Luk 20 - Nde-Nsele-Nta LP NT Portions

Abɔmmɔ Jisɔs fangyɔ yi ɔkɔ nɔyɔ

¹ Ofo bibi si Jisɔs ajɔ akpene anɛ ka nnetek nju Ɔsɔwɔ aragha ayɛbɛ aka Ɔsɔwɔ, nton a baɛjɔ Ɔsɔwɔ na bekpena ejighi Mosis, na abokogho, aba akɔrɛ.

² Ka abɔmmɛ, “Tɔ warr bagha nɔyɔ ni one mbe bi. Yɛnnɛ akia nɔyɔ si one mbe bi?”

³ Jisɔs akpɛ mbɔ, “Nɔngɔ ntam mbɔmmɔ war mbɔmmɔ. Tɔm.

⁴ Ewura alab a Jɔn eru ka ɔbɔ Ɔsɔwɔ fasɛ nnɛ?”

⁵ Agɔngɔ nakana ka biji mbɔafɔnɔ aragha, “Ɛragna si, ‘Eru ka ɔbɔ Ɔsɔwɔ bi bɔsɔ,’ arag si, ‘Nang ka eritama ɛkɛ Jɔn?’

⁶ Ka ɛragna si, ‘Eru ka ɔbɔ anɛ,’ anɛ bafa wɔɔ atobbo warr atan, atebsi mbɔ atama si Jɔn ajɔ mbono Ɔsɔwɔ.”

⁷ Ka mbɔ akpɛ, “Warr enyim mfo bi nɔyɔ eru.”

⁸ Ka Jisɔs atɔ mbɔ, “Mmɛ war titi ntɔm mfo bi nɔyɔ ɛnaa eru ni nne mbe bi.”

Ɛbɛɛ nkɔgha ɛgbɛ

⁹ Jisɔs ajam nutuu ɛbɛɛ jifa: “Munnu wiwi abɔm ɛgbɛ greb akɔ akɛ bɛkɔgha ɛgbɛ, ka atam amo ka ɛjɛbɛ jintingi ama jɔga ka ebe anya.

¹⁰ Ka ngara ɛbɔng a akab a greb ato mmɔanju sa amo ka mfo a bɛkɔgha ɛgbɛ akiɛ mbanga ɛyɛ. Ka bɛkɔgha ɛgbɛ amɔbɛ atoɛ akru abɔabɔ.

¹¹ Mfɔna ɛgbɛ ato mmɔanju yɔntingi, ka afɛnɛ amɔbɛ atoɛ akamɛ akru abɔabɔ.

¹² Ka afɛnɛ ato mmɔanju yɔntingi ka mkpɛ ɛsa, ka amɔbɛ ateɛ bɛnɛn akamɛ aru.

¹³ “Ka mfɔna ɛgbɛ arag, ‘Mmɛ nne nang? Nto mmɔ waa, ya akɔrɔmkɔr; mkpɛmɔng ato mbɔ ka amar akaghɛ.’

¹⁴ “Ka ngara yi bɛkɔgha ɛgbɛ ayiɛ, atɔ nimbɔ. ‘Fa mmɔ a mfɔna ɛgbɛ,’ ka arag. ‘Nɔngɔ eyonɛ, sɔng ɛgbɛ ɛjɔ jɛjɛrɛ.’

¹⁵ Ka atuɛ aru ka ɛgbɛ ayonɛ. “Wɔ ɔkana si mfɔna ɛgbɛ ane mbɔ jɛ?

¹⁶ Ntɔ war, abagha ama yon bɛkɔgha ɛgbɛ akɔ ɛgbɛ greb ji akɛ anɛ bantingi.” Ngara yi anɛ ba ayogho ɔka bi, arag, “Ɔsɔwɔ aki tama!”

¹⁷ Jisɔs abri mbɔ ka nibri sɔngsɔng ka abɔmmɔ mbɔ, “Ka ji ayɛnɛ ka nwɛr eru nang: “ ‘Natan ni besia nju atɛntɛn nɛnɛ ni ɛfan ɛjɔ etingi natan ka niwinju.’

¹⁸ Kpere nnɛ ya agbɔ ka natan nifa ayamayama ka ajaja; ka kpere nnɛ yɛ ɛgbɔ ɛnyɛghɛ ɛgɔghɛgɔg.”

¹⁹ Bekpena ejighi Mosis na aton a baɛjɔ Ɔsɔwɔ asɛb mba ya abɔbɛ naosunosu, atebsi agbɛrɛgbɛrɛ si atuu ɛbɛɛ ji ateb mbɔ. Ka mbɔ abɛ ji anɛ ane mbɔ.

Nekpeghe ataksi

²⁰ Ka jina ji ane sɔng abɔbɛ, ato anɛ kabibi ba afe ɛwag ajɔ nasi anɛ ba ɛdɛdɛghɛ. Akana si abɔbɛ ka ano ya aragha, sɔng asighɛ abɔ akɛ gɔbanɔ ya akpe nɔyɔ.

²¹ Ka anɛ babibi ba ato abɔmmɛ mbɔmmɔ, “Nkpekpene, warr enyinyi si wɔyɔ ɔrag ɛdɛdɛghɛ ɔfɛnɛ okpene na, ɔkɔ kpere nnɛ ɛkanɛkan ɔfɛnɛ okpene anɛ ɛdɛdɛghɛ si Ɔsɔwɔ asɛb sɛ ajɔ.

