Luk 2 - Nde-Nsele-Nta LP NT Portions

Sa awɛn Jisɔs

¹ Ɛmɛnɛmɛnɛ Sisa Ɔgɔstus nnɛ isi ka eying Rom akɛ nɔyɔ si afan anɛ ka akpeghe ya are ka nɔyɔ ɛnɛ.

² Yifa ya are mgbɔghamba ɛfan anɛ ka ngara yi Kuirinius ajɔ Nton a Siria.

³ Anɛ wɔɔ amo ka baka mbɔ ama kag abeng.

⁴ Erusi Josɛf atam amo ka ɛjɛbɛ ji abeng si Nasarɛt ka ekpeghe Galili amogho Bɛtɛlɛyɛm, ɛka Nton a Debid, ji ere ka Judia. Amo ga atebsi aru ka ɛbangannab Debid

⁵ Amo na Meri, ɛjɛnjɛn ɛjɛ sɔng ama kag abeng ka nwɛr, ya amɛ gbɔ ka naban, ngara yi akpe ɔla ɛmɛkpere nɛwɛmɛ.

⁶ Ngara yi mbɔ akpagha are fa ɔwɛn eboghɛ,

⁷ awɛn mgbɔghamba mmɔ wɛ, mmɔannu. Akɔ abɔ́ afuɛ akɔɛ abo ka ɛkpaghante ji ɔnya ɛnɛghɛ mbenɛnɛghɛ, atebsi nkɛbɛ arijɔ ka nju yi ajɛnanɛ asɛnɛ.

Ba ɛbaba Ɔnya na Baɛnjɛl

⁸ Ka enokon ji baɛbaba ɔnya bamɔng ajɔ fa kperekpere, ajɔ ababa ɔnya mbɔ.

⁹ Ɛnjɛl a Ntaa aru ka mfo a mbɔ, ɛfɔngɔ Ntaa ɛya esibi mbɔ, ɔbɔn ene mbɔ.

¹⁰ Ka ɛnjɛl atɔ mbɔ, “Ɔbɔn ekiwar ne! Mba na etingi oteb bi ɛbagha na ntakpa ɛyɛbɛ nete mankɛ anɛ wɔɔwɔɔwɔɔ.

¹¹ Ɛnɛji amɛ wɛn nnanagha ka ɛka Debid akɛ war; anɛsi Kras, Nsɔjɛrɛ nju!

¹² Ɛjɔ ejo ndenge ɛkɛ war; ɛyɛ mmɔ ya afu ka abɔ́ abo ka ɛkpaghante ji ɔnya ɛnɛghɛ mbe nɛnɛghɛ.”

¹³ Ɔkɛbɛɔkɛbɛ ntakpa ɛbɔngɔ baɛnjɛl aru ka bɔsɔ ama kpɛnɛ na mgbɔghamba ɛnjɛl, atighi Ɔsɔwɔ aragha,

¹⁴ “Negere ɛjɔ ɛkɛ Ɔsɔwɔ ka bɔsɔ, na nsisi, nanaa ɛjɔ ɛkɛ anɛ ba ɔfa ɛbɛ ɛtɔɔngɔ mbɔ.”

¹⁵ Ngara yi baɛnjɛl atam amo ka etek Ɔsɔwɔ ka bɔsɔ ba ɛbaba ɔnya arag atɔ atɛ “Nɔngɔ warr emo ka Bɛtɛlɛyɛm ɛmɛyɛ mbe bi ɛmɛwɛmɛ, yi Nsɔjɛrɛ nju atɔ warr ateb.”

¹⁶ Erusi ɛbanɛban amo amayɛ Meri na Josɛf, na mmɔ, ya anɔng ka ɛkpaghante ji ɔnya ɛnɛghɛ mbenɛnɛghɛ.

¹⁷ Ngara yi ba ɛbaba ɔnya amɛyɛ, atɔ mbɔ ji ɛnjɛl atɔ mbɔ ateb mmɔ yɔ,

¹⁸ anɛ wɔɔ ba ayogho biji ɛkpɔ mbɔ ka ji ba ɛbaba ɔnya atɔ mbɔ.

¹⁹ Ka Meri akɔ mbe bi wɔɔ akagha nete akana ateb.

²⁰ Ba ɛbaba ɔnya akru, akagha atighi Ɔsɔwɔ ka mbe bi ayogho afɛnɛ ayɛ, ɛtam ɛjɔ ɛkanɛkan sa atɔ mbɔ.

²¹ Ka afo anaghanɛ, yi ngara asi yi akɛbɛ ndor, akiɛ mbeng si Jisɔs, mbeng yi ɛnjɛl akiɛ ka ayibi ɔla ɛbɛ.

Akɔ Jisɔs amo ka nju Ɔsɔwɔ

²² Ngara yi afo nju abo mbɔ akanna sa ejighi Ɔsɔwɔ ji Mosis ayɛnɛ ɛtɔngɔ, Josɛf na Meri akɔɛ amo ka Jɛrusalɛm ama tɔngɔ Ntaa,

²³ (nsɛrɛ si ayɛnɛ ka ejighi Ntaa, “kpere mgbɔghamba mmɔannu are akɛ Ntaa”),

²⁴ akɛ mbe bi ajɔ akɛ Ntaa; sa arag ka ejighi ɛjɛ: “ɛmɛb baba sɛ mblagu mba.”

²⁵ Ɛfɔ munnu ka Jɛrusalɛm ya abengɛ si Simiɔn ya afɔfɔ afɛnɛ asighiabɔ ka nekpen ɛnɛ akɛ Ɔsɔwɔ. Ajɔ abri Nnanagha Isɛrɛl, Mbara Nɛfɛb ajɔ nanɛ.

