1 Kurintu 15 - Ngudradreadrekadhane Ka Sisiu 魯凱語聖經

Tasielane ki Kirisitu

¹ Laretesane, ani pulringalringau amiaku numiane ku pelaelali ku paswalala ku hukuingi, kikai hukuingi tarwamaranga numi, si arakai iniane tukarwalai ki salrwane.

² Alaiyasi pangimia numi kikai hukuingi, kaika ungawngau ku takasalrwane numi, lri tara ngwalai numi iniane si kipalribulu.

³ Peaelaelanga naku numiane ku tarumarali ku makuciacingalrenga ka hukuingi, amani kai: Singiakai ku taiyane ki Sisiu, ku Kirisitu pasiakai ki pasalrivaneta pacai,

⁴ la singikainga ku taiyane ki Sisiu, si kidralreke, ikai ki samakatulrulu la sielane.

⁵ Papia ki Pitiru adrelane, la papiyanga ki ta 12 ki nisikawlane adrelane.

⁶ Sakabilrilanenga la kingivaalenga papia ki twapapapalra iniane ka ta 500 pulrabale adrelane, kilakikai umawmase takaalrana ku yataluvaivaiyana, adravane ka yakainga ku lawapacainga.

⁷ Sakabilrilanenga, la papia ki Yakubu adrelane, la papiyanga ki nisikawlane makanaelre adrelane.

⁸ Ku bibilrilinga, la mialri papia nakwane adrelane, kunaku miaku kau amaani kwidra kiatulalake ikai ki kaiyana mwatakelretane ku tangimiamiane ki tulalake ka umawmase.

⁹ Ikaiyaku ki nisikawlane naamaniaku ku kaikasapatumatumane, ka kai swadalepe kitunisikawlane, asi lwiyane wahakegainga naku kai ki kiwkai ki Twaumase.

¹⁰ Ai, ngwalai ki migemi ki Twaumase, ala ngimianga naku kaikameane kikai, ku baaini nakwane ku migemi kai avutha. Ngiabalre kamani, makwalrialriaku kaungu ki drumane ka nisikawlane makanaelre; ku patengatengane, kainaku kamani ka mauawngu, ku mauawngu, amani ku migemi ki Twaumase ka yakai nakwane taelre kauawngu.

¹¹ Lakamani, adravane ka amaniaku ka drumane ka nisikawlane, pangiamia nai kikai dindu, la mialri numi pangimia kikai kasalru.

Patharukai ku asielane ki sinzia

¹² Kudra pelaelaela nai ku hukuingi yai ku Kirisitu twalainga ki wapacai si sielanenga, ani ikaiyana numiane ku kadrwa ku miyaiya kwini ku wapacai ku umawmase la sielane amiamia numiane?

¹³ Alaiyasi ka kadrwa ku siaelane niyane, ku Kirisitu kai siaelane, maru amiyanga;

¹⁴ alaiyasi kai twalai ki wapacai si sielane ku Kirisitu, lri kakadrwa ku manemane ku apelaelane nai, lai lri ka kadrwa ku akasalrwane numi.

¹⁵ Lukamiyaiya kai, athingalane nai ka madraedrangelre pelaela pasikai ki Twaumase; asi lwiyane peaelaela nai, pasiaelane ki Kirisitu patwalai ki wapacai iya. Alaiyasi ka patengatengane ka kadrwa ku wapacai si sielane niyane, ku Twaumase kaika pasiaela ki Kirisitu.

¹⁶ Alaiyasi ku wapacai ka umawmase la kai sielane, ku Kirisitu kai siaela maru amianga.

¹⁷ Anaiyasi kai siela panianiake ku Kirisitu, ku takisuswane numi, naika kadrwa ku pacugane, lanai ka sakamiya numi amamama ikai ki pasalrivane.

¹⁸ Kudra miyaiya kai ku vaga, ku wapacainga ku la Kirisite lai ka mamudunga.

¹⁹ Alaiyasi kuta ka masalrunga ki Kirisitu ka umawmase laka kathane ku taikawmasanane ku sidramadramata, matikukuruta ka silrialribate ki sanaka aneeane kai kawmasane.

²⁰ Ai, ku patengatengane ku Kirisitu twalainga ki wapacai si sielane; kikai sapelaelane ka patengatengane ku wapacainga ku umawmase lri mialri sielane.

