1 Kurintu 12 - Ngudradreadrekadhane Ka Sisiu 魯凱語聖經

Patharwakai ki patarumara ki Siri ka lalrilrigilane

¹ Laretesane, patharwakai ki patarumara ki Siri ka lrilrigilane, ana thiingale amiaku numiane.

² Kunadruma sa kisuswana numi ki maelane ku takisuswane, takiaraakane numi papia ki maelane ka kadalranane, kiruthuku kwidra ki la kadrwa ku niake ka samiamiange.

³ Nau pelaela numiane, sanaka kiakandu ki Ri ki Twaumase ku umawmase kai lri kawriva, “Ku Yesu lri kipusu” iya. Thadaalrane, lu kaika kiarake ki Siri, kadrwa ku umawmase ku lri dulru pelaela, “Tamatama ku Yesu” iya.

⁴ Kai lrigilane taikalrane, ai thadalrane ka tangeangea ku Siri ka wabaai;

⁵ adravane makaelaela ku tapasikaiyane kaungu, ai thadalrane ka tangeangea ku Tamatama ka wabaai;

⁶ ku awngane taikalrane, ai thadalrane ka tangeangea ku Twaumase ku wabaai ki sanaka aneane ku adulrwane kaungu.

⁷ Pakai ku amalrane ku akaesadhane makanaelre, ku taikaiyane mitane ka tangeea pathingalane ki Siri la mialri kai maramaramau.

⁸ Ku Siri wabaai ki tangea ki umawmase ku lrigilane pelaela kai hukuingi, mialri ka thadaalrane ka Siri ka wabaai ki tangea ku thingalane ki abulrwane.

⁹ Kudra thadaalrane ka Siri mialri baai ku salrwane ki tangea ka umawmase, la baai ki drumane ka umawmase ku puku ki apawdringadhane ki macaeme.

¹⁰ Ku Siri wabaai kai ki umawmase ku puku ku apianeini ku pinangu Twaumasane ka puku, la baai kwini ki umawmase ku apelaelaneini ku hukuingi ki Twaumase, la baai ki maelane ka umawmase ku puku ku adulrwane apatukwakudha ki lari, kawriva ku vaga ki Ri, si lalrwai pelaela ku vaga ki Ri.

¹¹ Ai, ki kikai patuelre twalai ki thadaalrane ka vaeva ka Siri kainganai; ngiasasingikai ku kidremedremeini, patarumara ku makaelaela ku lalrilrigilane ki sanaka umawmase.

Vaeva ku kinawmasane la kakaalra ku rarukudrane

¹² Ku Kirisitu mararaamau ki vaeva ka kinawmasane, makaalra ku rarukudrane; adravane kai kinawmasane ka makaalra ku rarukudrane, ai vaeva ku kinawmasane.

¹³ Laka thadaalrane, kuta makanaelre adravane ka swa Yuda, ka swa Gurike, ku aduri ku ngialralraingi, twalai ki thadaalrane ka vaeva ka Siri kipabanau, si avaevanga ka kinawmasane, la maramaraamau kisupilri ki vaeva ka Siri.

¹⁴ Kai kinawmasane kaika vaeva ku rarukudrane, taikalrane ka rarukudrane si maelrelre ngidarepe.

¹⁵ Alaiyasi kai drapale la iya kai, “Kainaku ka alrima, lakamani kainaku ka swakai ki kinawmasane.” Kai lri dulru ngwalai kwini si kaika swakai ki kinawmasane.

¹⁶ Alaiyasi kai calringa la iya kai, “Kainaku ka maca, lakamani kainaku ka swakai ki kinawmasane,” maiyalri ka kai lri maka dulru ngukai kwini si kaika swakai ki kinawmasane.

¹⁷ Alaiyasi laka maca ku kinawmasane patuelre, ara maka duulru kilalra? Alaiyasi ka calringa patuelre ku kinawmasane, ara maka dulru sabalri?

¹⁸ Ai, ku Twaumase singiakai ku kidremedremeini apamwamwa kwini ki la makaelaela ka rarukudrane pikai ki kinawmasane ki umawmase.

¹⁹ Alaiyasi kwini la rarukudrane la maramaraamau patuelre, ara maka duulru akinawmasane?

²⁰ Ku patengatengane, ku rarukudrane makaalra, ai vaeva ku kinawmasane.

²¹ Lakamani, ku maca kai lri maka dulru iya kai ki alrima, “Kainaku mwarikai muswane!” Ku awlru lai kai maka iya kai ki drapale, “Kadrwa ku arakaiyaneli muswane!”

²² Ngiabaalrelringa, ikai ki kinawmasane kudra la mia ki twaraamuru ku rarukudrane, makadrwadrwa ka kai lri maka asakivalane.

²³ Ikai ki kinawmasaneta, kudra la kai makucingalre lu drelane, ala amani ku apawkalrivilaneta kilibake. Kudra la kai mathariri lu drelane amani ku apawkalrivilaneta kakalithi;

²⁴ kudra la mathariri kaika apawkalrivilane pangiragelane. Ku Twaumase paiya kai pasutelrai ki lakinawmasaneta, la baai ku madradrau ku lrigu kudra ki kaika mathariri ka rarukudrane,

²⁵ pakai ku kaika amawvagavagadhane patuelre ki kinawmasane, si makakalikalithi patuelre kwini makaelaela ka rarukudrane.

²⁶ Ku vaeva ka rarukudrane ki kinawmasane lu kwalri, lri tupapalra kwalri patuelre ku rarukudrane ki kinawmasane, ku vaeva ka rarukudrane ki kinawmasane lu kilrigu, lri tupapalra kiragai patuelre ku rarukudrane ki kinawmasane.

²⁷ Amani numi ku kinawmasane ki Kirisitu, sanaka tangeea amani ku rarukudrane.

²⁸ Ikai kiwkai, ku Twaumase wabaai pasudalepe ki sanaka umawmase ku adulrwane kaungu; ku kelreteini: Ku aswalaalanga amani kai nisikawlane, ku mwasakadrusa amani kai yuginsia, ku mwasakatulru amani kai tarabulrubulru; ala kamani kai paiya ku pinangu Twaumasane ka puku, ala kamani kai yakai ku puku pawdringai ki macaeme; ku drumane la ikaiyana ku wadulru paralubu ki palrapalra, wadulru marasikai ki laawngane, wadulru iya ku vaga ki abake.

²⁹ Kwi lalasu kaika yadrepele ka nisikawlane, kaika yadrepele ka yuginsia, kaika yadrepele ka tarabulrubulru makanaelre, la kaika yadrepele dulru pia ku pinangu Twaumasane ka puku,

³⁰ kaika yadrepele dulru pawdringai ku caemane, kaika yadrepele dulru kawriva ku vaga ki Ri, kaika yadrepele dulru swacenge ku vaga ki abake ka puku.

³¹ Ai, kunumi kitubia kudra makuciacingalre ku akibaadhane ku lalrilrigilane ki Siri. Kaiasasane lri pelaelaku numiane kudra mathaithariringa ka kadalranane.