2 Timoote 1 - Séréel Ndút

Wodohi Pool Timoote

^1-2 Ɗo fi Timoote, ɗo fa haba⁠ˈ mi koy soo na te mi faha⁠ˈ⁠te ro níi faha⁠ˈ ra, so⁠ˈ mi Pool, daa mi na wodoh ro. So⁠ˈ mi apootari Yéesú-Kiristaa ndah Koope daa faha⁠ˈ baaha. Mi nahu woni ɓëewë yii leŋke pesa gap Koope ɓëewë nay none Yéesú-Kiristaa na ra. Baap-Koo a Yéesú-Kiristaa Yíkíi yen líhún ɗë mal, teeɓ ɗo naa⁠ˈ-keeñ, on ɗo jaamma⁠ ⁠!

Líkíní Pool Timoote yii leŋke waarii Uni Neba

³ Ma na sím Koope fa na jaamiyoh mi ra ti di na húmú paguu ri caacci so⁠ˈ koon nen, te mi paga⁠ˈ ri a afi tookke. Na⁠ˈ a elek ɓéeɓ, ɗagaa mi faraah mi cap tiyu

⁴ te nuf so⁠ˈ payte muun ma húmú yook fu na húmú takuu yen bín fë rë, tahte mi sesohte tíkëedú íl níi keeñ so⁠ˈ sos siiɓ.

⁵ Nuf so⁠ˈ na koleeh ɗee hena⁠ˈ ngémú kaah ɗoo na ra, te ngémí baa daa húmú ciffu Lëyíis a yaafu Ëníis në, te ri ee ɗoo na ɓal. Baa wëerté së⁠ˈ këŋ⁠ ⁠!

⁶ Yii baa daa tah mi na nédís rë ee biti fu ɓaatti hubis yee on ɗo Koope, bee húmú tíkë⁠ˈ mí rë ya⁠ˈ mi falte ro ra, ndah

⁷ Koope onay yen Ruuh-Peseŋ nda yen hen ɓëewí neehute. Ruuha kay taha⁠ˈ yen lah doole, yen fahanta⁠ˈ, yen mín ham affi yen.

⁸ Kon, ngana sopoh waarii yii leŋke Yíkíi yen na te ngana sopoh ɓal téjë téƴú mí kasu af ri ra. Ɗo kay, habe rek yen bok coono fa laha⁠ˈ mi waarii Uni Neba ra, Koope ay yen on doole.

⁹ Daa ri sëmlë⁠ˈ yen, dëekké yen nda yen hen ɓëewí ladute. Pagaɗɗi yen daa tah neh Koope dëek yen. Yee tah ɗi dëek yen ɗa kay, neɓa⁠ˈ ri neɓoo ɓaatte biti ɗi onte yen mal. Mali baa húmú ñéyíɗ ɗí Yéesú-Kiristaa na onte yen ɗi ɗeef ëldúnë sakuy doom ra,

¹⁰ feeñce yen na leegi, bee aya⁠ˈ Sëmlëhí yen Yéesú-Kiristaa ëldúnë rë. Ɗi ɓaŋke kúl kë, ñeya⁠ˈ⁠te Uni Neba teeɓpe yen biti lahte pesi na ɗúméh.

¹¹ So⁠ˈ nék, Koope fal so⁠ˈ apootar nda mi waare ɓëewë Uni Nebi bah, mi yëedíɗ wë rí.

¹² Yii baa daa tah mi deƴ coono ɗeh, ndaa mi sopaay na ndah mi yúh ɓëe⁠ˈ mi tík yaakaari so⁠ˈ ɗii na ra, te wëerté së⁠ˈ biti ɗi mín níiɗ yee déŋéen ɗí së⁠ˈ rë níi yiin bis-këem.

¹³ Fu kelohte unni kaah ya won mi ro ra. Lah nérsée wë fu ham na a ngémí híinë lahu yen a faha⁠ˈ⁠a fahuu yen ow ndah nona nonu yen Yéesú-Kiristaa na ra.

¹⁴ Lah habe iñi wunna déŋéenú fú ƴaa ra híin, Ruuh-Peseŋ fa dék yen na ra ay roo ɓedda⁠ˈ.

¹⁵ Ɗo nék, fu yúhté biti sah koy-yaayya deyi Aasi ɓéeɓ yessute so⁠ˈ, Fisel a Hermosen nonu ɓëewí ƴaaha.

¹⁶ Onesifoor nék, na hoñ soo toñ te homa hom mi kasaa bee ra, ɗi sopaay na. Kon, Yíkëe ɗémpí teeɓ ɓëy faami naa⁠ˈ-keeñ.

¹⁷ Ɗi kay, hena⁠ˈ ri Rom cëp, ɗi yam saami so⁠ˈ níi ri otte so⁠ˈ.

¹⁸ Yíkëe ɗém ɗíi teeɓ naa⁠ˈ-keeñ yiin bis-këem⁠ ⁠! Ɗo fi bah, fu luk ɓëewë ɓéeɓ yúh ɗee habra⁠ˈ ri so⁠ˈ Efes ra.