Luk 23 - Nde-Nsele-Nta LP NT Portions

Jisɔs ka nibri Falet na Ɛrɔd

¹ Ka abɔngɔ abokogho wɔɔ ba ajɔ ka nkɔn atam amo na Jisɔs ka mfo a Gɔbanɔ Falet.

² Ka ajam naragha adɛ alaghɛ, aragha, “Warr emoyog si munnu yɔfa asɛb efegheayɔ akɛ anɛ ɛbrɛɛ. Atɔ mbɔ si aki kpe taksi ɛkɛ Sisa, afɛnɛ arag si yɛ are Kras, nton.”

³ Ka Falet abɔmmɔ Jisɔs, “Wɔyɔ ore nton a Jus?” “Wɔyɔ ɔrag na,” Jisɔs akpɛ.

⁴ Ka Falet atɔ nton a Baɛjɔ Ɔsɔwɔ na ɛbɔngɔ, “Ndɛyɛ ejighi ji munnu yɔ agbɔ.”

⁵ Ka mbɔ ayim fa ka ajaa ya atɔ Falet, “Nekpene ɛnɛ yɛ ɛbagha na efegheayɔ ɛkɛ anɛ wɔɔ ka Judia. Ajam nekpene ka Galili tɛtɛ amisi fa nani ka Jɛrusalɛm.”

⁶ Sa ayog ji mbɔ aragha, Falet abɔmmɔ si “Jisɔs nnɛ Galilian yɔ?”

⁷ Ngara ya agbɛrɛ si Jisɔs aru ka mfo bi ere ka nɔyɔ Ɛrɔd, Falet atoɛ akɛ Ɛrɔd, ya atam a jɔ ka Jɛrusalɛm ka ngara yi.

⁸ Ka nete ɛyɛbɛ Ɛrɔd sa ayɛ Jisɔs, atebsi mba ama rab ya asɛb si ayiɛ. Ɛrɔd amoyog ebe mbe bi Jisɔs ya ane, asɛb si ka ane ndenge yi atɔngɛ.

⁹ Ɛrɔd abɔmmɛ ebe abɔmmɔ, ka Jisɔs jaji ariɛkpɛ.

¹⁰ Nton a Baɛjɔ Ɔsɔwɔ na bekpena ejighi ayimi fa, aragha akora adɛ alagha Jisɔs.

¹¹ Ka Ɛrɔd na ɔsɔja ɛbɛ atoɛ afɛnɛ akanɛ. Alebɛ anɔba abɔ́, ka Ɛrɔd atoɛ akɛ Falet.

¹² Jam ka ofo bi Ɛrɔd na Falet akɔnɔ na atɛ, eyoghoyogho ajɔ ka ujing.

¹³ Falet abeng aton a Baɛjɔ Ɔsɔwɔ na abokogho na anɛ aba amakɔn,

¹⁴ ka atɔ mbɔ, “War ɛba na munnu yɔfa ɛmɛ kɛm si ajɔ asɛb efegheayɔ akɛ anɛ brɛ. Mmɔ bɔmmɔ abɔmmɔ ka nibri ɛnɛrɛ ka ndɛyɛ mfo bi agbɔ ejighi si war ɛragha.

¹⁵ Ɛrɔd titi, ariyɛ mfo bi agbɔ ejighi ka atoɛ afɛnɛ akɛ warr; si war ɛyɛ, arine jaji ji efumu na nuku.

¹⁶ Ka nnumɛ nfɛnɛ nsighɛ abɔ.”

¹⁷ (Ka kpere eyighi Sing sighi Gɔbanɔ ya ayighi nnɛ wiwi ka mgbɔkɔbɔ asighi abɔ.)

¹⁸ Ka ɛbɔngɔ wɔɔ abenge, “Ba sɔng na munnu yɔfa! Ɛkɛ warr Barabas!”

¹⁹ (Barabas atoɛ mgbɔkɔbɔ ateb eburu ji ɛgbɔ ka ɛjɛbɛ na anɛ ba akpɔ.)

²⁰ Falet asɛb mba sa asighi Jisɔs abɔ, Falet afɛnɛ arag na mbɔ.

²¹ Ka mbɔ arigɔ nebenge, “Koɛ! Koɛ!”

²² Ka arag na mbɔ ka mkpɛ ɛsa: “Jɛji? Bagha ejighi ji ja agbɔ? Ndɛyɛ ji ane ji ebenge ka nuku. Ka nnumɛ nfɛnɛ nsighi abɔ.”

²³ Ka abenge gbogbo Falet kɛ nɔyɔ ekoɛ, ka ebenge mbɔ ɛsɛrɛ Falet asighi abɔ.

²⁴ Ka Falet atama ane si mbɔ asɛbɛ.

²⁵ Ka Falet asighi Barabas abɔ, nnɛ ya ato mgbɔkɔbɔ ka efegheayɔ na eyon a nnɛ, ka asighi Jisɔs abɔ akɛ mbɔ.

Sa ako Jisɔs ka ete njang ɛnɛ

²⁶ Si ɔsɔja ajɔ amo na Jisɔs, akɔrɔ munnu ya abengɛ si Simɔn ya aru ɛjɛbɛ Sarene, Simɔn ajɔ amo ya Jɛrusalɛm ka ane a asɔn ete njang ɛnɛ atɔɔngɔ Jisɔs ka njam.

²⁷ Ebe anɛ atɔngɛ, kpɛnɛ abaka ba ajɔ anan.

