1 Lacaili 11 - Ngudradreadrekadhane Ka Sisiu 魯凱語聖經

Atalialalai ki swa Iseraylri si swa Yuda ku Davidi

¹ Ku swa Iseraylri makanaelre mwa Hiburungu kidrele ki Davidi, si iya kai iniane, “Kunai amani nai ku karetesananesu.

² Kunadruma, saka talialalaiyana naiane ku Saule, wasangilukungasu ki swa Iseraylri mwa ki takikaruburane. Ku Tamatama ka Twaumasesu napwavaga muswane, lri sangililukusu ki kawkawluini, kamani ku warathudu liniane.”

³ Lakamani ku laciwru ki swa Iseraylri makanaelre lini mwa Hiburungu kidrele ki talialalai ka Davidi. Ku Davidi la ikai cucubungu ki Tamatama makaketekete liniane, kwini lalasu la padelreme pacegecege iniane atalialalai ki swa Iseraylri, mararamau ku tapuvagane ki Tamatama pangukai ki Samuile.

⁴ Ku talialalai ka Davidi si mapapangale ki swa Iseraylri makanaelre wamwa kikaruburu cekele Yerusalrime (nasia Yebuse), ku swakai Yebuse ku umawmase yakaikaaiyana kwini.

⁵ Lutumane kai lri maka mucekele ku Davidi la iya ku swa Yebuse, ai ku Davidi wadrikisinga ku kepale lini kavai Ziyungu, twalainga kikai kwini kadaengane sia Davidi ka cekele.

⁶ Ku Davidi amia kai, “Ku aswalaalanga papacai ki swa Yebuse lri kamani ku tamatama ki lakwapingi!” Ku Yuabe (ku tinaini sia Ziruia) laka aswalalanga mwa kikaruburu, ala kamani ku atamatama ki kwapingi.

⁷ Ku Davidi yakaikai ki kepale, lakamani kikai kepale kipasi cekele ki Davidi iya.

⁸ Ku Davidi twapela kai ki cekele, twalai ki tali talrawane ki lregelrege ka tapudaeane pathagili pudriadringai, ku Yuabe la pudriadringai ku talidrumane ki cekele.

⁹ Ku Davidi arwa ngiradheradhekane, asi lwiyane watapalra iniane ku Tamatama ka abebeelengenga ki sanaka kwapingi.

Latamagarange ki Davidi

¹⁰ Kilakikai nagane yai amani ku nimatikaikaiyane ka tamagarange ka kwapingi ki Davidi. Kwini lalasu si drumane ka swa Iseraylri patalialalai ki Davidi, mararaamau kudra tapuvagane ki Tamatama. Kwini lalasu la pakapapedrenge ku kuni ki Davidi.

¹¹ Ku aswalaalanga Yasubiame ka zuku ki Hakemuni, kai lasu amani kudra tamatama ki “tatulru ka tarasangililuku” niyane, nayakai ki nikingivalane makakaruburu arakai ku idiri papacai ku ta 300 ka umawmase.

¹² Ku mwasakadrusa ki “tatulru ka tarasangililuku” amani ku Ilriazare ka lalake ki Dudu ka swa Ahu ka zuku.

¹³ Ikai ki tamakakaruburane Pase Damime, kai lasu maredele ki Davidi telenge si kikaruburu ki swa Pelisitine. Sa ubere ku swa Iseraylri, kai lasu yacengecenge ikai ki swaadrau ka mamugimugi,

¹⁴ la sangiluku ki kwapingini ikai ki umawma kikaruburu, palakebe ki taikaiyane lini, papacai ki swa Pelisitine. Ku Tamatama la paakaci iniane.

¹⁵ Sa ikai ku taingeane ku butai ki swa Pelisitine tutakwapingane ikai valru Ripaime, yakai saka minakavalane, kwini ki tamatulrulu ka tamagarange la ikai ku tatulru ku wamwa kwini ki adeethe ki barungulu ka Adulame ka alrisapesape kidrele ki Davidi.

¹⁶ Kikwini kwidra, ku Davidi wamalra ku vaeva ku nialradrane ka lregelrege; yakai ku twaredelane ku swa Pelisitine wadrikisi ka Bithelrihime.

¹⁷ Ku Davidi mabarengere ki cekeleini, la kawriva, “Apia ungulunganaku ku acilai ku singikai ki tamwalrwane ka dralremedreme ithili taelelebane ki cekele Bithelrihime!”