²⁶ Mbara Nɛfɛb aribi atɔɛ si atɔghɔ yɛ Ntaa Kras ka akpɔ.

²⁷ Mbara Nɛfɛb asɔnɛ amanam ka nju Ɔsɔwɔ. Ngara yi nsɛ na nnyɛ aba na mmɔ Jisɔs ka nju Ɔsɔwɔ sa ama ane nɛwɛmɛ si ejighi Mosis ɛtɔngɔ,

²⁸ Simiɔn atabɛ ka abɔ ɛyɛ akag Ɔsɔwɔ si:

²⁹ “Ntaa omene si ɔrag si one, namunu mmɛ mmɔanju ɛwa mkpɔghɔ ka nanaa.

³⁰ Mmɛyɛ nanagha ɛna ka amar ɛyaa,

³¹ ji wɔ omene anɛ wɔɔ ayɛ:

³² ɛfɔngɔ emiribi ɛkɛ anɛ ba Jɛntal, ɛfɛnɛ ɛjɔ negere ɛkɛ abɔ a Isɛrɛl.”

³³ Nsɛ mmɔ na Nnyɛ ɛkpɔ mbɔ biji ka mbe bi arag ateb Jisɔs.

³⁴ Simiɔn anara mbɔ ka atɔ Meri, nnyɛ Jisɔs; “Ji Ɔsɔwɔ akana ka mmɔ yɔ ajɔ ejo ji ɛsɛrɛ ebe anɛ agbɔ ebe afɔ nanagha ka Isɛrɛl, Jisɔs are ejo ndenge yi ebe anɛ atɛnɛ.

³⁵ Sɔng ɛgbɛrɛ nkana yi aru ebe anɛ ka nete. Ntakpa esiyiri ajɔ akia nasi nnɛ ya ajamɛ ɔkangkang ka nete.”

³⁶ Ɛfɔ ɛkokono manka wiwi ya ajɔ mbono Ɔsɔwɔ, anɛsi Anna mmɔ a Fanuel, aru ka ɛka ji abeng si Asa. Akɔɛ naban ajɔ na nnu ka nnya isimma nanting ka nnu akpɔ.

³⁷ Ajɔ ngɔn a manka tɛtɛ asi nnya atananɛ na ɛnɛ. Ariyama asighi nju Ɔsɔwɔ akag Ɔsɔwɔ efen na enokon, ajɔ njan akagha njɔ.

³⁸ Aba amayɛ Josɛf na Meri ka ngara yi akag Ɔsɔwɔ same arag ateb mmɔ ya anɛ wɔɔ abri sa amanagha abɔ a Jɛrusalɛm.

³⁹ Ngara yi Josɛf na Meri ame ne mbe wɔɔ si ejighi Ntaa ɛtɔngɔ, afɛnɛ ka ɛjɛbɛ mbɔ Nasarɛt ka ekpeghe Galili.

⁴⁰ Si mmɔ yɔ Jisɔs abenge ama koro, agbɛrɛ ejo nanaa Ɔsɔwɔ ɛjɔ nanɛ.

Jisɔs ka nju Ɔsɔwɔ

⁴¹ Ka nnya nnya nsɛ na nnyɛ Jisɔs amogho ka Jɛrusalɛm, ya amuru ka ojo ka ɛka Ijib, amanɛ eyighi sing sighi.

⁴² Ngara yi Jisɔs asi nnya wobo na ɛba atam amo eyighi si nɛwɛmɛ mbɔ ɛtɔngɔ.

⁴³ Nsɛrɛ si akan na eyighi nsɛ na nnyɛ afɛnɛ ka etek. Ka mbɔ arigbɛrɛ si mmɔ yɔ Jisɔs asa ka Jɛrusalɛm.

⁴⁴ Akana si are ka edu mbɔ, ajɛn ka ofo bibi ariɛyɛ. Ka amajamɛ nɛsɛbɛ kidu anɛ ɛbɛ na atɛ.

⁴⁵ Ngara yi amɛ sɛb ariɛyɛ afɛnɛ njam amo ka Jɛrusalɛm amabirɛ.

⁴⁶ Ɛtɔɔngɔ afo asa amayiɛ ka nju Ɔsɔwɔ ajig ka ɛbɔngɔ bekpekpene, ayongo atɔng ka ji aragha afɛnɛ abɔmmɔ mbɔ abɔmmɔ.

⁴⁷ Kpere nnɛ ya ayogho ɛkpɔɛ biji si ajɔ agbɛrɛ akpɛ abɔmmɔ ya bekpekpene ajɔ abɔmmɛ.

⁴⁸ Ngara yi nnyɛ na nsɛ ayiɛ, biji ɛkpɔ mbɔ. Nnyɛ arag na nanɛ, “Mmɔ waa erunang ka one warr na? Mmɛ na nsɔja efeghe warr ayɔ ɛsɛba.”

⁴⁹ “Jɛji ka ɛsɛbɛm?” Jisɔs abɔmmɔ. “Enyim si ka nde ka nju a nsɔjaa?”

⁵⁰ Meri na Josɛf erimbɔ ribi ji Jisɔs atɔ mbɔ.

⁵¹ Jisɔs akag mbɔ atɔɔngɔ mbɔ amo ya Nasarɛt. Ka nnyɛ akɔ mbe bi wɔɔ akag ka nete.

⁵² Ka Jisɔs abenge ka biji na kɛ ɛgbɛrɛ ejo, afɛnɛ ajɔ ka nɔnɔbɔ na Ɔsɔwɔ na anɛ.