²⁸ Jisɔs amanga abri mbɔ arag, “Abaka Jɛrusalɛm, ba kim nan; ba nan biji ɛbrɛ na abɔ brɛ.

²⁹ Ka ngara aragha bagha yi ɛragsi, ‘Ɛnara ɛjɔ ɛkɛ abaka ba arifɔ abɔ, nna ya akagha tɔghɔ wɛn mmɔ na abɛn ya mmɔ akagha tɔghɔ yab!’

³⁰ Ka “ ‘atɔ atakpa akonkon, “Gbɔ nyɛghɛ warr!” Ka atɔ akonkon “Bono warr!” ’

³¹ Ka anɛ anena mbe bifa akɛ ete ji ere mbɛr, ka jɛ ɛwɛmɛ ɛkɛ iku a ete?”

³² Ɔsɔja emo na Jisɔs na abunu aba ba ane abibi afɛ sa ama yon.

³³ Ngara ya asi ka mfo bi abeng si Akpagha bisi, fayɔ ya akoɛ, na abunu aba ba ane abibi afɛ, ako wiwi ka ɔbɔ bunu yɔga ka ɔbɔ baka Jisɔs.

³⁴ Jisɔs akag njɔ, “Nsɛ, tamsighi mbɔ, atebsi anyim ji ya ane.” Ka atob nafanga sɔng agbɛrɛ sa abanga abɔ́ a ɛyɛ.

³⁵ Sa anɛ ayim fa asɛngɛ, anɛ bisi ayɔnɛ. Ka mbɔ arag, “Yɛ anaghɛ anɛ baga, nɔngɔ atam anagha nɛnɛ arena are Kras, nnɛ yɔ Ɔsɔwɔ asanga.”

³⁶ Ɔsɔja ɛtama ɛba ɛmɛ akanɛ. Akiɛ amanga amam

³⁷ ka arag, “Orena nton a Jus, nagha nana.”

³⁸ Ayɛnɛ, ka bɔsɔ ete njang ɛnɛ ɛjɛ: fa nton a jus.

³⁹ Nne a abibi afɛ wiwi ya atɔg ka ete njang ɛnɛ arag abibi ano akɛ Jisɔs: Arag “Wɔ sang ore Kras? Nagha nana ɔtam ɔnagha warr!”

⁴⁰ Ka nne a abibi afɛ yɔga ayamɛ. “Wɔ Ɔsɔwɔ ɔrɔmɔ bɛghɛ,” ka arag, “Ateb ɛkpɔghɔ nuku nini?

⁴¹ Anumu warr ka ji ene, Ka munnu yɔfa ebibi jaji arine.”

⁴² Ka amanga abri Jisɔs arag, “Gbɔnter ɛyaa ɔmanna ba ka oton ɛba.”

⁴³ Jisɔs akpɛɛ, “Ntɔa kɛdɛdɛghɛ, ɛnɛji ɔjɔ nanaa ka nnɔbɔ a mfo bi abeng si Faradas.”

Nuku Jisɔs

⁴⁴ Ka ngara yi njon ame kpere niyimi ka bokorisi, ejingi ebono nsisi yi wɔɔ tɛtɛ nkrangka ɛsa ka efen.

⁴⁵ Ka njon agɔ nayagha. Ka ekpeghe nju Ɔsɔwɔ ka Jɛrusalɛm ɛya ɛja baba.

⁴⁶ Ka Jisɔs arag gbogbo, “Nsɛ, mmisighi abɔ ka etughu ɛjaa nkia wɔ.” Sa arag na akpɔ.

⁴⁷ Ntakpa nnɛ ɔsɔja Rom, ayɛ ji ɛmɛwɛmɛ, atig Ɔsɔwɔ arag, “Kɛdɛdɛghɛ munnu yɔfa afɔfɔ.”

⁴⁸ Ngara yi anɛ wɔɔ agba sa ayɛ ji ɛwɛmɛ, afu abɔ ka nggang amo esiyiri esiyiri.

⁴⁹ Anɛ wɔɔ ba agbɛrɛ Jisɔs nnɔbɔnnɔbɔ na abaka ba atɔngɛ ka Galili aba, ayimi daghadagha, ayɛ ji ɛwɛmɛ.

Sa asam Jisɔs

⁵⁰ Ka munnu ya abengɛ si Josɛf, ajɔ nnɛ wiwi ka ɛbɔngɔ abokogho a Jus, etingi nnɛ ya arijɔ ane ebibi,

⁵¹ ya aritama na ji abokogho aragha na ji ane. Aru ka ɛjɛbɛ ji abeng si Arimatia, ka Judian, ajɔ abri si oton Ɔsɔwɔ ɛba.

⁵² Ka Josɛf ama abɔmmɔ Falet sa akiɛ iku Jisɔs.

⁵³ Ka Josɛf ama sɛnɛ iku Jisɔs afuɛ ka anɔba abɔ́ ama akag ka ɔnam bi asam ka natan, nkuanɛ yayi fa akagha tɔghɔ bo.

⁵⁴ Ofo bi ɛjɔ ofo etongo mbe anɔngɔ ka ofo esiayɔ bi ɛkpa jam.

⁵⁵ Abaka ba aru na Jisɔs ka Galili atɔɔngɔ Josɛf amayɛ ɔnam na sa abo iku Jisɔs.

⁵⁶ Ka afɛnɛ njam ka etek ama tongo nnyan yi eyughu nyɛbɛ nasan na akuu ya ayughu mfɔm. Ka ofo esiayɔ asiayɔ si ejighi ɛtɔngɔ.