1 Kurintu 4 - Ngudradreadrekadhane Ka Sisiu 魯凱語聖經

Nisikawlane ki Kirisitu

¹ Lu drele numi naiane naika twasasiakawlu numi naiane ki Kirisitu, ka kiapasudalepe ka taramarasikaikai ku kaika athingalane ka matiasamaimali ki Twaumase.

² Ku ani pia kwini iyaiya ki tawki ki taramarasikaikai ki daane amani ku apakaelreane ku kidremedreme.

³ Ku takikawriarivaneli numiane, si sanaka aneeane, twatikiyanaku; kainaku ngiakakawriariariva.

⁴ Lu ngikakidremedremaku mabula kai takidremedremaneli, ai kai lri maka dulru ngukai kai si pelaela ka kadrwa ku pasalrivaneli. Kathane ku Tamatama ka lri saibange nakwane.

⁵ Lakamani, lu kaiyana kela ku vai yai, kunumi madha kawriariariva sanaka aneanenga ki umawmase. Lri ukalava ku akelane ngusela ki Tamatama ala lri ikai ku bibiilrilinga ku asaibangane; lukamaninga kwidra, lri utaluvaivai kudra niseketane ikadradridrimitane, si putaluvaivai ku nau pangimia iyaiya kidremedreme ki umawmase. Lukamaninga kwidra, sanaka aneanenga lri patwalai ki Twaumase malra ku naika akidrengedrengerane.

⁶ Laretesane, ngwalai numiane, wamalraku kikai tangimiane si arakai ki Apuluse si kwaku, tusapelaelane, ku lrika atwalralravane numi “Paluludu ku kakudhane” ku pacugane kikai ki vaga. Kunumi adravane ka aneane madha ngitatwabelenge, lamialri madha tukucingalre kikai, la tutikiane kavai.

⁷ Aneane ku paakaci muswane ki palrapalra? Kai ka patarumara ki Twaumase muswane patuelre? Lakamani, asu ngidradrengedreengere, miakau kaika patarumara ki Twaumase muswane patuelre?

⁸ Paka yakainga numi sanaka maneemane! Swaetenga kwi akaesadhane numi! Atalialalainga numi si puthili naiane. Sana mia kwini! Madalamaku kamani luka tengatengaane numi atalialalai, la nai tupapalra numiane atalialalai.

⁹ Asi lwiyane, singikai ku tadrelaneli, ku Twaumase pathingalane malra naiane ka lanisikawlane pikai ki bibiilrilinga, mararaamau ki lri kipathavungu kipapacai ka niemengane ka pasalriu, ikai belenge si kai kawmasane ka amaninga kudra giki, si pasiavava ki sasiakawlu belenge si yakawmasane ka umawmase.

¹⁰ Ngwalai ki Kirisitu, amaninga nai kudra makulrungu ka umawmase, ai kunumi ikai ki Kirisitu la ngibaalrelringa numi amalrigili; la turamuru nai, laka keecengelringa numi; la kisidrekase nai, la kitukuciingalrelringa numi.

¹¹ Pakela kaiasasane, sakamiyana nai kasilrasilrau kakadhakadhame, kai maka subusubu ki kinawmasane ku laimai, ka takilrumalrumadhane, katwatwatwase mwa kidruanga,

¹² la ngikakaungu nai ku sangilalapwane. Lu kipusu nai ki palrapalra, kawariva nai ku sasubulrubulrwane ku vaga; lu kihakegai nai, la kiadili nai;

¹³ lu kitusinalreme nai, la arakai nai ku mathariri ku vaga tubalre. Pakela kaiasasane, twa tabulubulwane naiane kai yakawmasane lu drele, la tusangupilriane ikai kawmasane.

¹⁴ Kai pacaseli iya kikai, ani kainu kai nai ka amia numiane, lri bulrwaku numiane, ka wamalraku silalake numiane, pangialrau kudra ki kinathalradhane ka lalalakeli.

¹⁵ Adravane tathathatha ku tarabulrubulru numiane ikai ki sikace ki Kirisite, vaeva ku tama numi. Asi lwiyane peaelaelangaku kai hukuingi numiane, yakaiyaku adringi ki Yesu Kirisitu si atamanga naku numiane.

¹⁶ Lakamani, lri pasapukwanaku numiane twalralravaili.

¹⁷ Ngwalai kikai, siakawlaku ki Timuthi mwa numiane kwini; ikai adringi ki Tamatama kai lasu amani ku kathalraili ka pakaelre ku kidremedreme ka lalake. Lri pakipapawlringau numiane, ku taikaiyaneli adringi ki Yesu Kirisitu kabavanenga ku sikace si palululudu ku kadalranane, kamani ku bulrubulruli ikai inunga ki kiwkai.

¹⁸ Ikai numiane, yakai ku laumawmase ku kai lri kela amia nakwane mwa numiane kwini, la kirimunga ngitatwabelebelenge ngitatwadradrau.

¹⁹ Ku patengatengane, alaiyasi palraingi ku Tamatama, kainaku lri tarathainunga si la kela drele numiane. Lu kamaninga kwini, kainaku ka lri kilalalra sikakathane kudra la ngiakarararakacane luka manemane ku iyaiya lini, mialri ka lri dredrelaku luka manemane ku dulru lini tumane.

²⁰ Asi lwiyane ku sarathudane ki Twaumase kai yakai ki vaga, yakai ki puku.

²¹ Lri pilri numi ki inu? Ani iluku ku salrumalrumadhane amia numi, ani iluku ku thalradhane ku sulrapelane amia numi nakwane?