1 Kurintu 5 - Ngudradreadrekadhane Ka Sisiu 魯凱語聖經

Ngukai ki wacapange ki sawvalai si ababai ka laawngane ikai kiwkai

¹ Tengatenganaku kilalra ikai numiane ka yakai ku ngwakai ki wacapange ki sawvalai si ababai, kialalraku ku yakai ku padralra ki kelane ka tinaini amia. Kikai wacapange ki sawvalai si ababai ikai ki maelane ku takisuswane mialri kai maka pacepe!

² Manemaneana ku angikalrilrigwane numi? Naika kiangeange kwi kidremedreme numi sikakathane, la patwalai numiane pakatwase kwini ki paiya kwini ka umawmase.

^3-4 Ngukai nakwane, adravane ka kiatukudhaku numiane ikai adaili, kai kidremedremeli yakai taelre numiane. Pangwakainga naku ku nagane ki Tamatama ka Yesu tupasalrivane ki kwini pasalriu ki ababai si sawvalai ku umawmase, mia kwidra ki yakaiyaku kwini numiane. Lu irubu numi, kai kidremedremeli yakai taelre numiane. Satalwaku ku puku ki Tamatamata ka Yesu,

⁵ nai malra numi kwini umawmase si baai ki Satange, lani ka Satange ku mabebetethe ki kinawmasaneini, lani dulru kipalribulu ku abakeini, ikai ki akelane ngusela ki Tamatama ka vai.

⁶ Kai ka pacengecenge lu ngikalrilrigu numi! Wathingale numi yakai ku vaga ku amia kai, “Ku tikiyane ku sapawsemasemakane wadulru pawsemake ki sakalrevelrevegane.”

⁷ Mwalra cilri ku pasalrivane ka supilri ka sapawsemasemakane, lanu dulru kitulrepenge kabula. Lukamiyaiya kai, lri mia numi kwidra ki kadrwa ku sapawsemasemakane ka bavane ka lrevege; ku patengatengane, naika kadrwa numiane ku sapawsemasemakane. Ku angiakaneanane nai ki Takilragavane ka lrisi nipadulrwanenga, ku sarakaiyane ki Takilragavane ka lrisi ku lrulai ka kiu ka Kirisitu arakainga ngicacilri si patarumara.

⁸ Lakamani, lu pangimiata kai ki lrisi, madha arakaikai ku supilri ka sapawsemasemakane, amani kwidra maikai ki pasalrivane si ngialisiane ka pange, arakaiya ku kadrwa ku sapawsemasemakane, ka amani kwidra yakai ku bulane si patengane ka sabulrwane ka pange.

⁹ Ku tigamili numiane saka siaswalane, peaelaelanga naku numiane, madha kisudalrudalru ki wacapange ki sawvalai si ababai iya.

¹⁰ Kainaku ka amanimani ki maelane ku takisuswane kudra ki la wacapange ki sawvalai si ababai, kararau, kupawpa, si sukusukubu ki samiamiange ka umawmase; kathane lu katwasane kai kawmasane, ku akitukudhane kai ki miyaiya kai ku umawmase kaika amaka dulrudulrwane.

¹¹ Ku pacuganeli yai: Madha kisudalrudalru kwidra ki sinziaku amiamia, la capange ki sawvalai si ababai, kararau, sukusukubu ki samiamiange, tusinalrelrelreme ki palrapalra, kabusubusuku, si tara kupawpa ka umawmase; adravane ka akibalrulane liniane kane madha taelrelre.

^12-13 Ku sikiningili kaika asaibangane ki maelane ku takisuswane ku umawmase, ku Twaumase lrika amaninga ku lri saibange liniane. Ai, kai numi lrika amani ku lri saibange ki yakai ki kiwkai? Mararaamau ku taiyane ki Sisiu kai, “Patwaladha numiane si pakatwase kudra ngialisiane ku kidremedreme ku umawmase!”