1 Kurintu 7 - Ngudradreadrekadhane Ka Sisiu 魯凱語聖經

Patharwakai ki Akarudrangane

¹ Kaiasasane lri pelaelaku ku matikai numi ikai ki tigami. Amia numi kai, mathariri lu kai karudrange ku sawvalai.

² Ai, kai takaalra kai lapasalrisalriu ki sawvalai si ababai, sanaka sawvalai mathariri lu ikai ku taelrelre lini ku ababai, sanaka ababai la kathariri lu ikai ku taelrelre lini ku sawvalai.

³ Kai taelrelre ka sawvalai lri pakaelre ku naika sikiningini ki taelrelreini ka ababai; ku taelrelre ka ababai la mialri lri pakaelre ku naika sikiningini ki taelrelreini ka sawvalai.

⁴ Kai ababai papia ki kinawmasaneini kadrwa ku angisasingikaiyaneini, lri singikai ki taelrelreini ka sawvalai; laka thadaalrane, kai sawvalai kadrwa ku angisasingikaiyane papia ki kinawmasaneini, lri singikai ki taelrelreini ka ababai.

⁵ Ku maladrusa madha sidrekadrekase ku urikai ki taelrelre, luka ngwalai ku asalikavaevane inulri, si laka mapapalraingi mauvagaiyana ku tapecane; ai lu ngilribatenga lri sawlri ku tamacacapilane lini, amani lu kai numi maka ngiraruthuku si kilrilrigili ki Satange.

⁶ Lu iyaku kikai kainaku ka wadrekase numiane, nikiadilane palraingi.

⁷ Ku patengatengane, ana tumane la ngialrau nakwane kai karudrange amiaku numiane makanaelre. Ai, kuta ka tangea tarwamarata patwalai ki Twaumase ku makaelaela ku migemi, yakai ku miyaiya kai, yakai ku miyaiya kwini.

⁸ Kaiasasane, lri kawrivaku papia ki kaiyana marudrange si walibakane ka ababai: Lu dulru kamiyaiya nakwane ka vaevaeva cekecekele kai matumane.

⁹ Alaiyasi kai numi maka ngiraruthuku ku urikaiyane ki kinawmasane numi, karudraanga. Lu kelrakelrakelrabe ku urikaiyane ki kinawmasane, maesaesai karudrange.

¹⁰ Papia ki marudrangenga ka umawmase; yakai ku apelaelaneli, ku patengatengane kaika kidremedremeli, amani ku Tamatama ka wadrekase: Ku taelrelre ka ababai kai lri maka katwase ki tawaneini,

¹¹ alaiyasi katwase, kai lri maka karudrangenga; lu kai mia kwini, lri tara siwlri makakadalru ki tawaneini. Ku tawane ka sawvalai lai kai maka cilri ki taelrelreini ka ababai.

¹² Papia ki drumane ka laumawmase yakai kai aiyaneli kawriva (kaika taiyane ki Tamatama): Alaiyasi ku sinzia ka sawvalai laka marudrangenga mwa ki kaika sinzia, kudra taelrelreini ka ababai la ubangalre ikai iniane cekecekele, lri kai maka cilri ki taelrelreini ka ababai.

¹³ Alaiyasi ku sinzia ka ababai laka marudrangenga mwa ki kaika sinzia, kudra tawaneini ka sawvalai la ubangalre ikai iniane cekecekele, kwi alisu lri kai maka cilri ki tawaneini ka sawvalai.

¹⁴ Asi lwiyane kudra kai kiasusu ki Twaumase ku tawane yai, ngwalai ku takisuswane ki taelrelre ka ababai si kitarumara ki Twaumase, laka thadaalrane; kudra kai kiasusu ku taelrelreini ka ababai, lri mialri ngwalai ku takisuswane ki tawaneini si kitarumara ki Twaumase. Ana kaika miyaiya kai, ku lalalake lini nai kaika kiatarumaranga; ku patengatengane, kwi lalasu kiatarumaranga ki Twaumase.

¹⁵ Ai, alaiyasi kudra kai kiasusu ku saininu lulri katwase kudra ki palraini ka kiasusunga singikaiya iniane. Luka ngimiyaiya kikai, kudra amani ku kiasusunga, ku tawane ka sawvalai ka taelrelre ka ababai, lri dulrunga ngilralraingi. Ku dawlu numiane ki Twaumase, pakai ku ataelreane numi si makathaithariri.

¹⁶ Kunumi ka kiasusunga ka lataelrelre ka ababai, asu maka duulru kainaku lri maka palribulu ki tawaneli iya? Kunumi ka kiasusunga ka latawane ka sawvalai, asu maka duulru kainaku lri maka palribulu ki taelrelreli iya?

Padrumulra ku takaumawmasanesu sakidawlu numi

¹⁷ Sanaka aneeanenga ku tapanianianiakaneini singikaiya ku baai ki Tamatama ku migemi, si pamamwa ku tangadrane ku tadawlane ki Twaumase. Kikai yai amani ku tasingikaiyaneli ku bulrubulruli ki lakiwkai.

¹⁸ Kudra kiatulrisi kigelregelre ala kidawlu ku umawmase kai lri mwalranga kudra sapatuthingalane ku takigelregelrane kitulrisi; kudra kiadawlu si la kaiyana kitulrisi kigelregelre ku umawmase lai mialrini kai kitulrisinga kigelregelre.

