1 Kurintu 14 - Ngudradreadrekadhane Ka Sisiu 魯凱語聖經

Twapela matikai ku lalrilrigilane ki Siri

¹ Kunumi kipasilapa ku sakialibake. Akulia ku pangwakai ki Siri ku lalrilrigilane, inilringa ku apelaelane ku hukuingi ki Twaumase ka lalrilrigilane.

² Kudra kawariva ku vaga ki abake kai lri papia ki umawmase kawriva, lri papia ki Twaumase kawriva, asi lwiyane kadrwa ku umawmase ku pwalringalringau ku taiyaneini. Kwi lasu pangwakai ki puku ki Siri si pelaelaela kai kaika athingalane ka matiasamaimali ka patengane ka sabulrwane.

³ Ai, kudra peaelaelaela ku hukuingi ki Twaumase yai papiapia ki umawmase kawriva, ka lri paadili, pasapukwane, si sasa liniane.

⁴ Ku amia ku vaga ki abake ku umawmase lri ngikakamani ku adilaneini sikakathane, ku peaelaelaela ku hukuingi ki Twaumase ku umawmase paadili ki kiwkai patuelre.

⁵ Anatumane la thingale numi kawriva ku vaga ki abake amiaku, ai masidradramaku lu ikai numiane ku apelaelane ku hukuingi ki Twaumase ku lalrilrigilane. Asi lwiyane, lu ikaai ku wadulru patululu kwi vaga ki abake, si la dulru paadili ki sanaka kiwkai makanaelre, lu kai mia kwini, ku peaelaela ku hukuingi ki Twaumase sanianiange ki kawariva ku vaga ki abake.

⁶ Laretesane, lu mwaku kwini numiane, alaiyasi la iyaku ku vaga ki abake sikakathane la kai mailuku si baai numiane ku padrele ki Twaumase, ku thingalane, ku nisakaladhane ku vaga, si sabulrwane, manemane ku apakaesadhane numiane?

⁷ Adravane kwidra la kadrwa ku niake ka sasenasenadhane ka lawbubulu, mararaamau ki bulalri ki lapatungutungu, alaiyasi ku lingau lini laka kadrwa ku tamakakaelane ku abelenge si alebe, ara maka duulru ku umawmase thingale ku ningibulalriane ku nipatungutungane luka manemane ka senai?

⁸ Alaiyasi ku pangia rapa lu kai maka kalalruai ku lingau, aneane ku lri maka padulru si kikaruburu?

⁹ La ka thadaalrane, ku iya numi ku vaga ki abake lu kai kalalruai, aneane ku lri thingale ku taiyane lukamanemane? Papiapia numi ki saseverane kawriva sikakathane!

¹⁰ Kai kawmasane makaalra ku makaelaeela ku vaga, ai yakai ku pacugane patuelre.

¹¹ Alaiyasi kainaku thingale kwini pacugane kwini ki vaga, kwini arakai kwini vaga si kawriva nakwane lu dreelaku yai maelane ka kuni ka umawmase, ikai ki tadrelaneini nakwane, mialriaku ka maelane ka kuni ka umawmase.

¹² Thadalrane, kudra mwarikai numi si sidrama ku ngwakai ki Ri ku nipatarumarane ka lalrilrigilane, aru kipasilapa kudra lri dulru paadili ki kiwkai ku lalrilrigilane.

¹³ Lakamani, ku kawariva ku vaga ki abake kitubia ku akibaadhane ku mwakalrivili ku puku, la palalrwai ku pacugane ku vaga ki abake.

¹⁴ Alaiyasi arakaiyaku ku vaga ki abake inulri, amani kai abakeli ka wainulrinulri, ai kai thingalane ki kidremedremeli kadrwa ku paluludane.

¹⁵ Lai pangitumanaku? Lri arakaiyaku ku abake inulri, lai mialriaku arakai ku thingalane ki kidremedreme inulri, lri arakaiyaku ku abake senai, lai mialriaku arakai ku thingalane ki kidremedreme senai.

¹⁶ Lu kaika miyaiya kwini, lu arakaisu ku abake kiaseasene ki Twaumase sikakathane, ikai ki tayelrelreane ku kai wathingale ki vaga ki abake ku umawmase kai pwalringalringau ku taiyanesu lukamanemane, ara maka duulru tupapalra ki kidremedremesu si “Amingi” iya? Kwi lasu kai lri maka thingale luka tumana amiamiasu.

¹⁷ Lukamiyaiya kai, adravane ka mathariri ku takiaseasenanesu inulri ki Twaumase, ku palrapalra kai lri maka dulru malra ku adilane.

¹⁸ Kiaseasenaku ki Twaumase, ku iyali ku vaga ki abake makakalra numiane ka yakai kai makanaelre.

¹⁹ Ai, ikai ki tayelrelreane kiwkai, madadalamaku iyaku ku niaku lrialrimalane ku adulrwane thingale ki umawmase ku vaga, dulru bulru ki umawmase ka vaga, si la kai iya ku niakukalralane ka vaga ki abake.

