1 Kurintu 13 - Ngudradreadrekadhane Ka Sisiu 魯凱語聖經

Sakialibake

¹ Adravane thingalaku kawriva sanaka vaaga kai kawmasane, pakela ku vaga ki sasiakawlu belenge, alaiyasi ka kadrwa ku sakialibake, kai vagali lri mararaamau kudra ki marariariau matiupupungu ka wasiasiasiange tupareparepare ka bangebange.

² Adravane ikai ku thingalaneli sikiu, dulru thingale ku makaelaela ku thingalane, si kaika athingalane ka matiasamaimali, pakela ku wadulru pataluela ki lregelrege pwa ki laveke ku kecengane ka salrwane, alaiyasi ka kadrwa ku sakialibake, kadrwa ku palululudane.

³ Adravane pakaelreaku ku zaisange patarumara si palribulu ki umawmase, si la pakela ku ngiacacilri kai kinawmasane si kilama ki umawmase, alaiyasi ka kadrwa ku sakialibake, ku tapianeli thadaalrane ka kadrwa ku paluludane.

⁴ Kai sakialibake yai maka kiadili, yakai ku thalradhane; lu ikai ku sakialibake kadrwa ku pathalrane, kai ngiakalrilrigu, kai ngiakadiadiadirace,

⁵ kai paiyaiya ku akiarubwanane, kai ngiapapakaesai, kai malisilisi cacapange, kai pia kidremedremedreme ku tapasalrivane ki palrapalra.

⁶ Kai madalame ki kai makalecege, madalame ki patengane ka sabulrwane sikakathane.

⁷ Kai sakialibake wadulru pacepe patuelre, papia ki maneemanenga yakai ku salrwane, sasiadradrama, sakiadiadili.

⁸ Kai sakialibake palralrawthane. Ku thingalane ki asikivane yasasane; ku amia ku vaga ki abake ka binadhane lri tara ikai ku tapalikaiyane ku vai; kai thingalane maiyalri ka lri ngilribate.

⁹ Asi lwiyane kai thingalaneta si nipatarumarane ka lrigilane sikiu yakai ku apalikaiyane.

¹⁰ Ai, kudra kiatulrepenge sana kela, kwini yakai ku apalikaiyane lri kawlrau.

¹¹ Saka lavavalakaku, mia ki lavavalake ku vagali, ku tadrelane, ku gathimi. Kikai madrawnga naku si pucacuganenga, ku tangilavavalakaneli wacilringa naku patuelre.

¹² Kikai dreleta kaiasasane yai nipatwaladhane ki kailungane drele ka alalingu, ka marimarimi, lubibilrili lri maicubungunga si drele patakulringau. Kikai ku tathingalaneli ki Twaumase kaina kiatulrepenge, lubibilrili lri kitulrepengenga, mia ki Twaumase ku tathingalane nakwane patuelre.

¹³ Ai, ku salrwane, sidramane, si sakialibake kikai taitulrwane yakai palralrawthu, ala ku makuciaciingalrenga yai amani kai sakialibake.