²¹ Asi lwiyane kai apacadhane yai twalai ki tangea ka umawmase kainganai, ku siaelane ku wapacai lai mialri twalai ki tangea ka umawmase kela.

²² Maruamaninga ku pacai ki mapapangale ka ngwalai ku tamararaisane ki Adame, laka thadaalrane, ku pacai ki laumawmase amani sa mararaisi ki Kirisitu.

²³ Ai, sanaka aneane lri singikai ku tamasakaikaiyane siela: Ku aswalaalanga amani ku Kirisitu, ku mwasakadrusa, amani lu kelanga pela, kudra swakai iniane ku umawmase.

²⁴ Ala lri kela ku satwalrepenge; lukamaninga kwini, ku Kirisitu lri pakamudu patuelre ku puku ki amani ku warathudu si amani ku magagemegeme ku puku ikai ki ngwakai ki abake, lai sawlri ku puku ki talialalai baai ki Tama ka Twaumase.

²⁵ Asi lwiyane ku Kirisitu lri tara rathudu, pakela lu pamalebe ku Twaumase ki sanaka baadha. Si kirathudunga makanaelre ikai tailebeane ki drapaleini.

²⁶ Ku bibiilrilinga ku lrika apakamudaneini ku badha amani kai apacadhane.

²⁷ Asi lwiyane kai Sisiu amia kai, “Ku Twaumase lri pitailebeane pikai ki drapale iniane sanaka maneemane.” Athingaalane, kai taiyane ikai kai “sanaka maneemane” iya, kaika paelre ki Twaumase, asi lwiyane kai Twaumase amani kudra lri malra sanaka maneemane si putailebeane ki drapale ki Kirisitu.

²⁸ Lu kelanga ku apidrurane ki sanaka maneemane ikai ki Kirisitu, ku Lalake lai mialri pidruru ikai kwidra ki amani ku wamalra sanaka maneemane si pasalaladha iniane ka Twaumase, ku lrika asabelenganeini ka Twaumase ki sanaka maneemane si rathudu patuelre.

²⁹ Anakai ka miyaiya kai, kudra la atalingikaiyane ki wapacai kipabanau laka manemane ku pacugane? Ku sidramadrama lini laka manemane? Anaka kadrwa ku siaelane ku wapacai ku miyaiya kai, kwini lalasu ani kirimwana atalingikaiyaneana ki wapacai kipabanau?

³⁰ Manemane ku akidrangidrangiyane nai ki sapapacai?

³¹ Laretesane, tamaicubunganeli ki apacadhane lukakaiyaiyaiya! Wathurwaku iya kikai, amani samaramaramauta ikai adringi ki niake ki Tamatama ka Yesu Kirisitu, arakaiyaku numiane ngilralrigu.

³² Alaiyasi ikaiyaku Ipisu kiulucu kudra ki lawaudriwdripi laka tengatengane ka ngwakai ki kidremedreme ki umawmase, kikai papia nakwane manemane ku akaesadhane? Alaiyasi kai siela ku wapacai, maru amaaninga kudra taiyane ki vagata, “Ala takanekane ungungulu, kai lri tara paacaita lukakaiyane.”

³³ Madha kitupupwici ki sivavangane, “Ku manganga ku talrailragi pangilisiane ki takatharirane!”

³⁴ Kipapawlringava, madha pasalrisalriwnga. Lu iyaku kai kawriva anithingale kainu amiaku numiane, asi lwiyane ikai numiane yakai kwi kai wathingale ki Twaumase.

Siaelane ku kinawmasane

³⁵ Yakai ku lri kivaga, “Lu sielane panianiake ku wapacai ku umawmase? Lai lrika ngitwatumane ku kinawmasane?”

³⁶ Kusu ka kadrwa ku thingale ka umawmase! Ku paivaisu pikai ki dae ku berathe, ana kai pacai nai kai dulru thiwlru si kadrau.

³⁷ Ku paivaisu ku mugi, ku ladrumane ku berathe, vaeva ka berathe, kaika amani kudra lri kadrau akinawmasane lubibilrili.

³⁸ Ku Twaumase singiakai ku kidremedremeini baai ki sapaivai ku kinawmasane; paswadalepe ki makaelaela ka sapaivai ku tangimiane ku kinawmasane.