¹⁹ Asi lwiyane ku kiatulrisi kigelregelre ku kai kiatulrisi kigelregelre kadrwa ku pacucugane; ku tinukucingalrane yai apasalaladhane ku drekase ki Twaumase.

²⁰ Sanaka aneeanenga padrumulra ku tangimiane numi sakidawlu numi ki Twaumase.

²¹ Alaiyasi sakidawlusu laka durisu, kai lrika matumane; ai sana ikai ku amaka dulrwane ngilralraingi, kidrikisa ku angilralrainganesu.

²² Ku duri lu kipilri ki Tamatama amaninga ku Tamatama ku mwakerenge iniane, ku ngialralrainginga ku umawmase lu kipilri amaninga ku duri ki Kirisitu.

²³ Kunumi yai ku Twaumase arakai ku tinukucingalrane ka salangadhane, lakamani kudra madha aduriduri ki umawmase.

²⁴ Laretesane, kunumi ka tangeea, ikai cucubungu ki Twaumase, padrumulra ku tangimiane numi sa pilri ku Twaumase.

Ngwakai ki vaevaeva si walibakane

²⁵ Pangukai ki vaevaeva, kadrwa ku patwalaili ki Tamatama kipelaela. Ai kiakakalithaku ki Tamatama, si ka amaninga ku nisudralrwane ka umawmase. Lri sakaiyaku ki miyaiya kai ku nagane si pelaela kai takidremedremaneli numiane.

²⁶ Lu kidremedremaku kai kucingalrane kai tangimiamiane kaiasasane, lu kidremedremaku kai umawmase mathaithaariringa lu singikaiyane ki sakwa ka tangimiane.

²⁷ Alaiyasi sataelrelreanengasu, madha kisanu kidaidaili; alaiyasi kaisu karudrangeana, la madha pasana sataelrelrelreane.

²⁸ Alaiyasi karudrangesu, kaika pasalriu; ku kaina marudrange ku ababai la karudrange laka kadrwa ku tapasalrivane. Ai anatumane la kaika ngimiyaiya kikai amiaku numiane, ka kipadradresedresenge ku akwalriane ikai ki sikace lukavaivai.

²⁹ Laretesane, ku nau pelaela iyali numiane yai: Kaika thaininunga kai vai, twalainga kaikameane yai, ku yakai ku taelrelreini ka ababai, ngialrava kwidra ki kadrwa ku taelrelre;

³⁰ ku watubitubi, ngialrava kwidra ki kai watubitubi; ku kiarararagai, ngialrava kwidra ki kai kiarararagai; ku walangalangai, ngialrava kwidra ki kadrwa ku manemane;

³¹ ku kiasupisupilri ki tacekecekelane kawmasane, ngialrava kwidra ki kai kiasupisupilri. Asi lwiyane kikai yakai kikai kawmasane lri padaalrunga si ngilribate.

³² Anatumane laka kadrwa ku thekelrane numi amiaku. Ku kai marudrange ku umawmase saliakavaeva ku kidremedreme ikai ki awngane ki Tamatama, asi lwiyane kwi lasu kiadremedremedreme ku akikadalamane ki Tamatama.

³³ Ku kakalikalithi ki marudrangenga awngane kai kawmasane; asi lwiyane lri pakiragai ki taelrelreini ka ababai,

³⁴ lai tara sadrwadrusa ku kidremedreme. Ku kakalikalithi ki kadrwa ku tawane si walibakane ka ababai amani kai awngane ki Tamatama, asi lwiyane amanini ka mwabangalre ngipapatarumara ku kinawmasane si abake. Ku kakalikalithi ki marudrangenga ka ababai amani kai awngane kawmasane, asi lwiyane lri pakiragai ki tawaneini ka sawvalai.

³⁵ Lu iyaku kikai paralubaku numiane, kainaku lri ruthuku numiane. Ani pacengecenge ku tapiane, ani mamamwa ku tapiane amiaku numiane, si pasikai ki awngane ki Tamatama pakaelre ngipapatarumara, ka kadrwa ku putedra.

³⁶ Kudra twasiasilanganenga ai malrithethe kai pasana karudrangenga ku umawmase, alaiyasi ku sawvalai lu kidremedreme la ikai ku tapianeini si kai mamamwa kwini ki ababai, ai la apikarudrange kai besere, mathariri lu karudrange, lu pia kwini kaika pasalriu.

³⁷ Ai, ku umawmase lu kalrithethe kai apikarudrange (kaika kiavutha, amanini ka malrithethe), si la dulru ngiraruthuku, lu mia kwini, si kai mwanga karudrange kwini ki tusiasilangengaini ka ababai mathaaithariri kamani.

³⁸ Lu iyane kikai, kudra marudrange ki siasilanganeini mathariri, lu kai karudrange laka mathaaithariri.

³⁹ Kudra marudrangenga ka ababai lu panianianiakeana ku tawaneini ka sawvalai yai kiaruthukwana, alaiyasi la pacainga ku tawaneini ka sawvalai, kai alisu lri dulrunga ngilralraingi mwa karudrange ku kadalameini ku sawvalai, ai mathariri mwa kwidra thadalrane ka sinzia.

⁴⁰ Ai, kai alisu alaiyasi kai pelanga karudrange lrika makakalra ku akaesadhane. Kikai yai kidremedremeli ka tangeangea; ai lu kidremedremaku, yakai kai Ri ki Twaumase kai wararake nakwane.