1 Kurintu 8 - Ngudradreadrekadhane Ka Sisiu 魯凱語聖經

Patharukai ki nipatarumarane ki samiamiange ka akaneane

¹ Lu patharwakai ki nipatarumaranenga ki samiamiange ka akaneane, lu kidremedreme nai “Yakainga ku thingalane nai ki patharukai kikai amiamia nai.” Ku patengatengane, kikai la miyaiya kikai ku thingalane apangitatwadravane ki umawmase sikakathane, kathane ku sakialialibake ku lri paadili ki umawmase.

² Kudra wathingalaku ki lamanemane amia, ku patengatengane kaina wathingale ku naika athingalaneini.

³ Ai, kudra madalame ki Twaumase ku umawmase kiathingale ki Twaumase.

⁴ Lakamani, ku patharukaiyane ki nipatarumaranenga ki samiamiange ka akaneane, wathingaleta, kai samiamiange kaika patengatengane ka panianianiake, la thingaleta, vaeva ku Twaumase.

⁵ Adravane ka yakai ku “latwaumase” niyane kai kawmasane, (taikalrane ku “latwaumase” si la taikalrane ku “tamatama”),

⁶ ai papia mitane, tangeangea ku Twaumase, ka Tama ka yabelenge, ka wabekace sanaka manemanemane; kuta pasiakaita iniane panianiake. Si laka vaeva ku Tamatama, ka Yesu Kirisitu; sanaka maneemane ngwakai iniane kibekace, kuta laka ngwakaita iniane panianiake.

⁷ Ai, kaika yakai ku thingalane makanaelre patharukai kikai. Yakai ku laumawmase ku twalrawnga sukubu ki samiamiange, lakamani pakela kaikameane, sana kane kikai miyaiya kai ku akaneane, lu kidremedreme miakau wakanekane ku akaneane ki samiamiange. Kudra natwaramurunga ku takidremedremane lini, la ngwalainga ku takaneane kikai akaneane si ngitatu makudrulrunga.

⁸ Ku patengatengane, kai akaneane kai lri dulru tupela aru tuthariri ku tamangangimianeta ki Twaumase; ku kai wakane kadrwa ku asipunane, ku wakane lai mialri ka kadrwa ku muesaini.

⁹ Ai, dradreela, madha ngwalalai ku taarakaiyane numi ku ngilralraingane ka tangeangea si papasalriu ku twaramuru ku salrwane.

¹⁰ Alaiyasi ikai ku umawmase ku yakai kikai turamuru ku takidremedremane, la drele muswane ka “Madrau ku thingalane” La ikaisu ki tasamiamiangane kanekane ungungulu, kikai kaika maru pasapukupukuanenga iniane ku akaneane ku nipatarumarane ki samiamiange ku akaneane?

¹¹ Lu mia kwini, kikai twaramuru ka retesane, kamani ku Kirisitu ka pasiakai iniane pacai, lri ngwalai ki “Thingalanesu” si kamudu!

¹² Lu pia numi kikai, pasalriu ki laretesane, si pakadula ki twaramuru ka takidremedremane, amani ku pasalriu ki Kirisitu.

¹³ Lakamani, alaiyasi ku akaneane lalri papasalriu ki retesane, lri kainaku kanenga palralrawthu ku beate, amani lu papasalrivaku ki retesaneli.