1 Kurintu 6 - Ngudradreadrekadhane Ka Sisiu 魯凱語聖經

Ku karivurivu ikai ki lasinzia

¹ Ikai numiane ka lasinzia, alaiyasi ikai ku ngwakai ki rivwane, anu kukusu mwa ki kaika sinzia ka tarasaibaibange, si kai pakamani ki sinzia turathudane numiane?

² Bekace numi kai thingale ala ka lri saibange ki yakawmasane kai sinzia? Kudra lri kamani numi ku lri saibange ki kawmasane, bekace ka kadrwa ku puku numi turathudane kudra ki la tatiitiki ku laawngane?

³ Kai numi wathingale ka lri saibangeta ki sasiakawlu belenge? Laikamanianenga kai awngane kawmasane?

⁴ Alaiyasi ikai ku miyaiya kai ku rivwane, lai pakamani numi kudra la kai kiatukucingalre ki swa kiwkai ku umawmase pamarasikai?

⁵ Matiakiarubwane turamuru! Bekace ka kadrwa numiane ku natangeanga ku malrigili si dulru turathudane ku rivwane ki laretesane?

⁶ La ikailringa numiane ka sinzia ku wakukusu ki thadalrane ka sinzia, si kukusu mwa ki kaika sinzia!

⁷ Lu maka kamanimani numi kukusu, kikai sapelaelane ala ka kiatulrepenge numi ku tasipadhane. Lri ka tumane kipasidralrilane ku tikiyane? Lri ka tumane lu asipunane ku tikiyane?

⁸ Mapasiadraidraidralrilinga numi si mapaasipusipunu, adravane papia ki retesaneini, la tuthadalrane ka miyaiya kai.

⁹ Bekace numi kai thingale ku manganga ku umawmase kai lri maka dulru akawkawlu ki kuni ki Twaumase? Madha ngikadraedraedrangelre! Sanaka wacapange ki sawvalai si ababai, wasukubu ki samiamiange, swadringai paswadringai, apairairange ka sawvalai, maupapalange ku tara sawvalai,

¹⁰ kwaupa, marau, mabusuku, twalilisi ki umawmase, pangwavutha malra ku palrapalrane, kai lri maka akawkawlu ki kuni ki Twaumase makanaelre.

¹¹ Ikai numiane, yakai ku laumawmase ku miyaiya kai kunadruma. Ai, sataluta ku nagane ki Tamatama ka Yesu Kirisitu si Ri ki Twaumase, la kisinawnga numi, kiapaalrivilrivinga numi si papia ki Twaumase, si makakadalrunga numi ki Twaumase.

Arakaiya kwi kinawmasane numi pakilrigu ki Twaumase

¹² Alau lri ikaai ku umawmase ku amia kai, “Wadulrwaku tumane sanaka maneemane amia.” Kai pasalriu, ai sanaka maneemane kai lri ka pakaesai muswane patuelre. Lri dulrwaku iya kai, “Sanaka maneemane wadulrwaku tumane.” Ai kainaku lri kiruthuku ki sanaka maneemane.

¹³ Yakai ku umawmase ku lri iya kai, “Kai akaneane pasiakai ki barange, kai barange pasiakai ki akaneane.” Kai pasalriu, ai ku Twaumase lri kabebetethe kai ki drusa. Kai kinawmasaneta kaika pasiakai ki akangangane ki sawvalai si ababai, pasiakai ki Tamatama ku italuvaivai, ku Tamatama amani ku patarwamara ku urikai ki kinawmasaneta.

¹⁴ Ku Twaumase pasiaelane ki Tamatama twalai ki wapacai, laka thadaalrane lri singikai ku pukuini si pasielane mitane.

¹⁵ Lri tara thiingale numi, kwini kinawmasane numi yai rarukudrane ki kinawmasane ki Kirisitu. Lri dulrwaku malra kai rarukudrane ki kinawmasane ki Kirisitu si tupairairange? Kai maka pikakua!

¹⁶ Lai lri tara thiingale numi, ku aneane ku maelre ki pairairange, amani ku maelrenga kwini ki alisu si ka vaevanga ku kinawmasane. Asi lwiyane kai Sisiu amia kai, “Ku tadrusa ku umawmase lri avaevanga ka kinawmasane.”

¹⁷ Ai, ku aneane ku kiaelre ki Tamatama, amani kudra yakai ki abakeini maelre ki Tamatama ka vaevanga.

¹⁸ Lakamani, kunumi kidaila ki apasalrivane ki sawvalai si ababai. Kai umawmase adravane pasalriu ku manemanemane kai lri capili ki kinawmasaneini, kathane ku pasalriu ki sawvalai si ababai ka mabebetethe ki kinawmasaneini.

¹⁹ Kai numi wathingale kwi kinawmasane numi ala ka daane ki Siri? Kai Siri yakai adringi numiane, ka patarumara ki Twaumase. Kwi kinawmasane numi kaika numianenga, Twaumasanenga.

²⁰ Asi lwiyane ku Twaumase arakai ku tinukucingalrane langai numiane. Lakamani, arakaiya ku kinawmasane numi pakilrigu ki Twaumase.