1 Kurintu 10 - Ngudradreadrekadhane Ka Sisiu 魯凱語聖經

Pakiapapawlringau ku pangukai ki Wasukubu ki Samiamiange

¹ Laretesane, ani pulringalringau amiaku numiane, ku tangilribatane kipadradresenge ki cucungulaneta satupapapalra ki Musi saikai ki calragulragu. Kiapalribulu ikai tailebeane ki ememe makanaelre si kasulivate lribate ki laveke Suize.

² Ikai ki ememe, ikai adringi ki laveke, kiapabanau makanaelre si papia ki Musi.

³ La kane makanaelre ku thadaalrane ka taleke ki abake,

⁴ waungulu ku thadaalrane ka berai ki abake. Kikai berai amani kudra twalai ki twapapalra liniane ka ngwakai ki abake ka alrisapesape kainganai ngiburai mwaludru; kwini alrisapesape Kirisitu.

⁵ Ai, ikai liniane, takakalra kwi umawmase kwi kaika kadalame ki Twaumase, ngwalai kai la pacai makanaelre ikai ubulane.

⁶ Kikai patuelre sakipapawlringavaneta, lri pakipapawlringau mitane ku kaika angimiane liniane karau kudra ki ngialisiane ka lamanemane,

⁷ madha ngialralrau liniane kudra ki yakai kudra matwase sukubu ki samiamiange. Mararaamau ku taiyane ki Sisiu, “Kikai laumawmase wanene si kanekane ungungulu, la pakilringau ku takapeapeaperavane.”

⁸ Takai twalralrau liniane ikai liniane yakai ku laumawmase ku padralradralra si ka kadrwa ku inwane; kwi lalasu ngwalai ku la tapadralrane pasalriu, ikai ki vaivaai, la ta 23,000 ku umawmase ku twabakebake pacai.

⁹ Takai twalrau liniane ikai liniane yakai ku laumawmase ku paiya kwini kituthiathingale ki Kirisitu; kwi lalasu ngwalai ku takituthiathingalane iniane la kikace ki sulrau si pacai.

¹⁰ Takai twalrau liniane kudra yakai ku laumawmase ku avavaga kalisi; kwi lalasu ngwalai ku taavavagane kalisi la kipapacai ki tarapakamwamudu ka sasiakawlu belenge.

¹¹ Kwini takipadradresengane ki lalasu kilakikai amaninga ku sapakipapawlringavane ki palrapalra, la pacase patuelre, ku akipapawlringavaneta, asi lwiyane yakaita kai ki bibiilrilinga ka zidai.

¹² Lakamani, kudra mapapedrengaku acegecege ku amia, lrika amani ku kiapapawlringau, amani lu tubakebake.

¹³ Ku kipadradresedresenge numi ku akikituthiathingalane adulrwane kipadradresenge sanaka umawmase. Ku Twaumase yai patengatengane; lri kai pakipadradresenge ku kaika adulrwane numi kiecebe ku akikituthiathingalanane. Lu kela ku akikituthiathingalanane, lri baai ku puku numiane, lai lri dulru numi siamece, lai lri muelebe numiane ku sivale ku angukaiyane numi ku kadalranane.

¹⁴ Lakamani, kinathalradhane ka laretesane, kunumi kidaila ki ngwakai ki asukubane ki samiamiange.

¹⁵ Papiapiaku numiane kawriva ka la wathingale ki kakudhane; lri dulru numi ngikakamani turingaringau kai taiyaneli luka pacengecenge luka pasalriu.

¹⁶ Lu unguluta kai nisubulrubulrwane kai yakupwane, kaika kiasupisupilri ku erai ki Kirisitu? Lu kaneta ku niapapithipithingane ku pange, kaika kiasupisupilri ku kinawmasane ki Kirisitu?

¹⁷ Asi lwiyane vaeva ku pange, la mavalavalata kisupilri ki vaeva ka pange; lakamani, adravane takalrata, vaevanata ka kinawmasane.

¹⁸ Drela ki swa Iseraylri, kudra la wakanenga ku nipatarumarane ku lamanemane, yakainga ku tamacacapilane lini ki tapatarumaramarane.

¹⁹ Lu iyaku kai manemane ku pacugane? Tengane ka makucingalre ku samiamiange si sapatarumarane ka waudriwdripi?

²⁰ Ini! Amiaku kikai, kudra nipatarumarane ikai ki tapatarumaramarane ki maelane ka takisuswane kudra waudriwdripi yai patarwamara baai ki aidridringane, kaika patarwamara baai ki Twaumase. Kainaku palraingi lu taelre numi ki aidridringane.

²¹ Kai numi lri maka ungulu ku kupu ki Tamatama si la ungulu ku kupu ki aidridringane, kai numi lri dulru kipaelre ku pangiakaneane ki Tamatama, la kipaelre ku pangiakaneane ki aidridringane.

²² Lri dawluta ku akalisiane ki Tamatama? Sanianiangeta iniane?

²³ Yakai ku umawmase ku amia kai, “Yakai ku angilralrainganeta pia sanaka maneemane.” Kai pasalriu kai vaga kai. Ai, kaika yakaai ku akaesadhane sanaka maneemane. “Yakai ku angilralrainganeta pia sanaka maneemane.” Ai, kaika lri paraalubu ki umawmase sanaka maneemane.

²⁴ Sanaka aneane madha ngipapasikaikai ku akaesadhanesu ka tangeangea, kakalitha ku akaesadhane ki palrapalra.

²⁵ Kudra yatakilangalangadhane ki labeate ku nikilangadhane, kanea patuelre, madha ngwalalai ki takidremedremane si kivaga ku maneemane.

²⁶ Asi lwiyane amia kikai kai Sisiu, “Kai kawmasane si kikai yakawmasane sanaka manemane Tamatamane patuelre.”

²⁷ Alaiyasi ikai ku kaiyana kiasusu ki Tamatama ku umawmase la pakane ku aga numiane, la palraingi numi katwase mwa, kanea ku niputalekane pikai ki cukui si kakathane, madha ngwalalai ki takidremedremane si kalrilriki.

²⁸ Ai, alaiyasi ikai ku umawmase ku peaelaela numiane, “Kwini la akaneane nipatarumaranenga ki samiamiange iya”, Kunumi ngwaladha kwini ki peaelaela numiane kwini ki umawmase, si la ngwaladha ki takidremedremane, si kai kane kwini akaneane,

²⁹ kainaku papia kwini ki kidremedreme numi, papiaku kwini ki takidremedremane kwini ki umawmase. Alau lri ikai ku umawmase ku kiavaga iya kai, “Kai tangilralrainganeli ani kiruthuku ki takidremedremane ki umawmase?

³⁰ Alaiyasi pikaiyaku ku kiaseasenane ka kidremedreme si tarumara kai akaneane, ku palrapalra ara maka kawriariva lu kaneaku ku nisubulrubulrwanenga ku akaneane?”

³¹ Lakamani, adravane tumane numi ku manemane, ku wakane numi, ku waungulu numi, anika alrigwane ki Twaumase ku pia numi.

³² Adravane papia numi ki swa Yuda, ki swa Gurike, ku papia numi ki kiwkai ki Twaumase, madha patubakebakebake ki umawmase.

³³ Singikaiya ku tapianeli si la katwase pia; nau pakiragai amiamiaku numiane makanaelre, kadrwana ku ngipapasikaili ku akaesadhane, makalithaku sikakathane ku akaesadhane makanaelre, pakai ku akipalribulane lini.