Téerëe bíníyú unna won Pool Tít ɗë 1 - Séréel Ndút

Wodohi Pool Tít

^1-4 Ɗo fi Tít, ɗo fa haba⁠ˈ mi koy so⁠ˈ kah-kah filiɓ ngémë boku yen ɗa, so⁠ˈ mi Pool, so⁠ˈ mi súrgíi Koope a apootari Yéesú-Kiristaa, daa mi na wodoh ro. Mi nahu habra⁠ˈ⁠i ɓëewë Koope tanis wa ra wa ham ngémë, mi teeɓ wa kaaf ka, kaaf ka ñéerë⁠ˈ a pesadi ɓëewí pokuute Koope na. Hen ɗaa raa, ay waa wëer biti wa ay haal pesa na ɗúméh, gapa⁠ˈ Koope ɗeef ëldúnë sakuy doom ra, ɗi fa na woneh yii lahay ra. Laha⁠ˈ wahtaa faha⁠ˈ ri ra, ɗi fi Koope Sëmlëhí yen teeɓa⁠ˈ⁠te yii leŋke pesi baa filiɓ Unee ke ri túuƴ ɗí së⁠ˈ waare ra. Kon book Tít, Baap-Koo a Yéesú-Kiristaa Sëmlëhí yen líhún ɗë mal, on ɗo jaamma⁠ ⁠!

Ɗee waɗti man njíit jaŋi ra

⁵ So⁠ˈ nék, fu ot mi hel ro Keret, faha⁠ˈ⁠i biti fu lúsíɗ yee húmú tas légéyë rë níi iña ɓéeɓ tíkëh waal, te gin fi gin ɓéeɓ fu fal na i njíit jaŋi ti di naha⁠ˈ mi ro ri nen.

⁶ Njíit jaŋi nék, waɗti hena ɓëyí lahay yii wonun sun fi, teem ɓeleɓi na kut, koyya ƴahun ɓëewí gémúté Kiristaa, ow ɓan waa haba⁠ˈ walaŋkaane, wa hen ɓëewí koruute.

⁷ Njíit jaŋi daa na tooppitoh yii leŋke iñi Koope, daa tah ɗi waɗti hen ɓëyí lahay yii wonun sun fi. Ɗi waray hen ɓëyí gaan-gaanla⁠ˈ gaan-gaanloo, waray hen ɓëyí keeña wuneh, waray hen ɓëyí han kep daa afa, waray hen ɓëyí faha⁠ˈ⁠te haa⁠ˈ, waray hen ɓëyí paga⁠ˈ yii waray, saame na alal.

⁸ Ɗi waɗti hena ɓëyí mínté haneel, faha⁠ˈ yin wun, ɗi hen ɓëyí teeyte, júɓpé, ɗi hen ɓëyí lante te mín ham afi.

⁹ Ɗi waɗti hena ɓal ɓëyí pokohte híin Una mit lekoh ra ti di yëeddúu rí nen. Hen ɗaa raa, ɗi ay mín yëedíɗ ɓëewí kayya kaah, ɗi on wa doole, teeɓ ɓëewë na haa⁠ˈ⁠uu ri iña na yëeddë⁠ˈ rí rë biti wa homuy kaah.

Yëeddëh yí paɗɗah ya

¹⁰ Caakute ɓëewí fí yúhté biti faaliyuuy yii na wonu wa, níi luka⁠ˈ yëwúɗɗë haalu ngémë rë, wa anti homuu daaha nofee ɓëewë a wonni lahay njiriñña waa na.

¹¹ Lah feheye níi wa nís wonni ƴaa ɓúkkí wë, ndah wa powute faam caak. Wa yëeddúu iñi yéŋké biti waray, wa saame na alal.

¹² Húmú lahte ɓëyí dék Keret, bi ɓëy gin wa húmú habuu ri yonente. Ɓëyí baa húmú won tih : « ⁠ ⁠Ɓëy Keret mësúu hen i feloh, wa ɓëewí ɓosute ti raɓɓa luufa nen, wa ɓëewí ɗapasute te kamute⁠ ⁠»,

¹³ te yee won ɗi baa ra kaah. Yii baa daa tah lah wonee ɓëewë në a unni diŋke nda wa lah ngémí híinté.

¹⁴ Wa ɓanuy síkírëh yëwúɗɗë na wonu wonni saku sako ra, wa ɓanuy ñee iña na túuƴú wë ɓëewí súugúuté kaaf ka.

¹⁵ Ɓëewí ladute, yin na sobeyeh waa na. Ɓëewí laduy nék, ƴee gémúy rë, iña ɓéeɓ sobeya⁠ˈ sobeyoo waa na ndah níɓɓí wë na ladeh, wa na lëhíh jom.

¹⁶ Wa digiruu biti wa yúhú Koope, te pagaɗɗi wa teeɓa⁠ˈ⁠te biti wa wonuy yin ɗii na. Wa ɓëewí ɓosute ɓosi woneeh, faaliyuuy yii na wonu wa te wa míníh paŋ dara yii wunte.