1 Kurintu 9 - Ngudradreadrekadhane Ka Sisiu 魯凱語聖經

Sikiningi si kingidri ki nisikawlane

¹ Kainaku ka ngialralraingi ka umawmase? La kainaku ka nisikawlane ka umawmase? Kainaku ka wadrelenga ki Tamatamata ka Yesu? Kai numi kamani ku madru ku tapasikaikaiyaneli ki Tamatama kaungu?

² Adravane kai tunisikawlane nakwane ku palrapalra, lri tara tunisikawlane numi nakwane! Asi lwiyane kudra asinzia ki Tamatama numi amani ku sapelaelane ku takanisikawlananeli.

³ Kai palrapalra lu kawriariva nakwane, amiaku kikai ngipapalakebe:

⁴ Bekace ka kadrwa ku kingidri nai satalu ki hukuingi kane ku aga?

⁵ Bekacaku kai dulru mia ki drumane ka nisikawlane, mia ki betakane ki Tamatama, mia ki Pitiru, mailuku ki kiasusu ka taelrelreini ka ababai karedele mubabadhane kivavange?

⁶ Bekace ka kathanaku si Barenabase ku lri tara kaungu ku sakaneane si asimadhane?

⁷ Aneane ku akwapingi si ngipapadulru ku akaneane? Aneane ku walredreke ku budu si la kai kane kudra yakai ki angangadeini ku budu? Aneane ku walapulapu ku kiu la kai ungulu kudra mireke ku twalai ki lakiuini?

⁸ Kikai iyali kaika arakaiyane si kakathane ku niarakaikaiyanenga pathalrilriku, kaika amia ku hulrice?

⁹ Ku hulrice ki Musi amia kai tukakudhane, “Kai lwange lu dralrailraisi ki taleke, madha tametamenge ki ngudwini.” Amani ku lwange ku kakalikalithi ki Twaumase?

¹⁰ Lu iya kikai kaika pasiakaikai mitane kawriva? Unu kikai pasiakai mitane pacase! Asi lwiyane ku wakaungu si kiataleke lu katwase kaungu, siadrama makanaelre ku akitudrulrane ku naika amalrane lini ku taleke.

¹¹ Yakai nai numiane sabulu ku sapaivai ki abake. Adravane ka patengane ka twalai numiane malra ku nibaadhane ku taleke, paramuru lri iya madu?

¹² Alaiyasi ikai ku kingidri ki palrapalra ka miyaiya kai sidrama numiane, kai naika lrika makadrwadrwa ikai ku miyaiya kai ku kingidri? Ai, kadrwana ku taarakaiyane nai kikai kingidri, kiadililringa nai patuelre, amani lu kitelenge kai hukuingi.

¹³ Tara wathingale numi, kai yakai ki daane ki Twaumase kipuawawngane patwalai ki daane ki Twaumase tarumara ku akaneane; ku yakai thili ki tapatarumaramarane kawaungu ku umawmase maiyalri kitudrulru kudra twalai ki tapatarumaramarane ku nipatarumarane.

¹⁴ Thadaalrane, ku Tamatama la iya kai pelaela: Sanaka kiapuawawngane pelaelaela ku hukuingi ka umawmase lri tara sataalu makanaelre ki hukuingi ku sapanianiakane.

¹⁵ Ai, kainaku arakaiyana ki kikai kingidri; kikai pacaseli kilakikai la kainaku ka pakai ku akikarengecane kikai kingidri. Adravane pacadhaku lri kainaku pavutha ku lrigulriguli!

¹⁶ Kadrwa ku atakaiyaneli ku tapelaelaneli ku hukuingi si ngilralrigu ki tadindwane; nisikawlanaku kipadindu sikakathane. Lu kainaku dindu lri matikurwaku!

¹⁷ Alaiyasi ka ngiakakamaniaku dindu, lri dulrwaku malra ku pakalreva; ai, ku Twaumase kudra wabaainga nakwane kikai awngane, la malranga naku ki kikai ngitatu sikiningi.

¹⁸ La lrika manemane ku atarumaraneli ku pakalreva? Amani lu dindwaku kai lri arakai ku paisu ku palrapalra, amani kudra kai lri kisupilri ku naika alrane ku kingidri pangukai ku tadindwane.

¹⁹ Amaniaku ku ngialralraingi ka umawmase, ka kaika kiatu duri ki sanaka aneanenga; ai kiaragadhaku asasiakawlu ku amalraneli ku umawmase.

²⁰ Lu taelreaku ki swa Yuda kaungu, twalravaku ki swa Yuda, pakai ku amalraneli ki swa Yuda ka umawmase. Adravane kainaku kiruthuku ki hulrice ki Musi, ai lri ngimiaku ki wasikaikace ikai tailebeane ki hulrice ka umawmase, pakai ku amalrane ki yakai ki hulrice ka umawmase.

²¹ Thadaalrane, lu ikaiyaku ki kai yatailebe ki hulrice ka umawmase, ngialravaku ki kai yatailebe ki hulrice ka umawmase. Ai, kainaku lri pasalaladha ki hulrice ki Twaumase kainaku ka amia; ku patengatengane kiaruthukaku ki hulrice ki Kirisitu.

²² Ikai ki twaramuru ku salrwane ka umawmase, atwaramuraku ka umawmase, pakai ku amalraneli liniane. Lakamani, ikai ki ngitwatumane ka umawmase, angitwatumanaku ka umawmase; adravane arakaiyaku ku ngitwatumane, lri tara palribulaku ki laumawmase.

²³ Pasiakaiyaku ki hukuingi si pia kilakikai, ku pacugane pakai ku ataelreane ki palrapalra kisupisupilri ku akaesadhane ki hukuingi.

²⁴ Lri tara thiingale numi, ku yakai talailailadhane si makalrwalrwalrumale lailai ku umawmase takaalra, ai ku kiapakalreva tangeangea. Lakamani, sikidremedrema kudra lri tara kipakalreva ku amia si kainganai lailai.

²⁵ Sanaka tara lailailai tara kiasamula kicawcakwane, pakai ku amalrane kwini lri kalisi ka pagamucu; ai ku urikaikaita amani kwidra kai lri kalisi ka pagamucu.

²⁶ Lakamani, waleecegaku lailai papia ki amwaneli sikakathane; la ngimiaku ki tarabukusikusingi ka umawmase sana pwalrima kai pakawliwli.

²⁷ Pakialringavaku kiecebe ki kinawmasaneli, pakai ku akitulrepengane ruthuku iniane, amani lu pamwaku ki palrapalra pakikalrumale, la usaararelringa naku kamani.