1 Kurintu 1 - Ngudradreadrekadhane Ka Sisiu 魯凱語聖經

¹ Kunaku ka Pawru, ngwalai ki takidremedremane ki Twaumase, la kidawlaku anisikawlane ki Yesu Kirisitu. Kwaku si retesaneta ka Susetenese,

² watigami nai si baai ki kiwkai ki Twaumase ka lasinzia ikai Kurintu. Kunumi si yakai kidruanga kitubitubi ku nagane ki Tamatamata ka Yesu Kirisitu, laka thadaalrane ikai adringi ki Yesu Kirisitu kidawlu asinzia si ka swakainga ki Twaumase. Ku Kirisitu yai Tamatama lini, la mialri ka Tamatamata.

³ Ku Tamaita ka Twaumase si Tamatama ka Yesu Kirisitu ani baai numiane ku migemi si sulivatane!

Akaesadhane ikai adringi ki Kirisitu

⁴ Taatalingikaiyananeli numiane kiaseasene ki Twaumaseli, asi lwiyane pangwakai ki Yesu Kirisitu baai numiane ku migemi,

⁵ ala maka ikai numi adringi ki Kirisitu kaesai sanaka maneemane, si pikai numi pasuete ku thingalane si lrigilane kawriva.

⁶ Kudra patharukai ki Kirisitu ku akasi mapapedrengenga ikai numiane,

⁷ Lanu ikai ki taukalavalavane numi ki Tamatama ka Yesu Kirisitu lu utaluvaivainga, laka kadrwanga ku nipakakadrwane ku nipatarumarane ka apiane.

⁸ Ku Tamatama lrika taparalubane numiane, lu kela ngusela mulebe ku Yesu Kirisitu kudra vai kwini lai ka kadrwa ku akiakwiyane numi.

⁹ Kai Twaumase yai patengatengane ka asudralrwalrwane; wadawlu numiane, ala maka taelre numi ki Lalakeini ka Tamatamata ka Yesu Kirisitu.

Tamatukwakudhane kasuburu ki kiwkai

¹⁰ Laretesane, pangwakaiyaku ku nagane ki Tamatamata ka Yesu Kirisitu si pasapukwane numiane makanaelre, ku vaga numi maramaramava, madha matukwakudha si kasuburu, karathuda, la maramaraamau ku takidremedremane, maramaraamau ku adarurane.

¹¹ Laretesaneli, kai tai Kuluse yakai ku pwataluvaivai pelaela nakwane, ikai numiane yakai ku makalililisi iya.

¹² Ku taiyaneli yai, makaelaela ku taiyane numi. Yakai ku amia kai, “Swakaiyaku ki Pawru”; yakai ku amia kai, “Swakaiyaku ki Apuluse”; yakai ku amia kai, “Swakaiyaku ki Pitiru”; yakai ku amia kai, “Swakaiyaku ki Kirisitu”.

¹³ Ku Kirisitu kiapapipithingi! Ku pasiakai numiane pacai ikai ki ziwzika amani ku Pawru? Kunumi pangwakai numi ku nagane ki Pawru kipabanau?

¹⁴ Maelanenga ki Twaumase, kathane ku Kirisepu si Gaiuse, kadrwa ku naaneanenga ku pabanawli numiane,

¹⁵ lakamani kadrwa ku umawmase ku lri dulru iya kai, kunumi yai pangwakai numi ku naganeli kipabanau.

¹⁶ (Ununga, la pabanawngaku ki Setipana si wacekecekeleini, ku drumane la ikaiyana ku aneane ku kiapabanau, kainaku maka pwalringaunga.)

¹⁷ Ku sikawlu nakwane ki Kirisitu kaika ngwalai ki apabanavane, ani dindu amia nakwane, kai arakai ku lrigilane ka vaga, amani lu akawlravane ku tapacadhane ikai belenge ki ziwzika ki Kirisitu.

Ku Kirisitu yai amani ku maadrau ka puku si lrigilane ki Twaumase

¹⁸ Ku sabulrwane patharukai ki tapacadhane ki Yesu ikai belenge ki ziwzika, ikai kudra ki la papiapia ki akamudane ka umawmase lu drele yai twamakulrungu; papia mitane ka lakiapalribulunga, laka madrau ka puku ki Twaumase.

¹⁹ Asi lwiyane kai Sisiu: Lri kabebetethaku ku lrigilane ki malrigili ka umawmase; lai mwalrathaku ku thingalane ki ngiathingale ka umawmase.

²⁰ Lu mia kwini, ku malrigili ku umawmase yainu? Ku ngiathingale ku umawmase yainu? Kudra malrigili kidrikisi ku vaga ki kawmasane yainu? Ku Twaumase wamalranga pakakukulrungu kai lrigilane kawmasane!

²¹ Ku Twaumase arakai ku lrigilaneini, la kai maka singikai ki lrigilaneini si thingale iniane kai umawmase kawmasane; ngiabaalrelringa, ku Twaumase pangukai kudra pelaelaelata kudra “Makulrungu” ka hukuingi si palribulu ki masalru iniane ka umawmase.

²² Ku swa Yuda kiatubi ku pinangu Twaumasane ka puku, ku swa Gurike kiapasilape ku lrigilane,

²³ kunai la pelaelaela nai kudra kiakedrekedre piziwzika ka Kirisitu; kikai hukuingi lu drele ku swa Yuda yai akiarubwanane, lu drele ku sakamaelanane ka umawmase la ka kai mamamua ki kakudhane.

²⁴ Ai lu drele kudra lapinilriane ki Twaumase ka laumawmase, kai wasusu ku swa Yuda si swa Gurike, kikai hukuingi yai Kirisitu; amani ku maadrau ka puku ki Twaumase, ka lrigilane ki Twaumase.

²⁵ Asi lwiyane kudra “Kulrungane ki Twaumase” niyane, tara ka sabebelenge ki lrigilane ki umawmase, kudra “Turamurane ki Twaumase” niyane, laka sabebelenge ki tasapukwanane ki umawmase.

²⁶ Laretesaneli, pulringava sadawlu numiane ku Twaumase yai, ku takangimiyaiyane numi yakai numi ki ngitwatumane. Lu singikaiyane ku tadrelane ki umawmase, tabekele ku malrigili numiane, ku yakai ku puku, ku la yakai ku niwsakenane ku taetalane.

²⁷ Ku Twaumase la piilrilringa kudra makulrungu kiaiyaiya kai kawmasane, ku lrika akainwane ki malrigili ka umawmase; ku Twaumase la pilri kudra twaramuru niyaiyane ki yakawmasane, ku lrika akainwane ki makecenge kagarange ka umawmase.

²⁸ La pilri ku Twaumase kudra kiasidrekadrekase ki yakawmasane, kiakavalracevace, kudra kai kiatumanemane, si kamani ku wabalre kudra ki makucingalre niyaiyane.

²⁹ La pakametemete ki umawmase ka kadrwa ku angitatwadravane icucubungu ki Twaumase.

³⁰ Ai, ku Twaumase wamalra numiane apaelre ki Yesu Kirisitu, la pakamani iniane ku lrigilaneta; ngukai iniane, la maka kidalruta ki Twaumase, si kamani ku mabula ka laumawmase ki Twaumase, ka wamalranga ku angilralraingane.

³¹ Mararaamau ku taiyane ki Sisiu iya kai, “Kudra lri lrigu, lrigwa ki takaungane ki Tamatama.”