwgu:, 18,000, kiapilri kamani kulri cegecege tutalialalai ki Davidi. Isakare: 200 ka tarasangililuku si lakwapingi lini (kikai la tarasangililuku malrigili drele ku tangimiamiane, la thingale ki swa Iseraylri ku apiane lini lutumatumane). Zibulungu: 50,000 yadrepele ka savaeva ku kidremedreme matisudralru, wadulru arakai ku la sakikaruburuburane ka tarakikaruburu, lri makakai kikaruburu. Napetali: 1,000 kiacapili ki kwapingi si 37,000 padulrunga ku alathare si idiri ka tarakikaruburu. Dange: 28,600 maka kiapakundringinga. Asere: 40,000, lri makakai kikaruburu. Ku swa tali kadravane Yuredange ka Riwbingi, Gade si swa tali talrawane ka zuku ki Manase: 120,000 maka kiapakundringinga, wadulru arakai patuelre ku sakikaruburuburane.

³⁸ Kikai la kwapingi yadrepele ka lri dulru yasasane mwa kikaruburu. Kwini lalasu la mwa Hiburungu, kalrithethe ku wacegecege ki Davidi atalialalainga pakanaelre ki swa Iseraylri. Ku drumane ku swa Iseraylri mialri maelrelrenga, tutalialalai ki Davidi.

³⁹ Kwini lalasu makatulrulu ikai kavai, taelre ki Davidi kalringulringulu, kikai lataleke amani ku sakacekele lini ka padulru.

⁴⁰ Ku mapapangale singiadaili twalai tali viri kavai zuku ki Isakare, Zibulungu si Napetali la makitu kela, arakai ku ruba, lrakeda, ngiririgi si lwange siamece ku milrikinku, icizike, rudame ka budu, bava si lawlau ka ulrive ka lataleke. Kwini lalasu mialri mailuku ku thathatha ku lwange kiu, ku aculwane si kane, asi lwiyane palraelre ki kuni ki druanga swaeteane ku sakiaragai ku peravane.