Téerëe bíníyú unna won Pool Tít ɗë 3 - Séréel Ndút

Yee waɗ ɓëyí gémpé rë

¹ Lah nérsé ɓëewë biti wa warutee on njíittí gina cér a ɓëewë homru nguur ka ra, wa ñee iña na wonu wa ra, wa caŋ paŋ yii hente wun ɓéeɓ.

² Wa henun ɓëewí në wëníh ɓos sun ow a ɓëewí në íñíih. Wa henun ɓëewí sosute níi sos, wa lah jaamma a ɓëewë ɓéeɓ.

³ Yee tah mi won ɗo yii baa ra bitih : filoon, yeni wa ɓéeɓ húmú lahuy af. Yen húmú kaa⁠ˈ⁠uute ñee yee won Koope ra, yen húmú ɓëewí múuƴú múuƴë. Fah-neɓ a pagaɗ ɓos húmú hampe yen ñaam, yen na tasuu pesa⁠ˈ ɓos nuf a iñaan. Ow húmú fahaay yen tík íl te yen húmú fahuuy tíkëntë⁠ˈ íl.

⁴ Ndaa, teeɓa⁠ˈ Koope fa daa Sëmlëhí yen naa⁠ˈ⁠i keeñi a ɗee faha⁠ˈ ri ɓëewë rë,

⁵ ɗi sëmlë⁠ˈ⁠té yen. Biti yen pagu yii júɓpé neh daa tah ɗi sëmlë⁠ˈ yen ; ɗi yérém yen yérmë. Ɗi hosse keeññi yen sëmlë⁠ˈ⁠té yen. Ɗi ñeya⁠ˈ doolii Ruuh-Peseŋ yen límëetúté, yen lahute pes has.

⁶ Ɗi ñeya⁠ˈ⁠te Yéesú-Kiristaa Sëmlëhí yen na, líifíɗté yen a Ruuhi baaha.

⁷ Ɗaaha, on-Koo tahte ɗi haba⁠ˈ⁠te yen ɓëewí júɓúté nda yen hen ɓëewí ay haal pesa na ɗúméh, na yaakaaru yen ɗa.

⁸ Woni wëerté abah, te mi faha⁠ˈ⁠te biti fu ɓaat naa wone nda ɓëewë gémú Koope ra ɓéeɓ pokoh paŋ yin wun. Baa daa yee wun te lahiɗ ɓëewë ɓéeɓ njiriñ ra.

⁹ Ndaa nék, lah moytee capa⁠ˈ pëtíh, cabi tii yi caacci mínéh ɗúm, íñë⁠ˈ a taasanta⁠ˈ di yii leŋke Kootaa. Ƴaa ɓéeɓ wonni lahay af a lúk te lahay njiriñ.

¹⁰ Lah ɓëyí fí yéŋké biti hom ɗaralsa⁠ˈ ɓëewë ɗaralsoo raa, lah dëeké rí fu won ɗii na. Ɗi kaa⁠ˈ síkírëhú rëe, fú dëekëet ɗí fú wonaat ɗii na. Ɗi kaa⁠ˈ síkírëhú waali ana fa raa nék, lah ɗúhé ɗii na níi lan,

¹¹ te fu yúh biti ɓëyí baa helte waala wun ɗa te bakaaɗɗi teeɓa⁠ˈ⁠te biti daan waɗte ri, te daa ri koma⁠ˈ ri afi.

Unna míllë⁠ˈ líkín Pool Tít ɗë

¹² So⁠ˈ nék, may roo wola⁠ˈ Artemaas mbée Tísík. Ow di waa na ac ɗaa, lah yípée ac fu ɗeef so⁠ˈ Nikopolis, may líƴée në.

¹³ Lah page yii mín fú ɓéeɓ sun fi ɓaaba na suu Senaas fi layoha a Apolos ra, fu waaƴiɗ wa níi iñi wa ɓéeɓ mit.

¹⁴ Koy-yaayya filiɓ ngémë ɓal warutee pokoh paŋ yin wun nda wa lah njiriñ, wa dímlë⁠ˈ ɓëewë homu coono ra.

¹⁵ Ɓëewë funi wa homu dee ra ɓéeɓ na woduu ro. Lah wodee kooƴƴee ke yen filiɓ ngémë. Koope líhë rën mal ɓéeɓ⁠ ⁠!