1 Kurintu 3 - Ngudradreadrekadhane Ka Sisiu 魯凱語聖經

Papapalra ki Twaumase kaungu

¹ Laretesane, lu pudriadringadhane kawriva, lu kawrivarivaku numiane, kainaku maka twa swakaiyane ki Siri numiane, twa swa kawmasanaku numiane, ka lrulai ikai ki salrwane ki Kirisitu.

² Lri ara thuthwaku lapu numiane sikakathane, kai maka arakai ku aga, asi lwiyane kai numi wathingaleana kane ku aga. Adravane kai asasane, laka sakamiyana numi kai thingale kane ku aga,

³ asi lwiyane thadaalraneana numi singikaikai ku tulekete ki umawmase panianianiake. Ikai numiane yakai ku pathalrane, yakai ku rivwane; kai ka sapelaelane kikai ala ka swa kawmasane numi, ka singiakaikai ku tulekete ki umawmase panianianiake?

⁴ Ikai numiane yakai ku amia kai, “Kwaku yai swakaiyaku ki Pawru”. La ikai ku amia kai, “Kwaku yai swakaiyaku ki Apuluse”. Lukamiyaiya kai, manemane ku tamakakaelane numi ki swa kawmasane ka umawmase?

⁵ Manemane ku apasipane ki Apuluse? Manemane ku apasipane ki Pawru? Sasiakawlu nai ki Twaumase sikakathane, ka lri arake numiane papia ki Twaumase kasalru. Kuta makanaelre singiakaikaita ku tapavalavalane ku awngane mitane ki Tamatama si katwase kaungu:

⁶ Wadukaku, ku Apuluse la pwacilai, ai ku amani ku pacebe pakadrau yai Twaumase.

⁷ Ku waduku si pwacilai kadrwa ku manemane ku apasipane; yakai ki amani kwidra pacebe pakadrau patuelre ka Twaumase.

⁸ Ku waduku si pwacilai kadrwa ku tamakakaelane, ku Twaumase lri singikai ku takaungane ki tangea si pawlrawlrau iniane.

⁹ Ku nai yai papalra nai ki Twaumase kaungu; kunumi laka angangade numi ki Twaumase. Kunumi laka mialri numi ka nitudaanane ki Twaumase.

¹⁰ Arakaiyaku ku patarumara ki Twaumase nakwane ku migemi, mia ki sialrima ka taratudadaane ka wacegecegenga ku karwalai, ku palrapalra la pikai belenge tudaane. Ai sanaka tangeea lri dradreele ku tapangimianeini pibelenge karwalai tudaane.

¹¹ Asi lwiyane ku Twaumase wacegecegenga ki Yesu Kirisitu ka amani ku kathane ka karwalai, kadrwa ku umawmase ku lri dulru cegecege ku drumane ku karwalai.

¹² Ibelenge kai ki karwalai, yakai ku lri arakai ku kingi si gingi, ku tinukucingalrane ka lrenege tudaane; lalri ikai ku lri arakai ku laangatu, ku ubulu, si sangukimugiane tudaane.

¹³ Lu kelanga ku asaibangane ku vai, ku tatudaanane ki tangea lu kathariri lu kalisi lai adrelanenga patuelre; asi lwiyane ku maadrau ka apwi lri pathingalane si kilrialringau ku takaungane ki sanaka aneane, lai utaluvaivai kudra patengatengane ka mathariri.

¹⁴ Alaiyasi kudra takaunganeini tudaane lu maka dulru kipalalava ki apwi, kwini lasu lai lri malra ku pakalreva.

¹⁵ Alaiyasi kudra takaunganeini tudaane lu kulama ki apwi si kawtu, kai lasu lai asipunu, ai lri kipalribulu kai lasu, mia kudra mwabere twalai ki apwi.

¹⁶ Lri tara thingale numi, kunumi yai daane ki Twaumase, ku Ri ki Twaumase yakai adringi numiane.

¹⁷ Lakamani, alaiyasi ikai ku mabebetethe ku daane ki Twaumase, ku Twaumase lri tara kabebeetethe si amudu iniane; asi lwiyane kai daane ki Twaumase yai saniange, kunumi amani numi ku daane ki Twaumase.

¹⁸ Kai umawmase kai lri maka ngilralrulrucuku. Alaiyasi ikai numiane ku singiakai ku lekete ki kawmasane si ngitatu malrigili, nai ngithathingale kamani ala ka makulrungu, alani kamani kudra patengane ka malrigili.

¹⁹ Asi lwiyane ku malrigili niyane ki yakawmasane, lu drele ku Twaumase yai makulrungu. Mia ku taiyane ki Sisiu iya kai, “Ku Twaumase kudra ki malrilrigili ku umawmase pawalrabuku ki salrilrigilaneini.”

²⁰ Kudra taluvale ku Sisiu la iya kai, “Ku Tamatama wathingale ku takidremedremane ki malrigili ala ka taingeane ka kai mwalecege ka kidremedreme.”

²¹ Lakamani, adravane ka aneane madha lrigulrigu ku dulru pia ki umawmase. Ku patengatengane, sanaka maneemane numiane patuelre:

²² Ku Pawru, Apuluse, Pitiru, kikai kawmasane, ku apanianiakane si apacadhane, kaiasasane si lukabibilrili, kikai patuelre numiane;

²³ kunumi Kirisitwane numi, ku Kirisitu laka Twaumasane.