²² Ɛnɔnɔb si ekpe taksi ɛkɛ Sisa fasɛ erinɔb?”

²³ Jisɔs ayɛ ɛwagha mbɔ ka atɔ mbɔ,

²⁴ “Ma tɔngɔm dinarus. Nibri yɛnnɛ ni na mbeng ya ayɛnɛ fa?” Mbɔ akpɛ, “Sisa.”

²⁵ Ka atɔ mbɔ, “Ma fɛnɛ kɛ Sisa ji ere ɛkɛ Sisa, ɛkɛ Ɔsɔwɔ ji ere ɛkɛ Ɔsɔwɔ.”

²⁶ Ka mbɔ arima abɔbɛ ka ji arag fɔngfɔng. Ka biji ɛkpɔ mbɔ ka nɛkpɛ ɛnɛ, agɔ kam.

Mbɔmmɔ ateb nɔkpɔghɔ anyimi

²⁷ Ba Saddusi bamɔng, ba aritama si nnɛ amanna kpɔ akpagha afɛnɛ ajɔ ka nekpen, aba akɔrɔ Jisɔs na mbɔmmɔ.

²⁸ Abɔmmɔ, “Nkpekpene, Mosis ayɛnɛ akɛ warr si mmɔannaja yɔnu akpɔna asighi nka ya ari wɛn abɔ, mmɔannyɛ akɔ nka mmɔannyɛ awɛn abɔ ka mbeng a mmɔannyɛ.

²⁹ Munu ajɔ abɔannyɛ bunu asimma. Mgbɔghamba akɔ manka yɔ akpɔ abɔ arifɔ.

³⁰ Ɛtɔɔngɔ mmɔannyɛ akɔɛ akpɔ abɔ arifɔ.

³¹ Ka ɛtɔɔngɔ mmɔannyɛ basa amakɔɛ naban atam akpɔ abɔ arifɔ. Abunu ba asimma wɔɔ akpɔ, arifɔ abɔ na manka yɔ.

³² Ka Kɛkannanjam manka yɔ akpɔ titi.

³³ Ka munu tɔ warr ajɔ nka yɛ ka ofo ba akuanɛ afɛnɛ ajɔ ka nekpen, ka abunu ba asimma wɔɔ akɔɛ naban.”

³⁴ Jisɔs akpɛ, “Naban ere ɛkɛ anɛ fa ka eying jifa.

³⁵ Ka anɛ ba Ɔsɔwɔ ayɛ sa afumu sa afɛnɛ ajɔ ka nekpen ngara ya amanna kpɔ anyimi ka eying jifa naban ɛjɔm.

³⁶ Ka nuku mkpɛ ɛba akpɔghɔm; ateb are nasi baɛnjɛl. Are abɔ Ɔsɔwɔ, atebsi are abɔ ba anyimi ajɔ ka nekpen.

³⁷ Ka ngara yi ɛmɛnɛgbɛ ɛjɔ enun, araggasi Mosis ayɛnɛyɛnɛ si akuanɛ anyiminyimi, ka abeng Ntaa si ‘Ɔsɔwɔ Abraam, Ɔsɔwɔ Asik na Ɔsɔwɔ Jɛkɔb.’

³⁸ Ka yɛ Ɔsɔwɔ akuanɛ arem, are Ɔsɔwɔ anɛ ba are mber, ka yɛ anɛ wɔɔ are mber.”

³⁹ Bekpena ejighi Mosis bamɔng akpɛ, “Nkpekpene, ɔmarag ɛnɔb!”

⁴⁰ Ka nnɛ wawi arikpɛma abɔmmɛ mbɔmmɔ yintingi.

Mbɔmmɔ ateb Kras

⁴¹ Ka Jisɔs abɔmmɔ mbɔ, “Jɛ ɛsɛrɛ ka arag si Kras are mmɔ a Debid?

⁴² Debid fɔnɔ arag ka Nwɛr a Sam: “ ‘Ka Ntaa atɔ Ntaa ɛwaa: Jɔ ka ɔbɔ bunu ɛbaa

⁴³ tɛtɛ nne anɛ baujing ɛba asɛnɛ biji mbɔ, ajɔ ete nji ekona ajaa ɛyɛ.’

⁴⁴ Debid abengɛ si ‘Ntaa.’ Ka ane nang ajɔ mmɔ wɛ?”

Ma baba na bekpena ejighi

⁴⁵ Sa anɛ wɔɔ ajɔ ayongo atɔng, Jisɔs atɔ asɔgba ɛyɛ,

⁴⁶ “Ma baba na bekpena ejighi Mosis. Yɛ ɛkɔr mbɔ nɛjɛnɛ asibi na akorasɛ araba bɛnɛmɛ sɔng akag mbɔ nnyɔ, afɛnɛ afɔ nakagha ka kpere mfo bi amo. Afɔ nji asi okpokoro ka nju a mfa Jus na nakagha ka akpegha mfo eyighi.

⁴⁷ Ane agɔn amar ka buju mbɔ, anɛ ba anu a mbɔ akpɔ asighi mbɔ akag ndaba mba njɔ nawɔsi mbɔ ba aga fɔ. Abunu bafa Ɔsɔwɔ anumu mbɔ ntakpantakpa.”