³⁹ Ku beate ki lawaudriwdripi la mialri kai maramaramau makanaelre: Kai umawmase yakai ku umawmasane ka kinawmasane, kai bulabulai la ikai ku bulabuladhane ka kinawmasane, kai adhadhame la ikai ku adhadhamane ka kinawmasane, kai kange la ikai ku kangane ka kinawmasane.

⁴⁰ Yakai ku swa subelebelenganane, la ikai ku swa kawmasanane ka kinawmasane; ku swa subelebelenganane ku kinawmasane yakai ku tharirane, ku swa kawmasanane ka kinawmasane la ikai ku takamaelanane ku tharirane.

⁴¹ Kai vai yakai ku tharirane ki ledraini, kai dramare la ikai ku tharirane ki ledraini, kai tariau la ikai ku tharirane ki ledraini; adravane kikai latariau yakai ku tamakaelaelane ku la tharirane lini.

⁴² Kai wapacai lu siela panianiake lalri ka miyaiya kikai. Ku kinawmasane lu dralrekanenga maburau kalisi; lu sielanenga panianiake kai lri kalisinga.

⁴³ Ku kiadralreke yai ngialisiane ka twaramuru; ku siaelane panianiake amani ku kiatulrepenge si ka makecenge.

⁴⁴ Ku kiadralreke yai beate ka kinawmasane; ku siaelane panianiake yai abake ka kinawmasane. Kudra yakai ku panianianiake ka kinawmasane, mialri ka yakai ku kinawmasane ki abake.

⁴⁵ Asi lwiyane kai Sisiu amia kai, “Kudra aswalaalanga ka Adame kiabekace ikai ku niake ka umawmase”; ai kudra bibiilrilinga ka Adame amani kudra wabaai ku niake ka abake.

⁴⁶ Ku aswala kaika ngwakai ki abake; ngwakai ki kinawmasane, ala ikai ku ngwakai ki abake.

⁴⁷ Ku aswalalanga ka Adame yai twalai ki dae kituumawmase; ku sakadrusa ka Adame yai twalai belenge kela.

⁴⁸ Ku swakai ki dae ku umawmase ngiamia kudra ki twalai ki dae kidarepe ka umawmase; ku swa subelebelenge ka umawmase ngiamia kwidra ki twalai subelebelenge kela ka umawmase.

⁴⁹ Yakainga ku tangimiamianeta ki ngwakai ki dae ka umawmase, lukabibilrili lai lri ikai ku tangimiamiane kudra twalai belenge kainganai ka umawmase.

⁵⁰ Laretesane, ku lrika aiyaneli yai: Ku niarakaiyane ku beate si erai darepe ka kinawmasane kai lri maka dulru tarumara kudra kuni ki Twaumase, kudra lri kaburau kalisi kai lri maka tarumara ki kai lri kaburau kalisi.

^51-52 Kunumi kilalalra ki kikai vaeva ka kaika athingalane ka matiasamaimali: Kaita ka lri makitu pacai makanaelre, lri ikaita kudra ki yasasane, maru nikedrakedraapanenga, kudra abibiilrilinga ka rapa lu siange, lri akabalrithi patuelre. Ku bibiilrilinga ku rapa sana siange, ku wapacai ku umawmase lri siela panianiake si kai lri kalisinga; lai mialrita akabalrithi.

⁵³ Asi lwiyane kudra lri kalisi lri tara akabalrithi kai kalisinga, ku lri pacai lai lri akabalrithi si kai pacainga.

⁵⁴ Lu kelanga kudra nalri kalisi la akabalrithi si kai lri kalisinga, kudra nalri pacai la akabalrithi si kai lri pacainga, ala kwini taiyane ki Sisiu ngiamianga: Ku apacadhane kiapakamudunga; ku apamalebeane ngiamianga!

⁵⁵ Apacadhane! Ku tapamalebeanesu yakai inu? Apacadhane! Ku duku ka cenekesu yakai inu?

⁵⁶ Ku duku ka ceneke ki apacadhane twalai ki pasalrivane kela, ku puku ki pasalrivane twalai ki hulrice kela.

⁵⁷ Ai, maelanenga ki Twaumase, la alra mitane pangukai ki Tamatama ka Yesu Kirisitu si pamalebe!

⁵⁸ Lakamani, kathalraili kadalameli ka laretesane, acegecega kapapedrenge, madha lrudralrudrai. Madha takidulru kwalri pasikai kaungu ki Tamatama; asi lwiyane wathingale numi, ku pasiakai ki Tamatama kaungu kai lri alavutha.