1 Kurintu 11 - Ngudradreadrekadhane Ka Sisiu 魯凱語聖經

¹ Kunumi twalralravaili, mia ku tatwalralravaneli ki Kirisitu.

Kakwakudhane ki tasukusukubane

² Wadrengedrengeraku numiane; asi lwiyane ngwalringalringau numi nakwane, si la paluludu numi ku bulruli numiane.

³ Ai, anatumane la pulringalringau amiaku numiane, ku Kirisitu amani ku awlru ki sanaka aneaneaneeanenga; ku taelrelre ka sawvalai laka awlru ki tawane ka ababai; ku Twaumase laka awlru ki Kirisitu.

⁴ Ku sawvalai lu ikai ki rarubwane inulri lu pelaela ku hukuingi ki Twaumase, alaiyasi kabungu ki awlru amani ku pakiarubwane ki Kirisitu.

⁵ Ai, ku taelrelre ka ababai lu ikai ki rarubwane inulri lu pelaelaela ku hukuingi ki Twaumase, alaiyasi kai kabungu ki awlru amani ku pakiarubwane ki tawaneini ka sawvalai. Ku miyaiya kai ku ababai si wakiriti ku isiu ku ababai kadrwa ku tamakakaelane.

⁶ Ku ababai lwiyasi kai kabungu ku awlru; maesaesai lu kiriti ku awlru kamani; kudra wathingalenga ka samatininu lu kiriti ku awlru si lu kaciane ku isiu, kwini alisu nai kabungu ku awlru.

⁷ Kai sawvalai kai lri kabungu ku awlru, asi lwiyane pwataluvaivai ku tangimiane si lrigu ki Twaumase. Ai kai ababai pwataluvaivai ku lrigu ki sawvalai;

⁸ Asi lwiyane kai sawvalai kaika twalai ki ababai kibekace; ai kai ababai twalai ki sawvalai kibekace;

⁹ kai sawvalai kaika pasiakai ki ababai kibekace, ai kai ababai pasiakai ki sawvalai kibekace.

¹⁰ Ngwalai ki sasiakawlu belenge, kai awlru ki ababai nai pikai ku sapatuthingalane ka puku.

¹¹ Ku tinukucingalrane yai, ikai adringi ki Tamatama, ku sawvalai si ababai masasatalu, si maurikai.

¹² Asi lwiyane kai ababai twalai ki sawvalai kibekace, kai sawvalai twalai ki ababai kitulalake, ala kai sanaka lamaneemanenga twalai ki Twaumase kainganai.

¹³ Kunumi ngitaturingaringava! Swadalepe lu irarubwane ku ababai inulri papia ki Twaumase si kai kabungu ku awlru?

¹⁴ Kudra takaumawmasane numi kai peaelaela numiane, ku sawvalai lu elrenge ku isiu akiarubwananeini,

¹⁵ ai ku ababai lu elrenge ku isiu lrika lriguini? Asi lwiyane ku maelrenge ku isiu wadulru tusapaidringane ki ababai.

¹⁶ Alaiyasi ikai ku nau tubalre amia, lri iyaku kai sikakathane, kunai si lakiwkai ki Twaumase ikai ki tasukusukubane kadrwa ku drumane ku nitukakudhanane.

Saniange ka Kwaubu ki Tamatama

¹⁷ Kikai lrika apelaelaneli kaika lri drengedrengere numiane, asi lwiyane ku tairuburubwane numi tengatengane ka lri mulisi ka kadrwa ku apakaesadhane.

¹⁸ Ku aswalalanga, yakai ku peaelaela nakwane, lu iruburubu numi matatwalrilrigane numi. Masalrwaku kikai vaga kai tara ka patengane ku drumane.

¹⁹ Ikai numiane ku matatwalrilrilrigane makucingalre kakadrwa; lri kamani ku athingalane drele ki umawmase luka aneane ku pacengecenge ku taiyaiyane.

²⁰ Lu yelrelre numi, kai numi ka kaiyanganai paluludu ku kwaubu ki Tamatama.

²¹ Asi lwiyane kunumi ka tangeea maracange numi makanaelre kane kwini iluku numi ku lamanemanenga, la ikai ku masilrasilrau, yakai ku mabucuku ku mabusuku.

²² Bekace ka kadrwa ku daane numi ku adulrwane numi ikai kane ungulu? Alau waraanau numi sidrekase ki kiwkai ki Twaumase, si la pakiarubwane numi ki matiakukuru? Lri tumanaiyaku numiane? Lri drengedrengeraku numiane? Lri kainaku drengedrengere numiane!

²³ Ku bulrubulruli numiane tarumarali twalai ki Tamatama: Ku Tamatama ka Yesu sa lri kikilangai sakamaungu, wamalra ku pange,

²⁴ la kiaseasene ki Twaumase, si la apapipithingi, si iya kai, “Kikai yai kinawmasaneli, ka pasiakai numiane ngicacilri; kunumi piapianga kikai, si ngulringalringau nakwane.”

²⁵ Sa maka kanenga, la tuthadalrane malra ku kupu, si iya kai, “Kikai kupu yai cegecege ki Twaumase ka bavane ka sakiketeketane, ka arakai ku eraili tusapatuthingalane. Sana ungungulu numi, pangimianga kikai, si ngulringalringau nakwane.”

²⁶ Lakamani, pakela ku akelane ngusela ki Tamatama sana kanekane numi kai pange ungungulu kai yakupwane, peaelaelaela numi ku tapacadhane ki Yesu.

²⁷ Lakamani, adravane ka aneane, alaiyasi kai arakai ku tengatengane ka musakenane ku kidremedreme kane ku pange ki Tamatama, ungulu ku kupu ki Tamatama, kwini lasu pasalriwnga ki kinawmasane si erai ki Tamatama.

²⁸ Anika aneaneane tara paswala ngikakidremedreme, ala kane kikai pange, ungulu kikai yakupwane.

²⁹ Alaiyasi kai lasu lu kane kai pange ungulu kai yakupwane, la kai thingale ku kanekaneini si ungunguluini ala ka macacapili ki kinawmasane ki Tamatama, lu kane kai pange ungulu kai yakupwane amani ku ngiadadawdawlu ku akisaibangane.

³⁰ Ngwalai kikai, ala kamani ku ikai numiane kwi la twaramuru, macaeme, yakai kwi la wapacainga.

³¹ Alaiyasi paswalata ngikakidremedreme, kaita lri pakela kudra ki akisaibangane.

³² Ai, lu kisaibangeta ki Tamatama, Tamatama ka wabulrubulru mitane, ku kaika atupapalraneta ki kawmasane ka umawmase kipakarededele kitupasalrivane.

³³ Lakamani, laretesaneli, lu yelrelre numi si palululudu ku kwaubu ki Tamatama, mauakalavalava madu.

³⁴ Lu ikai ku aneane ku masilrau, paswalana ikai tavanane kane, amani lu kisaibange ki Twaumase lu yelrelre numi. Ku ngwakai ki drumane, lu kelanga naku taturingariingau.