1 Kurintu 16 - Ngudradreadrekadhane Ka Sisiu 魯凱語聖經

Pakubulu paralubu ki Sinzia

¹ Pangukai ku asarubwane ku paisu si paralubu ki sinzia kai lri katumane lu singikai numi si pia ku pelaelali ki swa Galatia ka lakiwkai.

² Luka tadrihaihadhane ka vai, kunumi makanaelre ngisasingikaiya ku malramalra numi si patwalai baai ku bebekelane ku paisu, la rubu, madha mukalavalava nakwane lu keela tasaruubu iya.

³ Lu kelanga naku, lri sikawlaku ku pakawnai numi ku umawmase, si baai ku sapelaelane numiane kai ki lalasu, lani kamani kai lalasu ku wailuku ku pakubulu numi mwa Yerusalrime.

⁴ Alaiyasi ani tara kamaani kela iya numi nakwane, kai lalasu lri dulru tupapalra nakwane.

Kikake ki Pawru

⁵ Apia ngukakaiyaku Makidunia. Lu maka lidrawnga naku Makidunia, lai lri mwaku numiane kwini.

⁶ Alau lri ikaiyaku maka piale numiane kwini, si alau lri ikaiyaku kwini pangilribate ki kalakecelrane, ala pacungulu ku kadalrananeli ubabadhane. Lukamiyaiya kai, adravane lu papinwaku katwase, lri dulru numi sateatedre nakwane.

⁷ Kainaku madalame lu lribalribataku takungulatatadre numiane; alaiyasi palraingi ku Tamatama, apia ikaiyaku numiane kawlawlai.

⁸ Ai, lri asuraku ikai Ipisu, pakela luka tatulrisisiane ki Malrimale ka vai;

⁹ asi lwiyane, adravane takalra ku wabaebalre ku umawmase, ikai kikai kai lrawlrawdru nimuelebane, la ikai kai mathariri ka akaungane madu.

¹⁰ Ku Timuthi alaiyasi mwa numiane kwini, mwarikaiyaku ku apakatharirane numi tarumara iniane, lani kasulivate ku kidremedremeini, asi lwiyane mararaamau nakwane ka pasiakaikai ki Tamatama kaungu.

¹¹ Sanaka aneeane madha sidrekadrekase iniane; wasateatedre madu iniane pakasulivate ku apacungulane ki kadalrananeini, lani kela kai nakwane, asi lwiyane mwakalavalavaku iniane ku akarededelane ki laretesaneta kainganai.

¹² Pangukai ki Apuluse, tara pasapukupukwanaku iniane ku lrika akarededelane ki drumane ka laretesane katwase lrikape numiane, ai lu kidremedreme kaina ka samwamwa kwini, sana ikai ku adulrudulrwane ku vai, kai lasu lri katwase.

Bibiilrilinga ka vaga

¹³ Kunumi kipapawlringalringava, kapapedrenge acegecege ikaiya ki takisuswane, pagagarangana, la sapukwane.

¹⁴ Patuelre ku awngane singikaiya ki sakialibake ki kidremedreme si pia.

¹⁵ Laretesane, yakai kai apasapukwananeli numiane, wathingale numi ki Setipana si wacekecekeleini; ki kai amani lini ku aswalaalanga a Kirisite ikai ki swa Akaia, si la kisamula turamuru pasikai ki lasinzia.

¹⁶ Kunumi kialalra madu ku miyaiya kai ku umawmase, si kwidra papalra lini kwalrialrialri kaungu ku umawmase.

¹⁷ Ku tadulrwane ki Setipana, Hutunatu, si Akaikuse kela kai, kiaragadhaku turamuru. Kai lalasu pacengecenge ka patwakamani ku kaika taikaiyane numi kikai.

¹⁸ Kai lalasu wasasa ki kidremedremeli, mia numiane lu kisasa numi. Ku miyaiya kai ku umawmase ausakenane numi.

¹⁹ Ku lakiwkai Asia mwadringadringai numi amiamia numiane; kai Akuila si Pirisecila, si kudra yakai ki daane lini ka kiwkai, yakai adringi ki Tamatama si mwadringadrengai numi iya numiane.

²⁰ Kai yakai kaika laretesane mwadringadringai numi amiamia numiane. Kunumi arakaiya ku mabula ku samatubarengerengerane numi.

²¹ Amaniaku ka ngiapapacase, “Kwaku ka Pawru anu mudringadringai amiaku!”

²² Alaiyasi ikai ku kai madalame ki Tamatama ku umawmase, kwini lasu lri kipusu. Tamatama, bwala kela!

²³ Ku Tamatama ka Yesu ani baai ku migemi numiane!

²⁴ Ikai adringi ki Yesu Kirisitu, madalamaku turamuru numiane makanaelre!