¹⁸ Kwini kiamatikaikai ka tatulru ka tamagarange la katwase ngukakai ki takwapingane ki swa Pelisitine, mwa ki dralremedreme ithili ki taelelebane ki cekele Bithelrihime vau ku acilai, si iluku baai ki Davidi. Ai ku Davidi kai waungulu, la malra kwini acilai gugu, tusapatarumarane ki Tamatama.

¹⁹ Kwini lasu la iya kai, “Tamatama, lri tumanaku maka ungulu kikai acilai! Taingeane ka waungulungaku ku erai ki wamwa kipacai ku niake lini mwalru ka tamagarange!” Lakamani ku kaika ungulu ki Davidi. Kikai amani ku takaungane kwini ki tatulru ka tamagarange.

²⁰ Ku agi ki Yuabe ka Abisai amani ku tamatama kwini ki “Ta matulrulu ka tamagarange”. Kwini lasu naarakai ku idiri culrulu papacai ku ta 300 ka umawmase, lakamani ku sanagananeini ikai ki “Tamatulrulu ka tamagarange”.

²¹ Kwini lasu malrilriigilinga ikai kwini ki “Tamatulrulu ka tamagarange”, la atamatama liniane, ai kaiyana kadali ku takimatikaiyane kiramau ki “Tatulru ka tarasangililuku”.

²² Ku Binaia ka lalake ki Yehuiada ka swa Kabezele tangeea ka niyaiyane ka tamagarange. Makalra ku takagarangananeini, paelre kikai tapapacadhaneini ku sapukwane ka tadrusa ka kwapingi ki Muabe. Kai lasu yakai saka nikingivalane sa pasabwabu la mwadringi ki valrulrange, papacai ku vaeva ku raiyungu.

²³ Kai lasu la papaacainga ku madradrau ka umawmase ka swa Izipiti; kwini lasu drusa ka mituru ku elrenganeini, la ecenge ku idiri. Ku Binaia la arakai ku ukudru lrumai iniane, si ribici ku ecengeini ku idiri, arakai culrulu papacai iniane.

²⁴ Kikai amani ku takagarangane ki Binaia, kai lasu yakai kwini ki “Tamatulrulu ka tamagarange,”

²⁵ Ka mwakalrivili turamuru, ai kailri maka kiramawana ku takimatikaiyane ki “tatulru ka tarasangililuku”. Ku Davidi paatamatama iniane ki tarapalakebe ki talialalai.

^26-47 Kilakikai nagane ki drumane ka tagagarange ka kwapingi: Asahele, agi ki Yuabe, Ilanane ka lalake ki Dudu ka swa Bithelrihime, Samuthe, twalai Harude, Hilize twalai Pilite, Ira ka lalake ki Ikise ka swa Tikua, Abiezere twalai Anatute, Sibikai twalai Husa, Ilai twalai Ahu, Maharai twalai Nitupa, Hilide ka lalake Baana ka swa Nitupa, Ithai ka lalake ki Ribai ka twalai Gibia ka Biniyamingi, Binaia twalai Pirathunge, Hurai twalai vaalru Gase, Abiele twalai Araba, Azemavete twalai Bahurume, Ilriaheba twalai Salebungu, Haseme twalai Gisungu, Yunathange ka lalake ki Sagi twalai Harare, Ahiame ka lalake ki Sakare twalai Harare, Ilripale ka lalake ki Ure, Hepere twalai Mikera, Ahiya twalai Pilungu, Hizeru twalai Karemile, Narai ka lalake ki Izebai, Yuile ka agi ki Nathange, Mibehare ka lalake ki Hageri, Zeleke twalai Amune, Naharai ka tarasiameamece ku sakikaruburuburane ki lalake ki Ziruia ka Yuabe ka swa Biruthe, Ira si Garebe twalai Itheri, Uria swa Hite, Zabade ka lalake ki Ahelai, Adina ka lalake ki Siza (tangea ka kiacapili ki zuku ki Riwbingi, yakai ku tamatulrulu ku kwapingini), Hanange ka lalake ki Maka, Yusapate twalai Mithange, Uzia twalai Asetira, Sama si Yiele ka lalake ki Huthame ka twalai Aruire, Yediale si Yuha ka lalake ki Simeri ka twalai Tize, Ilile twalai Mahava, Yeribai si Yusavia ka lalake ki Ilriname, Ithema twalai Muabe, Ilrile, Ubide si Yasile twalai Zuba.