1 Kurintu 2 - Ngudradreadrekadhane Ka Sisiu 魯凱語聖經

Patharukai ki ziwzika ki Kirisitu

¹ Laretesane, kunadruma sa mwaku numiane kwini, kainaku arakai ku manemane ku mathariri ka vaga ku kinavagavagane si pelaela numiane ku kaika athingalane ka matiasamaimali patharukai ki Twaumase.

² Asi lwiyane makecenge kai kidremedremeli, lu ikaiyaku taelre numiane, kathane ku Yesu Kirisitu si tapacadhaneini ikai ki ziwzika, kadrwa ku manemanemane ku nimatikaiyane.

³ Ngwalai kai, sa mwaku numiane kwini yai, twaramuraku si kakiwcu, ukuludru dradreele.

⁴ Ku iyali ku vaga ki Twaumase, ku pelaelaelali ku hukuingi, kaika niapapiyayane vavangalre ka vaga, nisatalwane ku puku ki Siri pathingalane ku patengane ka sabulrwane.

⁵ Ku salrwane numi lani kai sitangadrane ku lrigilane ki umawmase, ani sikarwalai ku maadrau ka puku ki Twaumase.

Lrigilane ki Twaumase

⁶ Ai, papia kudra ki la pwacacuganenga ku takisuswane ku umawmase, lri mialri nai iya ku lrigilane; ai kainaku lri iya kai ngwakawmasanane ku lrigilane, lai kainaku lri iya ku lrigilane kudra ki warathudu kawmasane si aliakaikainga.

⁷ Ku pelaelaelali ku lrigilane yai kaika athingalane ka matiasamaimali ka lrigilane ki Twaumase, amani kwidra niseketane papia ki umawmase, ai sakaiyana bekace kawmasane paswalanga ani malra ku lrigilane ka lrigu iya mitane.

⁸ Ku amani ka warathudu kawmasane kadrwa ku natangeeanga ku wathingale kai ki lrigilane, alaiyasi ka wathingale, kai lalasu nai kai kedrekedre ki lrigu ka Tamatama pwa ki ziwzika.

⁹ Mararaamau ku taiyane ki Sisiu iya kai: Ku pasikai ki Twaumase padulru kudra ki madalame iniane ka umawmase, amani kudra kaika dreleana ki maca, kaika kilalrana ki calringa, laka kadrwana ku umawmase ku pakela kidremedreme!

¹⁰ Ai, ku Twaumase pangwakai ki Rini pelaela mitane kudra ngwakai iniane ka kaika athingalane ka matiasamaimali. Ku Siri wadrele pudriadringai sanaka maneemane, adravane ka yaseketane ka takidremedremane ki Twaumase wadulru pudriadriingai drele.

¹¹ Kai umawmase, kathane kudra yadringi iniane ka abake ka wathingale ku ngwakai iniane patuelre. Laka thadaalrane, kathane ku Ri ki Twaumase ka wathingale patuelre ku awngane ki Twaumase.

¹² Kaita tarwamara ku ri kai ki kawmasane, tarwamarata ku pakainganai ki Twaumase ku Siri, pakai ku amaka dulrwaneta thingale ku patarumara mitane ki Twaumase sanaka migemi.

¹³ Lakamani, ku iyaiya nai ku sabulrwane kaika niarakaiyane ku lrigilane ki umawmase si arakai kawriva, niarakaiyane ku vaga ka sabulrwane ki Siri, si papia ki yakai ki Siri ka umawmase swacenge pelaela ku ngwakai ki Ri ka patengane ka sabulrwane.

¹⁴ Ai, kudra kadrwa ku Ri ki Twaumase ku umawmase kai lri dulru tarumara ku nipatarumarane ki Ri ki Twaumase ku migemi. Ku miyaiya kai ku umawmase kai lri dulru thingale kilakikai, lu kidremedreme kai mamamwa ki kakudhane, asi lwiyane ku kucingalrane kilakikai lu arakaiyane ku takisuswane drele wadulru pulringalringau.

¹⁵ Ku swakai ki Siri ku umawmase wadulru thingale ku kucingalrane sanaka maneemanenga, ai kadrwa ku umawmase ku wadulru kawriariva iniane.

¹⁶ Mararaamau ku taiyane ki Sisiu iya kai: Aneane ku wathingale ku kidremedreme ki Tamatama? Aneane ku lri dulru atalingikaiyane iniane pelaela ku apangimiane? Ai, kuta ka swakai ki Siri ka umawmase yai yakai ku kidremedreme ki Kirisitu.