²⁰ Laretesane, ikai ki kidremedreme numi madha ngimiamia ki lavavalake, ikai ki malisi ka kakudhane ngialrava ki daini. Ikai ki kidremedreme numi pucacugana ngialrau ki tarudrawdrange.

²¹ Kai Sisiu amia kai: Ku Tamatama amia kai: Lri arakaiyaku ku vaga ki abake papia ki laumawmase kawriva, lri pangukaiyaku ku ngudui ki maelane ka kuni ka umawmase pelaela. Ai, kai lalasu kaiyana kialalra si patupapalra nakwane.

²² Lu piane kai si drele, ku peaelaela ku vaga ki abake ka lalrilrigilane kaika pasiakai ki lasinzia, sa patuthingalane papia kudra ki kaiyana masalru ka umawmase. Ai, ku nipasapukwanane si pelaela ku hukuingi ki Twaumase ka lalrilrigilane kaika pasiakai ki kai masalru ka umawmase, sa arakaiyane patuthingalane papia ki masalrunga ka lasinzia.

²³ Alaiyasi yelrelre sanaka kiwkai, la iya makanaelre ku vaga ki abake, ku langumawmawmase si kudra kai masalrwana ka umawmase lu mudaane, amamama lau lri iya numiane makanaelre?

²⁴ Alaiyasi la pelaelaelata ku hukuingi ki Twaumase makanaelre, ku kai masalru ku kai wathingale ku vaga ki abake ku umawmase lu kainganai mudaane, lri twalai ki takilalraneini ku vaga si ngikakidremedreme ku pasalrivaneini, si asiamia lri iya ngikakidremedreme,

²⁵ lu mutaluvaivai ku nisekeseketane ku kidremedremeini, kai lri thuru kai gurapangane sukubu ki Twaumase, la ngipapelaela iya kikai, “Ku Twaumase tengatengane ka tapalra numiane.”

Apangimiane ki kiwkai ka Kakudhane

²⁶ Laretesane, manemane ku pacuganeli? Lu yelrelre numi drihaihai, yakai ku wasenai, yakai ku wabulru, yakai ku tarwamara ku sapadrelane patwalai ki Twaumase, yakai ku kawariva ku vaga ki abake, yakai ku patululu ku vaga ki abake. Thingala, kudra nipiane patuelre luka apadiilane ki kiwkai patuelre pacengeecenge.

²⁷ Alaiyasi ikai ku lri kawriva ku vaga ki abake, lu takalra patatulrua ku kawariva si apawbalribalrithi, si lai patululu ki drumane lukamanemane ku pacugane ku taiyane.

²⁸ Alaiyasi ka kadrwa ku patululu ku umawmase, kudra lri iya ku vaga ki abake lri iceelrebe, lani ngikakamani si papia ki Twaumase kawriva.

²⁹ Ku ngwakai ki apelaelane ku hukuingi ki Twaumase, kai lri katumane pakawriva ku tadrusa ku tatulru, ku drumane ku umawmase la dradreela maka thingale ku taiyane lini.

³⁰ Kudra wanene, alaiyasi ikai ku drumane ku umawmase ku tarwamara ku sapadrelane patwalai ki Twaumase, kudra aswala kawriva lri makakai icelrebe ku vagaini.

³¹ Kai lri katumane lu mawbalribalrithi numi pelaela ku hukuingi ki Twaumase, lani kicawcakwane makanaelre, si kipasapukwane.

³² Ku peaelaela ku hukuingi ki Twaumase lri ngiraruthuku ku lalrilrigilane lini;

³³ asi lwiyane ku Twaumase malrase ku malrithavulu, mwarikai ku marathudu mapasalaladha. Mararaamau ki lakiwkai ki kawkawlu ki Twaumase,

³⁴ ku labaibai ikai ki tayelrelreane lri isaselebane. Kai lri maka putaluvaivai ku vaga; mararaamau ku tatukakudhanane ki hulrice ki swa Yuda, kwini lalisu lri supedrenge pasalaladha kwini ki tinukakudhanane.

³⁵ Kai lalisu alaiyasi ikai ku apithingale lini ku manemane, kai lri katumane kivaga ki taelrelreini ikai tavanane. Kai labaibai lu ikai ki tayelrelreane avavaga matiainu.

³⁶ Kai vaga ki Twaumase twalai numiane kainganai? Kathane numiane ka kiapelaela?

³⁷ Alaiyasi ikai ku tara peaelaelaelaku ku hukuingi ki Twaumase amia ku umawmase, si ku kiabaadhaku ki Siri ku lalrilrigilane amia, nai thingale kai pacaseli si baai numiane ala ka drekase ki Tamatama.

³⁸ Alaiyasi tudrekase ki kikai, kai lri katumane lu kai numi kicaicapili iniane.

³⁹ Lakamani, kunumi ka laretesaneli, kipasilapa ku baai ki Siri ku apelaelane numi ku hukuingi ki Twaumase ka lalrilrigilane, ai madha paidrengedrengere ku amia ku vaga ki abake.

⁴⁰ Sanaka maneemane singikaiya ku tamasakaikaiyane, si ulecege piya.